鐘落潭站

鐘落潭站（粵拼：zung1 lok3 taam4 zaam6；英文：Zhongluotan Station）係廣州地鐵14號綫嘅車站，2018年12月28號開通，喺白雲區鐘落潭五龍崗廣龍路華龍街口（105國道嘅K2524+715標記位）。

鐘落潭 ZHONGLUOTAN
鐘落潭站嘅站名
概覽
冧巴	1406
位置	白雲區鐘落潭五龍崗廣龍路華龍街口 105國道嘅K2524+715標記位
座標	23°22′40.63″N 113°23′42.38″E
車站色
經過路線	14
啟站	2018年12月28號
月台數	2
站口數	3
營運資訊
車站服務時間	06:02～23:15
列車服務時間	06:07～23:10
廣州地鐵14號綫 嘉禾望崗　◄竹料 （4.6km） （5.6km）馬瀝►　東風

結構

外觀

File:ZungLokTaamZaam Surface.jpg

從出面睇鐘落潭站嘅樣

同其它14號綫嘅高架站一樣，呢個站嘅外觀方面，個樣似高鐵嘅高架站多啲，其中2樓部份睇落似玻璃牆。但佢有個地方同琶洲嘅會展中心唔一樣嘅係，呢個站最頂冇大隻紅字印住個站名響度。

樓層

呢個站一共有3層樓嘅地上區域，其中地上1樓係出入口，有設備房同市政設施；地上2樓係站廳，有票務設施，客務中心同商鋪；地上3樓係14號綫月台。站內既有休息室，又有廁所，更加有母嬰室。其中休息室有4個，喺14號綫月台範圍入面，每個月台各有兩個。而廁所同母嬰室喺站廳收費區入面近東邊牆邊範圍，其中母嬰室喺廁所嘅女廁門口隔籬。

打掂

地上 三樓	4月台	← 14號綫列車去竹料站（慢）（行嘉禾望崗嗰邊）
	島式月台，開左邊門（限慢綫）
	2月台	← 14號綫列車去嘉禾望崗站（快綫唔停站）
	3月台	14號綫列車去東風站／鎮龍站（快綫唔停站） →
	島式月台，開左邊門（限慢綫）
	1月台	14號綫列車去馬瀝站（慢）（行東風嗰邊） →
地上 二樓	站廳	售票機、客服中心、商舖、警務室、安檢設施
地面		出入口、設備房、市政設施

打橫

鐘落潭站嘅站廳

鐘落潭站嘅月台

站廳

鐘落潭站嘅站廳收費區喺車站東北邊，西南邊係過街通道。收費區有好多部扶手電梯同樓梯、專用𨋢往返月台都得。

月台

呢個站有兩個島式月台，喺廣從七路近廣龍路口嘅上空，鐘落潭大鐘紀念碑西南邊500m位置。

不過，由於14號綫實行咗快慢綫，兩綫嘅列車行嘅軌道都唔同。其中慢綫列車喺車站開邊嗰兩條軌道停站，而快綫列車直接喺車站埋邊嗰兩條軌道飛站唔停。喺慢車到呢個站之後，若果下一班係快車兼馬上到呢個站飛站嘅話，慢車入面都有「而家係臨時停車，車輛設備安全」嘅反復廣播。

另外，呢個站嘅車行嗰四條軌道入面嗰兩條軌道之間，有條波口位響度，專門畀喺鐘落潭站以東北啲車站出冬瓜豆腐時，啲車會攞呢個站做總站，屆時去從化或新和、九佛、鎮龍一帶嘅需要轉乘其它交通工具。

商舖同自助服務

呢個站冇商舖，但得臺自助服務。自助服務凈得部共享雨遮響度。

自助服務 共享雨遮

出入口

鐘落潭站冚唪唥嘅出入口
A出入口 A出入口  B1出入口 B1出入口  B2出入口 B2出入口

呢個站有3個出入口，分别係A、B1同B2。

冧巴	標記	方位	去到邊度
出入口A	廣從七路	東	地鐵鐘落潭站巴士站（北行）
出入口B1	廣從七路	北	鐘升東路
出入口B2	廣從七路	西北偏北	廣龍路、地鐵鐘落潭站巴士站（南行）

頭尾班車信息同配線圖

配線圖
█ 14號綫 ▲馬瀝站
▼竹料站

行去邊頭	頭班車	尾班車
每日
14號綫
嘉禾望崗站	06:09	23:05
東風站	06:07	23:10
注意： 喺晚黑最後一班車開走之前嗰5分鐘之內， 係唔畀入閘坐車（包括埋買車飛）。

車站歷史

規劃

喺2003年份地鐵規劃方案入面，嗰時嘅新華綫^{[註 1]}由花都汽車城出發，先經過人和同太和，再跟住廣從公路去到從化街口為止，嗰時路線經過廣從公路嘅鐘落潭大鐘一帶。但2005年，新華綫嘅西段（花都汽車城⇆高增）被列入咗9號綫一部分^{[註 2]}，而廣從路段（太和⇆街口）直到2008年份規劃先至重新提出。

2010年，爲咗落實廣州市嘅「北優」發展戰略同埋支持從化同埋知識城嘅發展，嗰時份規劃話起14號綫，路線要起成「人」字樣。雖然話有整呢個站，但站位向西南移咗500m。雖然路線提出咗快綫嘅需求，但唔經呢個站^[1]。

施工

2017年3月14號，喺車站東北邊1.8km外嘅福龍路口附近條高架都重未鋪出嚟。

2018年4月8號，車站重喺度起緊，不過已經見到車站最基本嘅框架。

• 2015年10月11號，車站正式喐手起。
• 2017年12月28號深夜，喺呢個站到馬瀝之間嘅高架段順利合攏之後，成條14號綫主綫高架段貫通嗮。
• 2018年1月30號上晝，車站順利封頂，成為14號綫一期最後封頂嘅車站。
• 2018年5月31號，隨住鐘落潭⇄馬瀝之間嘅最後一條鋼軌成功焊接，主綫軌道嘅高架段長軌亦全面貫通^[2]。
• 2018年8月31號，呢個站到竹料嘅兩個區間橋樑構件預制已經順利通過工程驗收。
• 2018年9月26號，呢個站正式三權移交而開始營運前調試^[3]

開通

2018年12月28號晏晝，由於14號綫一期主綫部份正式開通，呢個站亦正式開放。

事件

晚黑突發煤氣洩漏

2019年11月21號19:35（UTC+8），喺呢個站兩千米以外嘅白土村入面間化工廠發生咗煤氣洩漏，氣體隨之飄入車站，令成個地鐵站入面聞到煤氣味。事發之後，廣州地鐵方爲咗保障乘客同列車營運嘅安全，從而宣佈呢個站要封站，唔理係慢車定快車都好，冚唪唥都行入面條軌道唔停站通過^[4]。直到22:14（UTC+8）先至解除禁令^[5]。

利用狀況

呢個站嘅主要周邊乘客都係以附近嘅鐘落潭一帶、天成莊、長腰嶺嗰邊啲村民同返放工啲廠房、工地啲職員、鐘落潭地區讀書啲學生為主

附近嘅建築同景區

• 鐘落潭村口紀念碑
• 五龍崗村
• 華盛紙箱廠
• 李莊新村

註同攷

註

1. 喺2003年份地鐵規劃入面，嗰時嘅新華綫定嘅路線冧巴好亂，試過用咗「9號綫」同「14號綫」呢兩隻名。
2. 同年亦將9號綫向西延長到飛鵝嶺嗰頭做總站。原先計劃二期延長到清遠，但因唔夠錢而冇繼續再搞西延長計劃。

攷

1. 〈广州地铁14号线一期及知识城支线获批 站点公布〉。原著喺2016年3月5號歸檔。喺2019年1月27號搵到。
2. 〈地铁十四号线一期高架段长轨贯通〉。《广州参考》。今日頭條。2018-05-31。
3. 〈地铁十四号线一期嘉禾望岗至马沥段开始运营调试〉。《广州市人民政府》。2018-10-29。原著喺2018-12-22歸檔。喺2019-01-27搵到。
4. 〈广州地铁钟落潭煤气泄露 网友：咳得我差点晕厥〉。《羊城晚报》。新浪。2019-11-22。
5. 〈广州钟落潭出现刺激性气味，地铁一度飞站，官方连夜通报〉。《南方都市報》。搜狐。2019-11-22。

上一站·下一站

上一站⇚⇚　　　　廣州地鐵　　　　⇛⇛下一站
竹料站 嘉禾望崗站←	鐘落潭站 14號綫（主綫慢車）	馬瀝站 →東風站