嘉禾望崗站

嘉禾望崗站（粵拼：gaa1 wo4 mong6 gong1 zaam6；英文：Jiahewanggang Station），規劃嗌過嘉禾站（gaa1 wo4 zaam6；Jiahe Station），係廣州地鐵2號綫同埋3號綫、14號綫嘅轉車站，喺白雲區華英路入面，廣州市第八人民醫院嘅東北邊地底。不過三個月台嘅開放時間都唔同，其中2號綫月台喺2010年9月25號開放^[1]；3號綫月台喺2010年10月30號開始營運；而14號綫月台喺2018年12月28號開始營運^[2]。

嘉禾望崗 Jiahewanggang
嘉禾望崗站嘅2號綫同3號綫站名
概覽
冧巴	224 325 1401
位置	白雲區嘅華英路入面，廣州市第八人民醫院嘅東北邊地底。
座標	23°14′24.8″N 113°17′10″E
車站色	2：　（焗漆） 3：　（焗漆） 14：　（玻璃）
經過路線	2 314
啟站	2號綫：2010年9月25號 3號綫：2010年10月30號 14號綫：2018年12月28號
月台數	3
站口數	8
營運資訊
車站服務時間	06:00～23:10
列車服務時間	05:55～00:23
廣州地鐵2號綫 廣州南站　◄黃邊 （1.8km）
廣州地鐵3號綫 海傍　◄白雲大道北 （2.1km） （6.3km）龍歸►　機場北
廣州地鐵14號綫（慢綫） （3.9km）白雲東平►　東風
廣州地鐵14號綫（快綫） （3.9km）白雲東平►　東風

佢既係廣州地鐵史上第一個跨月台轉車站同第一個三綫轉車站，又係廣州地鐵系統其一喺站內有兩個廁所嘅車站，亦係2號綫嘅北邊尾站（永久嘅終點站）同14號綫南邊尾站。因為2號綫嘅規劃嚟到呢度唔再繼續延長。

結構

樓層

呢個站一共有2層樓嘅地下區域，其中地上二樓係辦公室同露天平臺；地上一樓係站廳，有票務設施，客務中心同商舖、警務室、地鐵派出所同安檢設施；地下1樓係2號綫同3號綫之間嘅轉車樓同埋14號綫專用站廳；地下2樓雖然係2號綫同3號綫、14號綫嘅月台，但係2號綫同3號綫兩者同14號綫嘅月台之間唔相連。雖然車站冇休息室，但廁所有兩個，都喺嗮免費區入面，其中一間喺2號綫同3號綫嘅共用站廳西北角出面牆邊，另一間喺14號綫站廳免費區範圍嘅E出入口隔籬。母嬰室就喺車站B出入口嗰邊。

打掂

地上 二樓	地鐵派出所	辦公室、露天平臺
地上 一樓	共用站廳	售票機、客服中心、警務室、航班信息、安檢設施、地鐵派出所、廁所
地下 一樓	設備區	車站嘅設備
	23轉車樓	同2號綫、3號綫嘅兩邊月台連埋一齊
	14地下站廳	售票機、客服中心、安檢設施
地下 二樓
	6月台	14號綫終點月台
	島式月台，開左邊門
	5月台	14號綫列車去白雲東平站（慢）／新和站（快）（行東風站嗰邊） →
	3月台	← 3號綫列車去白雲大道北站（行海傍嗰邊）
	島式月台，開左邊門（3），開右邊門（2）
	2月台	← 2號綫列車去黃邊站（行廣州南站嗰邊）
	1月台	2號綫終點月台
	島式月台，開左邊門（3），開右邊門（2）
	4月台	3號綫列車去龍歸站（行機場北嗰邊） →

打橫

嘉禾望崗站嘅2號綫、3號綫共用站廳	嘉禾望崗站嘅2號綫、3號綫共用月台	柱上啲字（2同3）
嘉禾望崗站嘅14號綫站廳（地面）	嘉禾望崗站嘅14號綫月台	柱上啲字（14）

站廳

2號綫同3號綫嘅共用站廳（喺2014年11月6號影）

嘉禾望崗站係2號綫同3號綫、14號綫入面，唯一用咗地面站廳嘅車站，免費區有3個出入口畀唔同方向嘅乘客出入站。入面重有商舖、自助服務設施、售票機同埋客服中心。而站廳嘅收費區重有好多部專用𨋢同埋扶手電梯、樓梯嚟去到月台嗰邊。為咗方便啲去機場嘅乘客，站廳入面重整咗航班查詢嚟。

另外，雖然唔理係站廳定月台都係用咗橙一色嘅結構，但裝修風格唔同，其中2號綫同3號綫用嘅係焗漆結構，而14號綫用嘅係玻璃牆結構。

月台

呢個站有3個島式月台，都喺嶺南新世界花園西北邊嘅地底，其中2號綫同3號綫之間係跨月台轉車站，而14號綫係另一個單獨嘅島式月台結構嘅車站。

月台（2號綫終點嗰個，喺2014年11月6號影）

月台（14號綫終點嗰個，喺2018年12月28號影）

2號綫

由於2號綫嘅規劃工程已經全部結束，冇得再延長落去喇，所以呢個站嘅2號綫喺站後折返綫入面整咗特別設計：

• 車站前面：有條渡綫畀列車喺到站之前返轉頭
• 車站後面：下行路軌同上行路軌之間有條單渡綫畀列車喺到站之後返轉頭。

而下行路軌喺渡線嘅前面有條路軌分岔出嚟。其中一條係去嘉禾車輛段。而上行路軌就直接斷咗，佢嘅前面係車站設備區，冇得再延長落去。而2號綫嘅南邊終點站——廣州南站都係同佢差唔多噉整。

3號綫

3號綫去嘉禾車輛段嗰兩條出入軌道都接到入月台北邊嘅正綫，好多時高峰期結束之後，部份列車從機場北站出發，之後一直唔停站，嚟到呢個站3號月台停留一陣就返入嘉禾車輛段，期間月台有廣播提醒乘客唔畀上車。喺每日最後一班車到呢個站時，會直接揀4號月台畀冚唪唥乘客落車，之後直接入嘉禾車輛段。

14號綫

14號綫喺月台南邊都有條雙存車綫，北邊都有條波口位，兩條都係畀14號綫啲車返轉頭，不過佢多數揀雙存車綫。喺正綫南邊最盥位預留咗繼續向南嘅延長條件。另外，喺波口位西邊隔籬重有條支路軌同嘉禾車輛段相通。

商舖同自助服務

而家嘅嘉禾望崗站入面有好多唔同類嘅鋪頭畀乘客買嘢同埋食嘢，好似有便利檔、麵包檔同洗衫舖等。

另外，嘉禾望崗站入面重有自助服務設施畀乘客用，包括咗民生銀行嘅自動櫃員機、自動販賣機、自動影相機等；重有好易機嚟充羊城通，交水電費同交通嘅罰錢呢尐服務。

商舖 7-ELEVEN 美心西餅 天天洗衣 東海堂 bling繽刻

自助服務 自動影相機 自動販賣機 中國民生銀行自動櫃員機 好易（Hotye）多媒體自助服務終端

出入口

嘉禾望崗站冚唪唥嘅出入口
A出入口 A出入口  B出入口 B出入口  C出入口 C出入口  D出入口 D出入口  E出入口 E出入口  F出入口 F出入口  G出入口 G出入口  H出入口 H出入口

呢個站有A、B、C、D同埋E、F、G、H呢8個出入口。

冧巴	標記	方位	去到邊度
站廳（2號綫同3號綫）
出入口A	規劃七路	東	廣州市疾病預防控制中心、地鐵嘉禾望崗巴士總站、華英路（地鐵嘉禾望崗站）巴士站、雲門New Park
出入口B	望崗大道	東北	望崗大道、嘉禾望崗巴士站、嘉禾望崗巴士樞紐站
地面站廳（14號綫）
出入口C	望崗大道	北	空港大道
出入口D	望崗大道	西北	空港大道、嘉禾望崗巴士樞紐站（西行）
出入口E	華英路	西	空港大道
出入口F	華英路	中	空港大道
地底站廳（14號綫）
出入口G	華英路	西南	空港大道、地鐵嘉禾望崗站巴士站（東行）
出入口H	華英路	南	空港大道、地鐵嘉禾望崗站巴士站（西行）、華英路（地鐵嘉禾望崗站）巴士總站
註： 有盲人引導徑 | 出入口都喺同一層樓

頭尾班車信息同配線圖

配線圖（東邊）
▲　3龍歸站
	▶　2嘉禾車輛段
	▶　2嘉禾車輛段
	▶　3白雲大道北站
▼　2黃邊站

配線圖（西邊）
▲　14白雲東平站（慢／快）
嘉禾車輛段◀
▼　14終點

行去邊頭	頭班車	尾班車
每日
2號綫
廣州南站	06:00	23:15
3號綫
體育西路站	06:00	23:21
機場北站	06:00	23:32
14號綫
東風站	06:00	22:50
注意： 喺晚黑最後一班車開走之前嗰5分鐘之內， 係唔畀入閘坐車（包括埋買車飛）。

車站歷史

規劃

2號綫同3號綫

喺1997年嘅《廣州市城市快速軌道交通線網規劃研究（最終報告）》入面話咗，呢個站係2號綫嘅中途站。後嚟喺2000年嘅近期線網規劃調整方案入面，就將2號綫縮短到呢個站，而另外規劃咗一條新嘅機場快綫經過呢度，重將2號綫嘅北邊總站定咗喺而家呢個站嗰邊。而2003年嘅規劃方案入面，機場快綫改成係3號綫嘅一部份。而呢個站就設計成跨月台轉車站，重加入咗嗰時二八號綫延長段嘅工程入面。

14號綫

2008年，路線規劃用咗之前喺2003年放棄咗嘅新華綫東北橛規劃（太和⇆從化街口）重向西南延長到廣州火車站為止。後嚟為咗方便實施而分開咗一、二期，分界綫攞咗呢個站做界而演變成一期西南邊尾站，重喺2012年1月9號確定咗噉嘅計劃^[3]。

施工時期

2號綫同3號綫

喺2號綫方面，由於舊嘅白雲機場喺2004年就搬走咗，而白雲新城就喺2007年先至搞掂嗮。條綫嘅北延段經過政府批准，終於喺2008年正式開始逳手起。而3號綫方面就率先喺2007年5月14號開始逳手起，足足比2號綫早咗1年。而呢個站喺2010年9月份就封咗頂。

14號綫

2015年7月16號，嘉禾望崗站嘅14號綫站廳喺度起緊。而工地隔籬嘅圍蔽牆喺2018年12月10號當日拆咗。

• 2014年8月：車站開始逳手起。
• 2015年10月15號：呢個站到東平之間嘅中間風井西邊橛左綫盾構隧道正式開挖。
• 2015年11月15號：呢個站到東平之間嘅中間風井北邊橛右綫盾構隧道正式開挖。
• 2016年1月21號：呢個站到東平之間嘅中間風井北邊橛左綫盾構隧道正式開挖。
• 2016年3月17號：呢個站到東平之間嘅中間風井西邊橛右綫盾構隧道正式開挖。
• 2016年11月23號：呢個站到東平之間嘅中間風井北邊橛左綫盾構隧道順利貫通。
• 2017年3月30號：呢個站到東平之間嘅中間風井西邊橛右綫盾構隧道順利貫通。
• 2017年10月8號：呢個站到東平之間嘅中間風井北邊橛右綫盾構隧道順利貫通。
• 2017年11月6號：呢個站到東平之間嘅中間風井西邊橛左綫盾構隧道順利貫通。
• 2018年12月10號：因車站已經起好咗兼通過驗收，附近嘅施工圍蔽牆亦正式拆走。

點解呢個站名嗌「嘉禾望崗站」，唔嗌「嘉禾站」？

本嚟規劃嗰陣時係嗌「嘉禾站」嘅係因為呢個站喺嘉禾地區，但喺2008年11月3號，廣州市民政局發佈咗公告，由於呢個站喺嘉禾村同埋望崗村之間，為咗方便呢兩個村，所以就以呢兩個村嘅名合做「嘉禾望崗站」^[4]。

通車

原先C出入口喺14號綫施工期間封閉過。家下呢個位置已經變成14號綫站內一部份，C出入口亦向西北搬到空港大道邊。

2010年9月25號，呢個站嘅2號綫區域正式開放，3號綫喺時隔1個月05日（2010年10月30號）先至開，而14號綫喺2018年12月28號當日14:00（UTC+8）正式開埋。

出入口

呢個站喺開通初期，凈開咗A、B、C呢三個出入口。後嚟C出入口附近同周邊棟玻璃同焗漆牆喺2014年10月19號喐手起14號綫時封咗，重喺2018年初因為起14號綫站廳而拆埋。直到2018年12月28號，C出入口重新開放，不過位置改到第個地方兼換成玻璃牆結構；另外重整多咗D、E、F、G、H五個出入口。

利用狀況

由於呢個站附近嘅地區到而家為止都重未開發，所以呢個站啲乘客都係2號綫、3號綫、14號綫同埋出站轉巴士啲人。重有一小部分住喺嘉禾同望崗呢兩個村之間嘅人。

不過喺9號綫開通之後，每次早高峰時段，都出現一大堆喺9號綫嗰邊、同埋3號綫人和、龍歸兩站嘅大量客流落到廣州，由於佢南邊嘅總站——體育西路站凈得單綫站前返轉頭設計，所以凈維持喺4分半鐘一班，已經達到極限，所以呢個站喺2018年5月22號開始，凡係每個工作日早高峰時段都有客流控制^[5][6]。

尤其係14號綫一期主綫通車嘅第一日（2018年12月28號），因為有好多喺從化及378省道嘅九佛到新和一帶住啲村民嚟試下搭地鐵落廣州，當日晏晝到嗰年大除夕期間，呢個站亦實施咗客流控制，令14號綫到咗呢個站轉2號綫或3號綫啲客流，需要出去站廳嘅免費區同排隊出站轉車都有^[7][8]。客流量甚至激增到41.6萬人次，成為繼體育西路站同珠江新城站之後第三客流大嘅車站^[9][10]。喺2019年元旦假期後，雖然車站轉車秩序恢復正常，但每逢晚高峰同節假日期間有好多乘客喺呢個站轉車到白雲區東北邊到從化一帶^[11]。

雖然開通期間，由於21號綫亦有部份喺增城一帶啲街坊，唔知廣州市區嘅地理同快捷轉車方法，加上亦出現咗嘉鎮快車^{[註 1]}，試過往返搭地鐵嚟呢個站轉車，令車站客流一直居高不下。但係喺21號綫淨低嗰橛（員村⇄鎮龍西）喺2019年12月20號開通同嘉鎮快車^{[註 1]}永久停運之後，部份出入增城地區啲街坊已經唔再揀呢個站轉車，客流亦有明顯回落。

轉車須知

2號綫→3號綫

• 去廣州白雲國際機場或花都、106國道嘅龍歸或人和一帶：直接行過去對面月台等車，唔使上去站廳範圍。
• 去天河體育中心、珠江新城、番禺市橋、大石鎮、長隆水上樂園周邊或同和、廣州大道北一帶、天平架附近、永泰、白雲堡周邊：上去轉車緩衝樓，再行到對面另一邊樓梯落去。唔使上去站廳範圍。

3號綫→2號綫

• 從北向南行^{[註 2]}：直接行過去對面月台等車，唔好上去站廳範圍。
• 從南向北行^{[註 2]}：上去轉車緩衝樓，再行到對面另一邊樓梯落去^{[註 3]}。唔使上去站廳範圍。

2號綫／3號綫→14號綫

行樓梯或電梯、搭專用𨋢上去站廳，行去西邊有玻璃牆結構嘅站廳再落去兩層樓就到。

14號綫→2號綫／3號綫

14號綫→2號綫

行樓梯或電梯、搭專用𨋢上去站廳，先行去東邊有焗漆牆結構嘅站廳再喺西邊條樓梯行落兩層樓，行左邊就到。

14號綫→3號綫

行樓梯或電梯、搭專用𨋢上去站廳，行去東邊有焗漆牆結構嘅站廳，若果：

• 去廣州白雲國際機場或花都、106國道嘅龍歸或人和一帶：喺東邊條樓梯行落兩層樓，行左邊就到。
• 去天河體育中心、珠江新城、番禺市橋、大石鎮、長隆水上樂園周邊或同和、廣州大道北一帶、天平架附近、永泰、白雲堡周邊：喺西邊條樓梯落兩層樓，行右邊就到。

註同攷

註

1. 呢度講嘅「嘉鎮快車」係「嘉禾望崗⇄鎮龍」嘅快車，半佬淨停新和。
2. 呢度冚唪唥講嘅都係3號綫嘅行車方向。
3. 因為對面係尾站月台，凈畀落唔畀上，若果擅自上車嘅話，工作人員會第一時間趕你落車。除非你係地鐵工作人員或地鐵工程或搶修人員或地鐵值班司機或車站清潔工。

攷

1. 〈廣州亞運開幕前將開通6條地鐵線〉。新浪香港。{{cite news}}: CS1 maint: url-status (link)
2. 〈定了！广州地铁三条新线本周五开通〉。《新快报》。新浪。2018-12-26。
3. 〈通往从化增城地铁 争取今年底明年初动工〉。原著喺2012年1月9號歸檔。喺2018年4月4號搵到。
4. 广州日报 (2008-11-03)。〈广州市轨道交通三号线部分车站名称公示〉。原著喺2014-03-18歸檔。喺2014-09-02搵到。
5. 〈2018广州地铁嘉禾望岗站限流时间一览〉。原著喺2019年1月1號歸檔。喺2018年12月28號搵到。
6. 〈22日起地铁新增4站限流 嘉禾望岗站、人和站等在内〉。原著喺2018年12月3號歸檔。喺2018年12月28號搵到。
7. 从化居民好有仪式感! 不吃午饭也要赶坐头趟地铁新快报 2018年12月29日
8. 今天晚高峰的嘉禾望岗站……网友：堪称第二个体育西！ 互聯網檔案館嘅歸檔，歸檔日期2019年6月3號，.奥一网 2018年12月29日
9. 嘉禾望岗站客流未来或比肩体育西路站新快报 2018年12月31日
10. 今日广州地铁运营延长1.5小时 互聯網檔案館嘅歸檔，歸檔日期2018年12月31號，.广州日报 2018年12月31日
11. 你不知道的嘉禾望岗广州地铁官方微信公众号 2019年6月5日

上一站·下一站

上一站⇚⇚　　　　廣州地鐵　　　　⇛⇛下一站
黃邊站 廣州南站←	嘉禾望崗站 2號綫	終點
白雲大道北站 海傍站←	嘉禾望崗站 3號綫	龍歸站 →機場北站
終點	嘉禾望崗站 14號綫（慢綫）	白雲東平站 →東風站
	嘉禾望崗站 14號綫（快綫）	新和站 →東風站