安史之亂係唐朝中期發生嘅一場亂事，由胡族人安祿山（營州雜胡）同史思明喺天寶十四年（755年）所發動。話說當時唐朝皇帝唐玄宗因為越嚟越無能，安祿山同埋朝中一班大臣不和，安祿山決定兵變。安祿山本身擁有軍權，唔使花好耐時間就攻入首都長安。
呢次事件使到唐玄宗退位做太上皇。而之後唐朝花咗七年時間打，最後要等到史思明個仔史朝義自殺，事件先至得以平息。
安史之亂個背景係可以追溯到唐朝個地方制度。唐朝個地方制度，係容許地方掌握軍事權力，當中尤其係北方邊境。早喺唐太宗嗰陣，就多次派兵打突厥。打完之後為咗方便管治，就喺邊境設置十個兵鎮，長官係節度使。節度史權力好大，任何地方官都冇能力凌駕。於是乎一旦節度使作反，就變成咗唐朝內部個隱患。
喺唐玄宗嗰陣因為太平盛世，開始怠政，唔但只大權都落喺楊國忠手度，甚至重用啲外族人管治北方邊境，好似安祿山就係。安祿山因為同當時個宰相楊國忠不和，結果就喺河北，以聲討楊國忠做理由起兵。
公元755年十一月，安祿山動員自己部隊同外族援兵，一共15萬人，喺河北以聲討楊國忠做理由起兵作反。[1]
當時因為太平盛世咗好耐，老百姓唔多識啲打仗嘢，安祿山嘅叛軍由北方南下，河北啲地方長官一係投降，一係走佬，再唔係就係畀叛軍捉住同殺害。常山太守顏杲卿亦都侷住向安祿山投降。[1]雖然安祿山兼任埋河東節度使，不過喺佢作反之後，太原依然由唐朝控制住。
755年十二月，叛軍打敗咗封常清嘅唐軍，攻陷咗洛陽。唐軍退守潼關。同月，玄宗下令處死封常清同高仙芝。常山太守顏杲卿起兵反叛番安祿山，重新效忠番唐朝，又派人去河北其他地方叫佢哋效忠番唐朝，好多地方都響應佢，河北得番6個郡仲係聽安祿山話。[1]
756年正月，安祿山喺洛陽登基做皇帝，國號叫「大燕」，改元「聖武」。同月，叛軍攻陷常山，顏杲卿被俘，之後被殺。河北好多地方又重新畀叛軍控制番。[1]
二月，李光弼嘅唐軍收復番常山。之後郭子儀帶兵去幫佢，[1]佢哋喺五月響河北大破史思明嘅叛軍，叛軍陣亡4萬人，唐軍聲勢大振，河北好多地方又重新由唐朝控制番。[2]
之後，安祿山睇見自己後方河北好多地方都重新畀唐朝控制番，潼關又攻唔入，就打算放棄洛陽返番去范陽，但係未有決定。唐玄宗以為潼關以東嘅叛軍好弱，就催促守潼關嘅哥舒翰出兵攻打叛軍，哥舒翰唔贊成，但係玄宗命令冇得唔聽。756年六月，哥舒翰帶住18萬唐軍出關，結果畀叛軍打敗，潼關失守。玄宗就好倉卒咁逃離長安入四川。行到半路唐玄宗軍隊發生咗兵變，楊國忠畀啲士兵殺咗，跟住啲士兵要玄宗殺埋楊貴妃，玄宗唯有照佢哋意思做。之後唐玄宗入咗四川，太子李亨冇跟佢入四川，走咗去第度。安祿山嘅叛軍響潼關停留咗一陣，然後先去佔領長安。[2]
潼關失守之後，李光弼同郭子儀由河北退返去山西。[2]
756年七月，李亨到咗靈武，喺嗰度登基做唐朝皇帝，即係唐肅宗，尊玄宗做太上皇。[2]
756年九月，史思明嘅叛軍圍攻常山，之後攻陷咗。[2]756年十月，平原太守顏真卿放棄平原走佬。信都太守烏承恩帶住5萬唐軍向叛軍投降。[3]
757年正月，安祿山畀佢個仔安慶緒殺咗，之後安慶緒繼位做大燕皇帝。
757年二月，守太原嘅李光弼打敗咗蔡希德嘅叛軍，叛軍有成7萬幾人陣亡。[3]
757年九月，唐軍同回紇等外地援軍一共15萬人，由鳳翔出發，喺長安西面打敗10萬叛軍，叛軍起碼有6萬人陣亡，之後叛軍放棄長安走人。[4]
757年十月，叛軍攻陷睢陽，張巡被殺，許遠被送到洛陽，之後亦都被殺。唐軍好快就收復番睢陽。同月唐軍收復洛陽。[4]
758年六月，史思明揭發朝廷派嚟嘅烏承恩想對付佢，就殺咗烏承恩，朝廷賴係烏承恩自作主張。[4]
758年九月，唐軍集結20萬人以上嘅兵力，進攻安慶緒，之後安慶緒向史思明求救。758年十二月，史思明攻陷唐朝嘅魏州。[4]759年正月，史思明自稱「大聖燕王」。759年三月，史思明帶住5萬精兵同圍攻安慶緒嘅唐軍大戰，兩軍打緊嗰陣突然刮起大風，吹到天昏地暗，唐軍倉惶撤退，安慶緒嘅圍就咁解咗。之後史思明趁安慶緒嚟見佢嗰陣殺咗安慶緒，安慶緒嘅部隊同地盤都畀史思明接收咗。[5]
759年四月，史思明自稱大燕皇帝。九月，史思明攻佔洛陽。
761年三月，史思明畀佢個仔史朝義殺咗，之後史朝義繼位做大燕皇帝。[6]
762年，唐玄宗李隆基同唐肅宗李亨都相繼過身，唐代宗登基。唐代宗搵咗外族回紇派兵打史朝義。762年十月，唐軍同回紇兵進攻史朝義，叛軍大敗，叛軍死咗成6萬人，唐軍收復洛陽。史朝義退返去黃河以北，之後一路輸畀唐軍，加埋手下將領紛紛向唐朝投降，最終喺763年正月，史朝義畀唐朝追兵追到，走投無路之下自殺。[6]安史之亂就咁結束。
唐朝因為安史之亂由盛轉衰。尤其係雖然唐朝平定咗，之但係安祿山手下重有大批將領，係唐朝個威脅。唐朝無辦法消滅，就封佢哋做節度使。咁就造成咗藩鎮割據，一直到唐朝亡國。
安史之亂因為主要戰場喺北方，所以北方大受破壞，唔少北方人落到南方，經濟重心開始南移。而長安、洛陽本來係漢朝、唐朝個首都，但因為安史之亂，唔再適合做首都，最後關中一帶喺全國都開始冇晒地位。
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
