From Wikipedia, the free encyclopedia
安祿山(703年—757年1月),營州柳城(今日遼寧朝陽)人,胡族,策動安史之亂。
安祿山本身係喺大唐邊境地區生活。因為識六種語言,又熟悉當地,所以由742年計起,安祿山先後出任咗四個州郡嘅節度使,掌握咗今日河北一帶嘅軍政大權。當時奚族同契丹族不時攻過嚟,安祿山平定兩族有功,獲得唐玄宗重用。之後安祿山喺755年年尾發起「安史之亂」,仲喺756年攻佔唐朝首都長安,但係喺757年佢畀佢個仔安慶緒殺咗。
736年,身為平盧討擊使、左驍衛將軍嘅安祿山因為輕敵打輸仗,畀上司奏請拉去處斬,但係臨行刑嗰陣佢上司又決定暫時唔殺佢住,將佢交畀朝廷發落,之後唐玄宗就饒佢一命[1]。
742年,安祿山做平盧節度使[2]。
744年,安祿山兼任埋范陽節度使[2]。
750年,安祿山受封做東平郡王[3]。
751年,安祿山做埋河東節度使[3]。
大約754年嗰陣,當時楊國忠已經認定安祿山會作反,楊國忠同唐玄宗講,試下召安祿山嚟,佢一定唔嚟。但係安祿山就喺754年正月上朝,搞到玄宗更加信任安祿山。太子李亨亦都認為安祿山會作反,佢都有同唐玄宗講,但玄宗唔信[4]。
755年二月,安祿山請求以蕃人將領32人取代漢人將領,韋見素勸唐玄宗唔好批准,但係玄宗都係批准咗。755年六月,玄宗召安祿山嚟長安睇佢個仔安慶宗嘅婚禮,安祿山話有病唔嚟。七月,安祿山話將3千匹馬獻畀朝廷,而且仲派幾千人送啲馬嚟,河南尹達奚珣覺得唔對路,叫朝廷叫安祿山等到冬天先送馬,而且由朝廷派人運送,唔使出動佢啲部隊,之後玄宗亦開始對安祿山起疑[4]。
當時楊國忠掌權,安祿山同佢不和。結果安祿山決定喺755年十一月起兵作反。同年十二月攻佔洛陽。756年正月,安祿山自立為大燕皇帝,改元「聖武」[4]。唐軍本嚟可以守住潼關,再等其他軍隊進攻安祿山後方,但係響玄宗催促之下,潼關啲唐軍侷住喺756年六月出關攻打叛軍,結果慘敗,畀叛軍攻破潼關。唐玄宗危急之下,慌忙逃出京城,長安因此淪陷。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.