英國倫敦交通局旗下鐵路 From Wikipedia, the free encyclopedia
伊利沙伯綫（英文：Elizabeth line）係東西向穿越英國倫敦連接鄰近市鎮嘅鐵路服務，最遠去到東面嘅雅息士郡仙菲路同西面嘅柏郡雷丁，並連接希斯路機場。佢嘅定位係一條混合通勤鐵路同城市集體運輸模式嘅市域快綫，喺倫敦市區外用近郊鐵路模式營運，入到市區變成班次密同停站少嘅快速地鐵，去到城市另一邊用返近郊鐵路模式，官方表示呢條鐵路係英國前所未有嘅全新交通模式，近似巴黎嘅大區快綫同慕尼黑嘅城市快綫，並強調雖然佢叫做一條「綫」並穿越倫敦市區地底，但唔係一條倫敦地鐵路綫[2]。呢條鐵路以英女皇伊利沙伯二世命名[3]，並喺佢登基白金禧年（2022年）嘅5月24號首階段通車。
| 伊利沙伯綫 Elizabeth line | |
|---|---|
| |
 停喺修道院樹林車站嘅伊利沙伯綫列車（2022年5月） | |
| 概覽 | |
| 其他名 | 橫貫鐵路（Crossrail） |
| 擁有者 | 倫敦交通局 |
| 所在地 |  英國大倫敦、柏郡、白金漢郡、雅息士郡 |
| 起點 | 雷丁 希斯路四號客運大樓 希斯路五號客運大樓 |
| 終點 | 修道院樹林 仙菲路 |
| 站數 | 41 |
| 地圖上嘅顏色 | 紫 |
| 網站 | https://tfl.gov.uk/modes/elizabeth-line/ |
| 營運 | |
| 類型 | 市域快綫 通勤鐵路、城市集體運輸 |
| 路線號碼 | XR（國鐵） EL（倫敦交通局） |
| 營運者 | 港鐵伊利沙伯綫[1] |
| 車廠 | 舊橡共地、布林士德、耀福 |
| 車型 | 345型、315型 |
| 列車編組 | 345型：7／9卡 315型：4卡 |
| 歷史 | |
| 開通 | 倫敦交通局鐵路：2015年5月31號 伊利沙伯綫：2022年5月24號 |
| Last extension | 2022年11月6號 |
| 技術細節 | |
| 形態 | 大東本綫、大西本綫：地面 主綫、希斯路支綫：地底 |
| 軌距 | 1,435毫米（4英尺81⁄2英寸）標準軌 |
| 電氣化 | 25千伏50赫濕電（高架電纜） |
| 最高速度 | 橫貫鐵路主綫：時速60 mi（97 km） 大東本綫、大西本綫、希斯路支綫：時速90 mi（140 km） |
伊利沙伯綫屬英國國鐵網絡，係倫敦交通局旗下服務，並批出專營權畀港鐵子公司港鐵伊利沙伯綫（MTR Elizabeth line）營運。港鐵網站中文版亦都將呢條綫譯做「伊利莎伯綫」[4][5]。
呢條鐵路分為三個路段：
伊利沙伯綫服務將東西兩段舊有嘅國鐵路綫，經新起嘅中段橫貫鐵路連埋一齊。目前班次分做兩段運行，分別係來往雷丁／希斯路機場同修道院樹林嘅西—中段，以及來往柏靈頓同仙菲路嘅中—東段，兩者喺柏靈頓同白教堂之間嘅中段重疊。預計到最遲2023年五月，伊利沙伯綫全綫通車，會有直通三個路段來往希斯路機場同仙菲路嘅班次。
橫貫鐵路（Crossrail）係工程項目嘅名，內容包括喺倫敦市區起一條新嘅地底鐵路，連接大東同大西兩條倫敦對外嘅國鐵本綫，以及沿綫路綫同車站等配套嘅改善工程；亦係倫敦交通局為呢個工程開嘅全資附屬公司嘅名[6][7]。
倫敦交通局鐵路（TfL Rail）係呢條路綫嘅過渡牌頭，2015年5月31號接管大東本綫倫敦利物浦街同仙菲路之間由大英吉利營運嘅通勤鐵路服務嗰陣開始用；之後分別接管希斯路連綫，同大西本綫倫敦柏靈頓同雷丁之間部分慢車服務[8]；2022年5月24號，橫貫鐵路中段通車，同倫敦交通局鐵路一齊改用伊利沙伯綫名義服務。
早喺19世紀，攝政運河公司（Regents Canal Company）經已提出過起一條地面鐵路東西穿越倫敦市區，來往倫敦柏靈頓同倫敦港區，甚至自己改埋名做攝政運河鐵路公司（Regents Canal & Railway Company），期望獲准起呢條鐵路取代埋攝政運河本身。方案獲國會批准，但最後都冇實現[11]。
1941年，鐵路公司員工杜佐治喺報紙建議起一條連接柏靈頓同利物浦街、東西穿過倫敦嘅地下鐵路，同埋另一條南北貫穿倫敦嘅鐵路[12]。其後，城市規劃師柏德烈·亞拔甘比分別喺1943同1944年提出《倫敦郡計劃》同《大倫敦計劃》，建議二戰完咗之後重新規劃百廢待興嘅倫敦，將人口搬到倫敦外嘅衞星市鎮，亦提議起幾條新地鐵綫，包括一條東西橫貫市區嘅走綫[13]，但為咗應對戰後種種社會同經濟問題，橫貫嘅鐵路綫並冇落實[11]。
1974年，英國政府環境部同大倫敦議會提出《倫敦鐵路研究報告》，首次用到「橫貫鐵路」呢個名，建議其中一條路綫來往柏靈頓同利物浦街，同今日嘅走綫相近，並提出呢條鐵路嘅營運模式類似巴黎嘅大區快綫、以及漢堡同慕尼黑嘅城市快綫[11]。
1989年嘅《中倫敦鐵路研究》再提出東西橫貫鐵路在內嘅幾條跨倫敦鐵路連綫。1991年，倫敦地鐵同英鐵向國會提交私人草案，興建來往柏靈頓同利物浦街嘅地下鐵路，但喺1994年遭到拒絕[14]。
直到2001年，倫敦交通局同英國政府運輸部合資成立橫貫倫敦鐵路連綫（Cross London Rail Links）公司，研究橫貫鐵路同第二橫貫鐵路（主綫來往溫布頓同克尼，再向外延伸唔同支綫）方案[15]，並喺2003至2004年，就鐵路方案喺三十幾個地方舉辦超過五十日公開展覽[16]。
2005年，倫敦橫貫鐵路連綫公司喺提交橫貫鐵路嘅混合草案前，考慮喺柏靈頓以西同利物浦街以東各分兩條支綫，每條支綫每個鐘12班車，核心段總共去到每個鐘24班車[17]。
喺西段，倫敦橫貫鐵路連綫決定路綫分別會去美登赫（後尾延長去雷丁）同希斯路機場；而喺東面，就分別通去修道院樹林（由葉斯菲列縮短，以免同北根德綫重疊）同仙菲路。
2008年7月22號，授權建築工程嘅《2008年橫貫鐵路法令》獲女皇御准[18][19]。同年12月，倫敦交通局同英國運輸部宣布簽訂《橫貫鐵路贊助商協議》，佢哋會連同鐵路網公司、英國機場管理局（而家嘅希斯路機場控股公司）同倫敦市法團為項目提供資金，預計耗資159億英鎊。
2009年5月15號，橫貫鐵路工程隨住金絲雀碼頭車站地盤打樁而開始[20]。
2015年6月，鐵路隧道正式完成鑽挖工程[21]，路軌裝嵌亦喺2017年9月完成[22]，並計劃2017年至2018年冬天喺希斯路隧道測試歐洲火車控制系統（ETCS）訊號[23]。
喺原先計劃中段啓用四個月前嘅2018年8月底，橫貫鐵路公司宣布至少褪遲到2019年秋天先有機會通車[24]。經過多番延遲，到2020年8月先確認中段準備好喺2022年上半年通車[25]。
2021年5月列車開始試行。[26]
2022年5月17號，伊利沙伯綫由英女皇伊利沙伯二世正式揭幕啓用，慶祝佢登基白金禧年。佢本身冇計劃參與，但最後決定同細仔愛德華皇子一齊出席儀式[27]。同月24號，新起好嘅橫貫鐵路中段投入服務，同倫敦交通局鐵路原有嘅東西兩段一齊叫做伊利沙伯綫。
喺穿越倫敦市區嘅中段隧道通車前，市外嘅其他分支路段嘅服務由2015年5月開始，分幾階段陸續由國鐵營辦商轉交倫敦交通局，喺呢段期間直至伊利沙伯綫正式通車為止，以倫敦交通局鐵路嘅名義由2014年7月30號獲批專營權嘅港鐵（橫貫鐵路）公司（其後改名港鐵伊利沙伯綫）營運。參照2007年銀連服務轉交倫敦地上鐵嘅做法，倫敦交通局為日後嘅伊利沙伯綫買入全新345型列車、翻新車站同裝新嘅出入閘機、引入蠔咭同非接觸式付款、喺所有車站嘅服務時間內安排職員駐守，並將路綫本身用緊嘅列車換上倫敦交通局鐵路色認[28]。
2015年5月31號，倫敦交通局鐵路接手大東本綫倫敦利物浦街（地面本綫站）同仙菲路之間原先由大英吉利營運嘅通勤鐵路服務[29]。2017年6月22號，第一抽短版嘅七卡編成345型列車開始營運[30][31][32]，直到利物浦街站月台延長後，標準長度嘅九卡編成345型列車喺2021年5月26號先開始行呢段路綫[33]。
2018年5月20號，新開嘅倫敦交通局鐵路西段來往倫敦柏靈頓（地面本綫站）同希斯路四號客運大樓，沿途停站，取代希斯路連綫，同希斯路機場快綫來往希斯路二、三號同四號客運大樓之間嘅穿梭列車[34]，並喺21號取代大西本綫柏靈頓（地面本綫站）至希思哈靈頓原本由大西鐵路營運嘅近郊火車[35]；原定一齊喺呢段鐵路投入服務嘅345型列車，就延遲到2020年7月30號先開始運行[36]。而早喺2017年7月，希斯路機場經已宣布橫貫鐵路會喺2019年12月全綫通車嗰陣，開埋五號客運大樓支綫[37]，但因為工程延誤，結果喺橫貫鐵路中段仍未通車嘅2020年5月9號，機場四號客運大樓因應武漢肺炎疫情爆發而停用，倫敦交通局鐵路將原先來往希斯路四號客運大樓班次臨時改去五號客運大樓。呢個安排喺鐵路全綫通車前變成永久措施，2022年6月14號四號客運大樓重開之後，伊利沙伯綫希斯路段變成兩條分支服務。
2019年12月15號，柏靈頓（本綫站）來往雷丁嘅倫敦交通局鐵路列車開始試營運[38]，並喺2019年12月15號，倫敦交通局鐵路西段正式接手大部分大西本綫倫敦柏靈頓同雷丁之間原本由大西鐵路營運嘅慢車服務，最密一個鐘四班車[39]。
2022年5月24號，橫貫鐵路中段通車，來往柏靈頓（地底新站）同修道院樹林，同倫敦交通局鐵路原有嘅東西兩段服務一齊叫做伊利沙伯綫，但三段係分開各自運行，橫跨唔同路段嘅行程要喺柏靈頓或／同利物浦街各自嘅本綫車站同伊利沙伯綫新站之間出站轉車。
伊利沙伯綫中段喺通車初期，只係喺星期一至六（包括公眾假期）約上晝6點半至夜晚11點服務，一個鐘12班車、每五分鐘一班，逢星期日停駛嚟做下階段通車嘅準備工作，除咗喺英女皇伊利沙伯二世登基白金禧年紀念長假期中嘅6月5號同女皇駕崩國喪期中嘅9月18號兩個星期日提供特別服務[40][41]。9月5號，中段頭班車提早到上晝約5點半[42]。而位於市區嘅邦街站亦都趕唔切同其他中段車站一齊啓用，要到10月24號先開站[43]。
2022年11月6號，三個路段駁埋一齊，服務改為兩段運行，分別來往柏靈頓（地底新站）同仙菲路，以及來往雷丁／希斯路機場同修道院樹林，中段開始提供星期日服務，尾班車大約去到凌晨零時。兩段服務共用中段隧道，中段聯合班次達到每個鐘16至22班車。除咗少數沿用本綫車站嘅東段或西段特別班次，其他大部分班次會改用柏靈頓同利物浦街嘅地底伊利沙伯綫車站，代表搭跨段行程唔使再出站，而可以喺中段任何車站同月台轉車。因為新路綫嘅設計，東段嘅史察福站同中段嘅利物浦街站之間會停埋白教堂，而東段嘅本綫車站班次就唔會停呢個站[42][43][44][45]。
預計最遲2023年5月全綫通車，會提供直通三個路段來往希斯路機場同仙菲路嘅服務，柏靈頓至白教堂嘅中段達到每個鐘24班車[45]。
| 階段 | 路綫圖 | 實施日期 | 改動 | 完成 | |
|---|---|---|---|---|---|
| 計劃 | 實際 | ||||
| 0 |  |
2015年5月[46] | 2015年5月31號[29] | 利物浦街（本綫）至仙菲路嘅通勤鐵路服務，由大英吉利轉交倫敦交通局鐵路 |  |
| 1 | |
2017年5月[46] | 2017年6月22號[30][47] | 七卡編成嘅345型列車開始行走利物浦街（本綫）至仙菲路 | |
| 2a[48] |  |
2018年5月[46] | 2018年5月20號[34] | 倫敦交通局鐵路取代以下鐵路服務[35]： 希斯路連綫：柏靈頓（本綫）至希斯路四號客運大樓嘅慢車 希斯路機場快綫：希斯路二、三號至四號客運大樓嘅穿梭車 大西鐵路：柏靈頓（本綫）至希思哈靈頓嘅近郊服務（5月21號） |
|
| 5a[49] |  |
— | 2019年12月15號[39] | 大部分柏靈頓（本綫）至雷丁嘅慢車服務，由大西鐵路轉交倫敦交通局鐵路營運 | |
| 2b[48] | |
2018年5月[46] | 2020年7月30號[36] | 345型列車開始行走柏靈頓（本綫）至希斯路機場 | |
| 4a[50] | |
— | 2021年5月26號[33] | 標準九卡編成嘅345型列車開始行走利物浦街（本綫）至仙菲路 | |
| 3 |  |
2018年12月[46] | 2022年5月24號[51] | 柏靈頓（地底）至修道院樹林一段投入服務，同倫敦交通局鐵路一齊改名伊利沙伯綫，分為三段各自運行 | |
| 4b/5b |  |
— | 2022年11月6號[42][44] | 服務改為兩段運行，分別來往柏靈頓（地底）同仙菲路；以及來往雷丁／希斯路機場同修道院樹林，共用中段隧道 | |
| 5c | |
2019年12月[46] | 預計2023年5月[45] | 全綫通車，加入直通東至西段嘅班次 |  |
伊利沙伯綫係為致敬英女皇伊利沙伯二世而以佢命名，2016年2月23號由伊利沙伯二世親自揭曉路綫標誌同新名[3]。路綫原先預計喺2018至2019年間分階段通車，但經歷多次延遲，最後啱啱趕喺伊利沙伯二世登基白金禧年紀念假期之前嘅2022年5月24號第一階段通車。
伊利沙伯綫嘅代表色係紫色，標誌同倫敦交通局其他服務一樣，外形係圓形局徽，圓圈係路綫代表色，中間嘅橫綫用藍底白字標示「Elizabeth line」，比起地鐵路綫標誌多咗個「line」字。
伊利沙伯綫分為三段，全長超過100公里（62英里）[52]，其中東西兩段係國鐵網絡固有嘅部分：
東段喺史察福站以西，經布甸磨坊里入口（Pudding Mill Lane Portal）落隧道，喺白教堂同金絲雀碼頭之間嘅斯塔利園交叉（Stepney Green Junction）接駁核心段；而西段就喺舊橡共地以東嘅皇家橡入口（Royal Oak Portal）落隧道，通去地底柏靈頓車站。伊利沙伯綫通車早期三段係分開各自運行，直到2022年11月6號起，東西兩段班次先分別駛入隧道同中段直通運行；預計最遲2023年5月全綫通車，會加入直通三段嘅班次，將倫敦兩條去唔同方向嘅對外本綫經核心段隧道連埋一齊。
一般車站預設由西至東排序。
| 收費區[lower-alpha 1] | [lower-alpha 2]
|
站名 | 轉綫 | 相 | 分支 | 開始服務日[lower-alpha 3] | 註 | 所在區份 | |
|---|---|---|---|---|---|---|---|---|---|
| —[lower-alpha 4] | ⍻ | 雷丁 Reading |
 |
 |
雷丁 | 2019年12月15號 | 總站 由鐵路網營運 |
柏莎郡 | 雷丁 |
| ⍻ | 迪懷福 Twyford |
|
 |
雷丁 | 2019年12月15號 | 由大西鐵路營運 | 禾京咸 | ||
| ⍻ | 美登赫 Maidenhead |
|
 |
雷丁 | 2019年12月15號 | 部分班次西面總站 由大西鐵路營運 |
溫莎美登赫 | ||
| ⍻ | 塔勞 Taplow |
 |
雷丁 | 2019年12月15號 | 白金漢郡 | 南白 | |||
| ⍻ | 賓咸 Burnham |
 |
雷丁 | 2019年12月15號 | 柏郡 | 斯勞 | |||
| ⍻ | 斯勞 Slough |
|
 |
雷丁 | 2019年12月15號 | 由大西鐵路營運 | |||
| ⍻ | 朗利 Langley |
 |
雷丁 | 2019年12月15號 | |||||
| ⍻ | 埃華 Iver |
 |
雷丁 | 2019年12月15號 | 白金漢郡 | 南白 | |||
| 6 | ⍻ | 西追頓 West Drayton |
|
 |
雷丁 | 2019年12月15號 | 大倫敦 | 曉靈頓 | |
| 6[lower-alpha 5] | ✓ | 希斯路五號客運大樓  Heathrow Terminal 5 |
 |
.jpg) |
希斯路 | 2020年5月9號 | 總站 由希斯路機場快綫營運 |
大倫敦 | 曉靈頓 |
| ✓ | 希斯路四號客運大樓 Heathrow Terminal 4 |
|
 |
希斯路 | 2018年5月20號 | ||||
| ✓ | 希斯路二、三號客運大樓 Heathrow Terminals 2 & 3 |
|
 |
希斯路 | 2018年5月20號 | 又名希斯路中（Heathrow Central） 由希斯路機場快綫營運 | |||
| 5 | ⍻ | 希思哈靈頓 Hayes & Harlington |
|
 |
雷丁、 希斯路 |
2018年5月20號 | 大倫敦 | 曉靈頓 | |
| 4 | ⍻ | 修夫荷 Southall ਸਾਊਥਾਲ |
|
 |
雷丁、 希斯路 |
2018年5月20號 | 有古木基頻渣別文站名標示 | 伊靈 | |
| 4 | ⍻ | 漢威路 Hanwell |
 |
希斯路 | 2018年5月20號 | ||||
| 3 | ⍻ | 西伊靈 West Ealing |
|
 |
希斯路 | 2018年5月20號 | |||
| 3 | ⍻ | 伊靈大馬路 Ealing Broadway |
  |
.jpg) |
雷丁、 希斯路 |
2018年5月20號 | |||
| 3 | ⍻ | 本綫厄頓 Acton Main Line |
 |
希斯路 | 2018年5月20號 | ||||
 |
暫缺 | 預計2026年 | 起緊 | 咸默史密夫富咸 | |||||
| 1 | ✓ | 柏靈頓 Paddington |
   |
 |
主綫 | 2022年5月24號 | 仙菲路班次西面總站 | 西敏市 | |
| 1 | ✓ | 邦街 Bond Street |
 |
 |
主綫 | 2022年10月24號 | |||
| 1 | ✓ | 托定咸府道 Tottenham Court Road |
 |
 |
主綫 | 2022年5月24號 | 甘頓 | ||
| 1 | ✓ | 法靈頓 Farringdon |
  |
 |
主綫 | 2022年5月24號 | 伊士靈頓 | ||
| 1 | ✓ | 利物浦街 Liverpool Street |
|
 |
主綫 | 2022年5月24號 | 倫敦市 | ||
| 2 | ✓ | 白教堂 Whitechapel হোয়াইটচ্যাপেল |
|
 |
主綫 | 2022年5月24號 |  來往東、西段建議轉車站有孟加拉文站名標示 |
塔村 | |
| 2 | ✓ | 金絲雀碼頭 Canary Wharf |
  |
 |
修道院樹林 | 2022年5月24號 | |||
| 3 | ✓ | 海關大樓 Custom House |
|
 |
修道院樹林 | 2022年5月24號 | 紐咸 | ||
| 4 | ✓ | 胡列治 Woolwich |
|
 |
修道院樹林 | 2022年5月24號 | 格林威治 | ||
| 4 | ⍻ | 修道院樹林 Abbey Wood |
|
 |
修道院樹林 | 2022年5月24號 | 總站 | 格林威治、 碧斯利 | |
| 2／3 | ⍻ | 史察福 Stratford |
|
 |
仙菲路 | 2015年5月31號 | 又名史察福（倫敦）（Stratford (London)） | 大倫敦 | 紐咸 |
| 3 | ⍻ | 馬利蘭 Maryland |
 |
仙菲路 | 2015年5月31號 | ||||
| 3 | ⍻ | 森林門 Forest Gate |
|
 |
仙菲路 | 2015年5月31號 | |||
| 3／4 | ⍻ | 莊園公園 Manor Park |
|
 |
仙菲路 | 2015年5月31號 | |||
| 4 | ⍻ | 耀福 Ilford |
 |
仙菲路 | 2015年5月31號 | 紅橋 | |||
| 4 | ⍻ | 七王 Seven Kings |
.jpg) |
仙菲路 | 2015年5月31號 | ||||
| 4 | ⍻ | 吉美 Goodmayes |
 |
仙菲路 | 2015年5月31號 | ||||
| 5 | ⍻ | 漆威路荒原 Chadwell Heath |
.jpg) |
仙菲路 | 2015年5月31號 | ||||
| 6 | ⍻ | 龍福 Romford |
|
 |
仙菲路 | 2015年5月31號 | 希華靈 | ||
| 6 | ⍻ | 基地亞公園 Gidea Park |
 |
仙菲路 | 2015年5月31號 | ||||
| 6 | ⍻ | 哈羅德活 Harold Wood |
 |
仙菲路 | 2015年5月31號 | ||||
| 9 | ⍻ | 賓活 Brentwood |
 |
仙菲路 | 2015年5月31號 | 雅息士郡 | 賓活 | ||
| 12[lower-alpha 6] | ⍻ | 仙菲路 Shenfield |
|
 |
仙菲路 | 2015年5月31號 | 總站 由大英吉利營運 | ||
| 1 | ⍻ | 柏靈頓 （高層／本綫／國鐵車站） Paddington (Upper Level or main line or National Rail station) |
|
 |
雷丁、希斯路 | 2018年5月20號 | 衹限部分清晨或深夜班次停靠同做總站 又名倫敦柏靈頓（London Paddington） 由鐵路網營運 |
大倫敦 | 西敏市 |
| 1 | ⍻ | 利物浦街 （高層／本綫／國鐵車站） Liverpool Street (Upper Level or main line or National Rail station) |
|
 |
仙菲路 | 2015年5月31號 | 衹限部分清晨、深夜或繁忙時間班次停靠同做總站 又名倫敦利物浦街（London Liverpool Street） 由鐵路網營運 |
大倫敦 | 倫敦市 |
倫敦交通局專門買咗70抽九卡345型Aventra列車行伊利沙伯綫[55][56]，車長200米（660英尺），載客量1500[55]，部分路段可以行到時速140公里（87英里）[57]。呢款係有專用輪椅位嘅無障礙列車，亦有報站螢幕、廣播系統、閉路電視系統同聯絡司機嘅緊急通話器[58]。
經過三年招標，2014年2月6號，加拿大龐巴迪公司投到呢份價值一億英鎊嘅合約，為伊利沙伯綫生產66抽列車[59][60]，後尾加到70抽[61]。而龐巴迪喺2021年俾棄標新車合約嘅製造商阿斯通收購。
2017年6月22號，第一抽345型列車喺利物浦街同仙菲路之間投入服務嗰陣係七卡編成，因為當時利物浦街車站月台唔夠長，要完成延長月台工程先開始用九卡列車[31][62][32]。
另外有八抽1980至1981年製造嘅315型列車，平日繁忙時間仍然會喺利物浦街至仙菲路運行，直至所有345型列車由七卡加到九卡[63]。
伊利沙伯綫列車以25千伏50赫濕電驅動，由高架電纜供電，同大東以及大西本綫本身配置一樣。
2020年起，希斯路支綫開始用歐洲火車控制系統（ETCS）；大東同大西本綫段用列車自動警告系統（AWS）同列車保護警告系統（TPWS），未來可以升級做ETCS。而中段橫貫鐵路就用通訊為本列車控制技術（CBTC）[66][67][68]。
2022年5月24號起嘅通車早期，伊利沙伯綫分做三段各自運行，西段來往雷丁／希斯路機場同柏靈頓（本綫車站），中段來往柏靈頓（伊利沙伯綫站）同修道院樹林，東段來往利物浦街（本綫車站）同仙菲路；其中西段來往雷丁支綫嘅班次會喺大倫敦範圍飛部分站，而東段、中段同西段來往希斯路機場嘅班次就站站停。跨段行程要喺利物浦街或／同柏靈頓嘅地面本綫車站同伊利沙伯綫地底站之間出站轉車。由2022年6月14號希斯路機場四號客運大樓重開起，平日非繁忙時間嘅班次如下：
| 伊利沙伯綫首階段通車班次 | ||
|---|---|---|
| 雷丁／希斯路機場來往柏靈頓（西段） | ||
| 走綫 | tph | 中途站 |
| 雷丁來往柏靈頓（本綫） | 2 | 迪懷福、美登赫、塔勞、賓咸、斯勞、朗利、埃華、西追頓、希思哈靈頓、修夫荷、伊靈大馬路 |
| 希斯路四號客運大樓來往柏靈頓（本綫） | 2 | 希斯路二三號客運大樓、希思哈靈頓、修夫荷、漢威路、西伊靈、伊靈大馬路、本綫厄頓 |
| 希斯路五號客運大樓來往柏靈頓（本綫） | 2 | 希斯路二三號客運大樓、希思哈靈頓、修夫荷、漢威路、西伊靈、伊靈大馬路、本綫厄頓 |
| 柏靈頓來往修道院樹林（中段） | ||
| 走綫 | tph | 中途站 |
| 柏靈頓（伊利沙伯綫）來往修道院樹林 | 12 | 邦街＊、托定咸府道、法靈頓、利物浦街（伊利沙伯綫）、白教堂、金絲雀碼頭、海關大樓、胡列治 ＊ 邦街喺2022年10月24號用。 |
| 利物浦街來往仙菲路（東段） | ||
| 走綫 | tph | 中途站 |
| 利物浦街（本綫）來往仙菲路 | 8 | 史察福、馬利蘭、森林門、莊園公園、耀福、七王、吉美、漆威路荒原、龍福、基地亞公園、哈羅德活、賓活 |
2022年11月6號次階段通車起，伊利沙伯綫以西—中路段同中—東路段分成兩段運行，分別係雷丁／希斯路機場（經柏靈頓）來往修道院樹林，以及柏靈頓（經白教堂）來往仙菲路。兩個營運段喺柏靈頓至白教堂嘅中央核心段重疊運行，來往東、西兩段嘅搭客可以喺核心段任何一個站同月台轉車，非繁忙時間班次由原先嘅每個鐘12班車加到16班，提供平均少過四分鐘一班嘅聯合班次，而繁忙時間就加到每個鐘22班車；但因為中—東段班次唔經白教堂至修道院樹林段，呢段就由每個鐘12班車減到八班。西段亦新加兩班來往美登赫嘅短途車，雷丁同美登赫班次各自喺西段部分中途站飛站。
大部分班次唔再駛入柏靈頓同利物浦街本綫車站，得返繁忙時間（衹限利物浦街來往基地亞公園嘅短途班次）、清晨同深夜少量唔入中段嘅班次繼續用本綫車站做總站，而唔經伊利沙伯綫地底站穿越倫敦市區。利物浦街本綫車站同史察福之間要經原有地面本綫段，呢啲特別班次唔停白教堂站。
伊利沙伯綫平日非繁忙時間嘅班次如下[71]：
| 雷丁／希斯路機場來往修道院樹林（西—中段） | ||
|---|---|---|
| 走綫 | tph | 中途站 |
| 雷丁來往修道院樹林 | 2 | 迪懷福、美登赫、塔勞、賓咸、斯勞、朗利、西追頓、希思哈靈頓、修夫荷、伊靈大馬路、柏靈頓、邦街、托定咸府道、法靈頓、利物浦街、白教堂、金絲雀碼頭、海關大樓、胡列治 |
| 美登赫來往修道院樹林 | 2 | 賓咸、斯勞、朗利、埃華、西追頓、希思哈靈頓、修夫荷、伊靈大馬路、柏靈頓、邦街、托定咸府道、法靈頓、利物浦街、白教堂、金絲雀碼頭、海關大樓、胡列治 |
| 希斯路四號客運大樓來往修道院樹林 | 2 | 希斯路二三號客運大樓、希思哈靈頓、修夫荷、漢威路、西伊靈、伊靈大馬路、本綫厄頓、柏靈頓、邦街、托定咸府道、法靈頓、利物浦街、白教堂、金絲雀碼頭、海關大樓、胡列治 |
| 希斯路五號客運大樓來往修道院樹林 | 2 | |
| 柏靈頓來往仙菲路（中—東段） | ||
| 走綫 | tph | 中途站 |
| 柏靈頓來往仙菲路 | 8 | 邦街、托定咸府道、法靈頓、利物浦街、白教堂、史察福、馬利蘭、森林門、莊園公園、耀福、七王、吉美、漆威路荒原、龍福、基地亞公園、哈羅德活、賓活 |
預計最遲2023年五月全綫通車後，伊利沙伯綫目前來往仙菲路同柏靈頓嘅東—中段班次可以延長到西段，直達希斯路機場；柏靈頓至白教堂嘅中央核心段班次喺繁忙時間可以達到每個方向每個鐘24班車、平均兩分半鐘一班，非繁忙時間每個鐘20班車[72]。
長遠而言，舊橡共地車站啓用後，所有經過嘅列車都會停站，部分班次亦會喺呢度做西面總站[73]。
| 路段 | 有伊利沙伯綫之前需時 | 伊利沙伯綫需時 |
|---|---|---|
| 柏靈頓至托定咸府道 | 20 | 4 |
| 柏靈頓至金絲雀碼頭 | 34 | 17 |
| 邦街至柏靈頓 | 15 | 3 |
| 邦街至白教堂 | 24 | 10 |
| 金絲雀碼頭至利物浦街 | 21 | 6 |
| 金絲雀碼頭至希斯路機場 | 55 | 39 |
| 白教堂至金絲雀碼頭 | 13 | 3 |
| 修道院樹林至希斯路機場 | 93 | 52 |
票價同其他倫敦交通局嘅鐵路服務（如倫敦地下鐵）一樣採用倫敦鐵路收費區系統，但西追頓（第六收費區邊界）打後去到雷丁之間嘅一段唔能夠用蠔咭，而只可以用非接觸式付款畀「按程收費」（pay as you go）車費[75]。
希斯路機場各個車站位處第六收費區，但由於希斯路支綫由希斯路機場控股公司所有，唔屬於國家鐵路網嘅一部分，倫敦交通局每班車行經都要畀路費，所以來往機場嘅收費貴過正常嘅第六區車費。不過來往希斯路機場嘅車程同一般第六收費區車站一樣，計落第六區嘅季票同每日／每周車費上限[76]。另外由2022年9月4號，行經第一區並來往希斯路機場嘅行程，無論任何時間都會收貴啲嘅繁忙時間車費[77]。
喺武漢肺炎大流行前，伊利沙伯綫預期可以提供兩億人次年承載量[78]，全綫通車後可以令中倫敦嘅鐵路載客量加多一成，紓緩市區地鐵逼夾，尤其係中央綫[52]。法靈頓係倫敦地下鐵、橫貫嘅伊利沙伯綫同縱貫嘅泰晤士連綫嘅重要轉車站，因而估計會變成全英國數一數二繁忙嘅車站[79]。倫敦交通局喺2020年1月嘅營商計劃估計路綫喺通車第一年嘅2022/23年度收入近五億英鎊，到2024/25年度歲入超過10億鎊[78]。但隨住疫情令搭客改變搭車習慣，倫敦交通局喺路綫通車嘅時候調低估算去到2026年會有一億三千萬至一億七千萬人次年載客量[80]。
由通車嘅2022年5月去到同年9月，伊利沙伯綫全綫累積載客量超過四千五百萬人次，其中約半數（二千二百萬）行經中段（柏靈頓至修道院樹林）[43]；而中段單日最高客量係9月29號嘅29萬人次[81]。
配合來往倫敦優斯頓同伯明翰嘅二號高速鐵路第一階段工程，舊橡共地機務段原址起緊一個大型轉車站舊橡共地。呢個站共有14個月台（6個高鐵月台同8個本綫月台），大西本綫上嘅伊利沙伯綫同大西鐵路會喺度停站，畀搭客同二號高鐵互相轉車，預期2026年同二號高鐵一齊啓用，並且帶動西倫敦市區重建[82]。
銀城車站係北倫敦綫史察福至北胡列治段嘅車站，近倫敦城市機場，呢段鐵路連同銀城車站喺2006年停用並荒廢。橫貫鐵路拆卸重建部分路段，變成伊利沙伯綫一部分，並有計劃過重建銀城車站[83]，但最後冇做到。到2019年，倫敦交通局表示考慮喺伊利沙伯綫嘅葉斯菲列延綫計劃，包含連接倫敦城市機場嘅新站[84]。
喺向國會提交草案前嘅研究，曾經建議東南段路綫去到修道院樹林之後，沿北根德綫去到根德郡嘅葉斯菲列[85][86]，但考慮到成本而冇納入最後方案[87]。雖然係咁，但政府同倫敦市長之後都有撥款畀倫敦交通局研究葉斯菲列延綫方案，甚至計劃延伸到基夫斯安[87][88][89]。
另外重有其他延伸計劃，但經已擱置或者冇得到有關當局回應：
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
