江西

27°29′19.6″N 115°27′46.4″E

中華人民共和國 > 華東地區 > 江西省

  想搵第二個意思嘅話，請睇江西 (搞清楚)。

江西省 江西省
簡稱：贛 地名出處：733年唐玄宗設江南西道[1]
南昌滕王閣
省城	南昌
最大城市	{{{最大城市}}}
省委書記	強衞
人大常委會主任	{{{人大常委會主任}}}
省長	鹿心社
政協主席	{{{政協主席}}}
面積 - 總面積 - 佔全國	第17[2]位 16.69萬 km²[1] 1.74[2]%
人口（2013） - 總人口 - 佔全國 - 人口密度	第13[2]位 4522萬1500人[3] 1.74[2]% 251[2]人/km²（第18位）
- 民族	漢族 - 99.7%[2] 畬族 - 0.2%[2]
- 本地語言	贛語 客家話 江淮官話 吳語 徽語 西南官話
GDP（2013） - 總值 - 佔全國 - 人均GDP - HDI（2008）	第19[2]位 14338.5億元[4]人民幣 2.46[2]% 31771[4]元人民幣（第24位） 0.760[2]（第25位） ── 高
轄下 - 地級 - 縣級	11個地級市[1] 100個縣級政區[1]
ISO 3166-2	CN-36
時區	UTC+8
網站	江西省人民政府

江西（粵拼：gong1 sai1；普通話拼音：Jiāngxī；贛語白話字：Kongsi；客家白話字：Kông-sî），簡稱贛gam3（讀禁），喺中國中南部，佢家下係中華人民共和國一省，叫江西省。佢喺長江中下游南岸，省會係南昌。

江西以北係安徽省，以東北係浙江，以東係福建，以南係廣東，以西係湖南，以西北係湖北。

史

江西個江，係指長江。大唐時設江南西道，所以嗌「江西」。而佢嘅簡稱「贛」出自江西最大嘅河贛江^[1]。

春秋戰國時江西地方主要係楚國嘅地頭。而江西最早嘅政區建置，係漢朝初年時（約前202年），設豫章郡，郡名出自贛江當時嘅名「豫章江」，郡治南昌，轄18縣^{[註 1]}，當時個郡嘅範圍就已經同而家嘅江西差唔多^[5]。漢武帝時豫章郡劃屬楊州^{[註 2]}。

西晉元康元年（291年），豫章郡改屬江州。到隋朝時州嘅地位降到等同郡，於是江西喺隋代變成7郡24縣。唐代時變成8州37縣^{[註 3]}，唐太宗劃中國爲10道，唐玄宗加設成15道，江西全境屬江南西道^[5]。

五代十國時，江西屬過楊吳，之後屬南唐，呢時江西劃爲6州4軍55縣。交泰元年，南唐試過由金陵遷都洪州，洪州即係家下嘅南昌地方，當時因爲係南都昇爲南昌府。宋代時改道爲路，當時江西劃爲9州4軍68縣，其中大部份屬江南西路，少部分屬江南東路^[5]。

元朝時設立江西等處行中書省，簡稱江西行省，不過嗰陣時江西行省嘅面積大過而家江西省好多，除咗管轄而家江西，重包埋而家廣東大部份^{[註 4]}，而行省之下劃爲13路、2直隸州，之下再劃爲48縣、16州（同縣平級）^{[註 5][5]}。

明清兩代沿襲咗行省嘅省置，不過範圍縮細咗，基本定咗今日江西嘅省域。明代時江西省嘅正式名叫江西布政使司，但習慣上叫省，而元代設嘅路改爲府，州改爲縣，當時江西轄13府，下劃爲78縣^{[註 6][5]}。明代時景德鎮陶瓷生產興旺，以至出口到外國。

清代時江西嘅正式名叫江西省，基本上沿襲明朝規制。不過增設三個縣級廳，以及有一個省直隸州^{[註 7][5]}。

中華民國時，府、州、廳一律改成縣，當時江西轄81縣。1926年北伐軍入南昌，南昌正式設市。1934年時，婺源從安徽劃畀江西，1947年劃返安徽，1949年又畀返江西。民國時期，江西南部山區係毛澤東等人帶住班紅軍盤據嘅蘇區，叫做「井岡山革命根據地」，成立咗中華蘇維埃共和國，個臨時政府駐瑞金。當時國民黨攻勢好猛，圍剿中共盤踞嘅蘇區，於是共產黨從瑞金出發去延安，即係長征。除咗井岡山，重有湘贛、贛東北、湘鄂呢三笪蘇區涉及到江西^[5]。

地理

江西位於華中^{[註 8]}，係內陸地區，北面係湖北、安徽，東面係浙江、福建，南面係廣東，西面係湖南。江西北面係長江南岸，嗰度有中國最大嘅淡水湖鄱陽湖。江西南面係山區，嗰度有中國共產黨史上有名嘅井岡山。

江西嘅地形就好似個向鄱陽湖傾斜嘅大盆地，北部比較平，東西南三面都係山，中部有丘陵^[1]。江西有大細各條河流2400幾條，其中江西五大江河係：贛江、撫河、信江、修水、饒河^[1]。由於江西喺北回歸綫附近，屬亞熱帶濕潤氣候，所以氣候温和，雨量充沛，年降水量1341 mm到1940 mm，無霜期長^[1]。

江西嘅位置係中國東南嘅十字路口，自古稱做「吳頭楚尾，粵戶閩庭」，叫做「形勝之區」^[1]，向東可以去吳越，向西可以去荊湘，向南可以入粵閩，向北通到江北，所以係珠三角、長三角、閩南三地嘅交滙點，同上海、廣州、廈門、南京、武漢、長沙、合肥呢啲重要城市嘅直綫距離大多喺六百到七百公里內^[1]。所以交通方便，陸路上跨省主要公路全部高速化，省內嘅高速路里程達3088公里，鐵路上有京九綫、浙贛綫穿過，亦有航空、水運^[1]。

經濟

農業上主要作物係水稻，而經濟作物有油菜、棉花。江西礦產豐富，銅、鎢、金、銀、鈾、釷、鉭、銫、鉈、鈧、伴生硫、溶劑白雲岩嘅埋藏量排中國首位，其中銅、鎢、鈾釷、鉭鈮、稀土譽爲江西嘅「五朵金花」^[6]。德興嘅銅礦同大庾嘅鎢礦都好有名，德興嘅斑巖銅礦佔全省銅礦儲量67.7%，而大庾號稱「世界鎢都」。

雖然係噉，江西省同週邊啲省比落就顯得窮，尤其係同隔籬嘅廣東、福建、浙江呢啲沿海發達省比。而江西本身第一產業發達，江西嘅農業喺全國好緊要，喺大陸從未間斷貢獻糧食畀全國嘅省有兩個，江西係之一^[1]。江西嘅經濟、技術中心喺南昌。

政區

江西轄11個地級市，再下轄20個市轄區、70個縣、10個縣級市。下面份表列出咗啲地級市。

江西省政區	#	名	政府駐地	粵拼	人口（2010）
	地級市
	1	南昌市	東湖區	naam4 coeng1 si5	504萬2565
	2	撫州市	臨川區	fu2 zau1 si5	391萬2312
	3	贛州市	章貢區	gam3 zau1 si5	836萬8440
	4	吉安市	吉州區	gat1 on1 si5	481萬340
	5	景德鎮市	昌江區	ging2 dak1 zan3 si5	158萬7477
	6	九江市	潯陽區	gau2 gong1 si5	472萬8763
	7	萍鄉市	安源區	ping4 hoeng1 si5	185萬4510
	8	上饒市	信州區	soeng6 jiu4 si5	657萬9714
	9	新喻市	渝水區	san1 jyu6 si5	113萬8873
	10	宜春市	袁州區	ji4 ceon1 si5	541萬9575
	11	鷹潭市	月湖區	jing1 taam4 si5	112萬4906

註

1. 呢18縣分別係南昌、廬陵、彭澤、鄱陽、餘汗、柴桑、贛、新淦、南城、宜春、雩都、艾、安平、海昏、歷陵、建成。分佈喺贛江、盱江、信江、修水、袁水嘅沿岸。
2. 漢武帝時劃天下爲十三部州，呢度係楊州，唐代時因爲偏旁混用，變成揚州^[5]。
3. 呢8州分別係洪州、饒州、虔州、吉州、江州、袁州、撫州、信州。
4. 除咗而家江西東北部當時屬江浙行省。
5. 呢13路分別係龍興、吉安、南康、贛州、建昌、江州、南安、瑞州、袁州、臨江、撫州、饒州、信州。兩個直隸州分別係南豐、鉛山。
6. 呢13府分別係南昌、瑞州、饒州、南康、九江、廣信、撫州、建昌、吉安、袁州、臨江、贛州、南安。
7. 三個縣級廳分別係吉安府嘅蓮花廳、南昌府嘅銅鼓廳、贛州府嘅虔南廳。直隸州係指原先嘅寧都縣昇爲寧都州。
8. 按照中華人民共和國嘅地理大區分法，江西屬華東。

攷

1. 〈省情簡介〉。江西省人民政府。2011年5月12號。原著喺2015年3月14號歸檔。喺2015年3月18號搵到。
2. 據中文版
3. 〈2013年江西省宏觀經濟指標表〉。江西省人民政府。2014年11月18號。原著喺2015年3月15號歸檔。喺2015年3月18號搵到。
4. 〈江西省2013年國民經濟和社會發展統計公報〉。江西省統計局。2014年4月1號。原著喺2014年7月14號歸檔。喺2015年3月18號搵到。
5. 〈歷史淵源〉。江西省人民政府。2011年5月12號。原著喺2015年3月15號歸檔。喺2015年3月18號搵到。
6. 〈自然資源〉。江西省人民政府。2008年7月8號。原著喺2015年5月6號歸檔。喺2015年3月18號搵到。