李永達

李永達（LEE Wing-tat，1955年12月25號—），係民主黨第三任主席，被視為香港泛民主派嘅成員。做過立法局議員、香港民主民生協進會副主席、香港民主同盟中常委、香港市民支援愛國民主運動聯合會常委、葵青區議會主席、區域市政局議員、香港民主黨主席同副主席、香港立法會議員。

李永達
出生日	1955年12月25號  （68歲）
出生地	英屬香港
國籍	英屬香港、中華人民共和國
母校	香港大學、聖保羅書院、香港大學
職業	政治人
政黨	民主黨
配偶	陳樹英
[改維基數據]
睇 傾 改

屋企

李永達鄉下喺廣東惠陽，而佢就喺香港出世。第一任老婆係陳樹英（1985年－1992年），第二任老婆係陸鳳萍（1994年－1999年），第三任老婆又係陳樹英（2001年－)^[1]。

簡歷

李永達早年喺聖保羅書院同香港大學就讀，1980年喺香港大學攞到理學士學位。之後，佢喺屯門區大興佛教沈香林紀念中學教書，同已過身嘅立法局議員吳明欽二人係同事，又喺呢度識到老婆陳樹英。1985年開始做葵青區議員（石籬選區），同梁耀忠、單仲偕等七個同時獲選為葵青區議會議員嘅民主派人士被叫做葵青七子。1991年，佢夾埋荃灣區議會議員陳偉業競選立法局，兩個一齊入立法議會，開始立法局議員生涯。直到2000年，因民主黨將佢（夥拍區議員黃炳權），以及何俊仁（陳樹英、蔣月蘭）名單、陳偉業（鄺國全）名單分拆，選民認為佢將會當選，所以將票源流向當時選情告急嘅陳偉業名單，後尾落選。

2001年，佢擔任民主黨副主席。2003年底，得到立法會議員，原葵青區議會華景選區議員單仲偕讓路，得而重返議會（選區因新增華荔荔欣二村，改稱荔華）。2004年9月，夥拍陳偉業舊盟友陳琬琛（荃灣區議會梨木樹東區議員）以第二高票當選，重返立法會，同區對手有民主派獨立議員陳偉業，職工盟李卓人、葉岳峰，查錫我，與及親中共政黨民建聯嘅譚耀宗、張學明及自由黨周梁淑怡、丁午壽等。喺楊森放棄連任民主黨主席後，佢當選民主黨第三任黨主席。

2005年5月，李永達決定代表民主黨參加2005年香港行政長官選舉，但最終攞唔到100個選舉委員會成員提名（只攞到51票）而未能得到參選資格。

2006年12月17號，原民主黨副主席何俊仁接替佢成為第四任民主黨黨主席。

响2011年第4屆香港區議會選舉入面，佢响荔華選區爭取冧莊，但受到票債票償嘅影響，輸畀民建聯朱麗玲，連任失敗；2012年第5屆香港立法會選舉，李永達嘅三人名單失去足夠嘅選民支持，唔單止冇咗議席，重拖累埋老婆陳樹英、黃偉賢嘅五人名單落選。

2021年6月20號，李永達再做返民主黨副主席，想穩定返黨內嘅軍心，團結返士氣渙散嘅民主黨^[2]。

2021年8月6號，李永達離開咗香港，飛去英國倫敦。佢老婆喺飛機場送別，但冇跟埋佢走^[3][4][5]。事前一啲預兆都冇，佢亦都未辭任黨內嘅職位。好多民主黨人都話好意外、驚訝^[6][7][8]。9月初，老婆陳樹英去埋英國。2022年5月27號，民主黨收到李永達同陳樹英嘅退黨通知，即日通過同生效，李永達透露6月會喺英國搞嘢^[9][10]。

攷

1. 〈李永達的「桃花劫」與「大兜轉」〉。點知天下。2021-08-07。原先內容歸檔喺2021-08-07。
2. 〈李永達得把口　原揚言出山穩軍心〉。東方日報。2021-08-07。原先內容歸檔喺2021-08-07。
3. 〈民主黨李永達離港赴倫敦　妻陳樹英證實消息　黨友大表驚訝〉。香港01。2021-08-07。
4. 〈李永達疑走佬　搭夜機竄倫敦〉。文匯報。2021-08-07。原先內容歸檔喺2021-08-07。
5. 〈李永達突離港赴英　黨友不知情〉。眾新聞。2021-08-07。原先內容歸檔喺2021-08-07。
6. 〈民主黨李永達已離港赴英　黨友驚訝：全無先兆〉。頭條日報。2021-08-07。原先內容歸檔喺2021-08-07。
7. 〈民主黨副主席李永達離港赴英　黨友表驚訝〉。東方日報。2021-08-07。原先內容歸檔喺2021-08-07。
8. 〈民主黨副主席李永達已離港赴英　羅健熙指無收到辭任通知〉。商業電台。2021-08-07。原先內容歸檔喺2021-08-07。
9. 〈李永達陳樹英退出民主黨　李永達稱將於海外有活動　冀退黨為民主黨減壓〉。明報。2022-05-27。
10. 〈李永達退民主黨 下月起在英有「行動」〉。明報。2022-05-28。

出面網頁

• 〈香港特別行政區立法會 - 議員資料庫〉 (繁體中文)。香港特別行政區立法會。
• 香港網絡大典：李永達
• 李永達嘅facebook頁

Template:香港特別行政區第一屆立法會議員