票債票償

「票債票償」運動，係2011年一場由黃毓民領導下，人民力量發起嘅政治運動，佢哋針對溫和民主派嘅民主黨、民協喺2010年就香港2012年政改方案投贊成票，要喺第4屆香港區議會選舉入面向民主黨、民協、民主動力、以民建聯為首嘅親中陣營狙擊（除四民），將佢哋拉落馬。

呢個狙擊溫和民主派嘅運動，喺黃毓民仍然未退出社民連嘅時候就已經醞釀。當時，黃毓民、蕭若元等主張狙擊溫和泛民陣營，但同社民連黨內唔少其他人有意見分歧。之後以黃毓民為首嘅一批社民連成員就退黨，另立人民力量進行呢次行動^[1]。

「票債票償」亦成為咗佢哋喺呢次選舉嘅主要口號之一，但除咗針對民主黨之外，佢哋亦有一啲成員同一年前反對政改方案嘅社民連同公民黨直接競爭（例如：曾麗文喺深水埗美孚中選區就同公民黨嘅伍月蘭撞區）。面對呢次行動，當時有傳言話係中共背後策劃，對部分泛民主派人士進行𠝹票，但呢個說法並無得到證實^[2]。

不過，人民力量最終只係憑麥業成攞到1個議席，同埋成功狙擊四個本身唔係黨領導層嘅民主黨候選人^[3][4]。

事後評論

• 時事評論員蔡子強話，無明顯證據顯示人民力量拆走民主黨同民協嘅關鍵選票；不過狙擊行動刺激咗選民嘅投票意欲，人民力量吸引咗一批新嘅投票者^[5]。

• 被人民力量陳志全狙擊嘅民主黨李永達，喺面對選舉結果嗰陣，就話自己係輸喺地區工作，未必同狙擊有直接關係^[6]。

後續發展

黃毓民之後喺2013年退出人民力量，本來兩個分裂嘅政黨（社民連同人民力量）關係漸趨緩和，甚至喺2016年香港立法會選舉結盟參選。

參考

1. 蕭若元。《香港大撕裂（上）: 香港的命運系列 雨傘運動》。
2. 朱國斌、朱世海 (2015)。《中央與特別行政區關係專論》。頁 160。
3. 〈「票債票償」僅4區見效 黃毓民未言棄〉 互聯網檔案館嘅歸檔，歸檔日期2016年8月18號，.，《明報》，2011年11月8號。《明報》內文假設若果人力無參選，人力嘅選票會自然轉嫁到民主黨身上。結果只有四區係人力加上民主黨選票係多過親中陣營，包括北區石湖墟選區 (N12)；葵青區青發選區 (S28)；荃灣象石選區 (K17) ，結果搞到民主黨蔡子民冧唔到莊；喺中西區寶翠區 (A09) 搞到民主黨楊浩然冧唔到莊。
4. 〈人民力量「鎅票」民主派三人落馬〉 互聯網檔案館嘅歸檔，歸檔日期2016年3月4號，.，《星島日報》，2011年11月8日。
5. （《評台》轉載） 互聯網檔案館嘅歸檔，歸檔日期2015年8月17號，.蔡子強：〈補遺篇：談人民力量的區選結果〉 Archive.is嘅歸檔，歸檔日期2015-11-08，《明報》，2011年11月24號。
6. 「麗華選區李永達敗給朱麗玲」^{[失咗效嘅鏈]}，有線新聞，2011年11月07日 (03:08am)。