爬行類動物 From Wikipedia, the free encyclopedia
個嘴長、條尾扁。係一種水陸兩棲嘅動物,但好少離開水太遠。因為眼同鼻孔都生喺頭頂上面,當佢匿埋喺水裏面,獵物好難發現佢。而家體型最大嘅鱷魚係灣鱷,一般紀錄長達 8 米(甚至 10 米);而揚子鱷,侏儒鱷等體型最細。
鱷魚係變溫動物,需要爬上岸邊曬太陽嚟調節體溫。鱷魚個心臟有左、右心房同埋左、右心室,係喺脊椎動物首次出現完全分隔嘅左右心室。鱷魚同恐龍有共同嘅祖先,分開兩種唔同形態演化,恐龍一早已經死晒,鱷魚就留到而家,而且同以前個樣差唔多,所以又叫活化石。
雖然話鱷魚係爬蟲類,但亦有啲科學家認為佢哋同雀鳥嘅親緣關係較近,因為鱷魚同雀一樣,都係兩心房兩心室,重有佢哋一樣都有育幼行為。
鱷魚主要分 3 類:短吻鱷科(鼉科)Alligatoridae、鱷科 Crocodylidae、恆河鱷亞科 Gavialinae。不過,呢個分類排列到而家重有得拗。
短吻鱷科(鼉科)嘅英文:alligator 源自西班牙文 el lagarto,意思解蜥蜴;鱷屬 (Crocodylus) 源自希臘文 krokodeilos,解作爬蟲(kroko = 爬行,deilos = 蠕蟲[或人類]);恆河鱷屬 Gavialis源自印地語ghariyal,解作鱷魚,「gharial」後期被錯寫成「gavialis」。
鱷魚係喺濕地嘅食物鏈入面位於最高嗰級嘅捕獵者同分解者。因為鱷魚喺唔同年紀會食唔同種類嘅動物(啱啱出世會食昆蟲同魚,大啲會捉蛇同老鼠,長大咗就捉更大隻嘅動物),而佢哋亦會食動物屍體嚟維持濕地嘅食水衞生同生態平衡。水災嗰陣鱷魚用嚟攤唞(休息)嘅地方,可以為差唔多浸死嘅動物提供避難所。旱災嗰陣水位下降,啲動物又可以飲鱷魚挖嘅窿裏面嘅水維生。佢嘅蛋亦係水獺同水巨蜥呢啲動物嘅食物。
喺嶺南到海南一帶,試過有馬來鱷(內陸河)、灣鱷(沿海同潮汐帶)等鱷魚生活著,啲古文係有過記載嘅。唐代陣,由韓江、梅江、西江到珠三角同東江,鱷魚分佈都係好多。[1]樂史《太平寰宇記》記載咗,東江惠州歸善縣(而家嘅惠陽)有「鱷魚池,池中多鱷魚,因以為名」。而喺西江谷地、潭江流域等珠三角嘅邊緣山區,就相對少有鱷魚生活。相信起碼到清末到民國初,仲喺度存活。[2] 而家要去到東南亞先至搵到呢啲鱷魚。
早幾千年前,古埃及年代嘅皇族已經開始養鱷魚,用嚟做展覽,保護財物同做祭品。喺工業革命之後,美國同歐洲紛紛開設動物園,亦陸陸續續養鱷魚,但都只係養單一品種。位於佛羅里達州嘅聖奧古斯丁鱷魚農場可能係史上第一個以養多種鱷魚為主嘅動物園[3]。全世界 23 種鱷魚當中,至少有 8 種已瀕臨絕種,部分動物園已經開始一系列繁殖計劃,用嚟維持嗰啲品種嘅數量。
喺香港有養唔少品種嘅鱷魚,呢啲地方亦有唔少,包括咗香港動植物公園、香港海洋公園、嘉道理農場暨植物園(揚子鱷)、嘉道理農場暨植物園(眼鏡凱門鱷)、香港濕地公園(灣鱷同馬來長吻鱷)同埋屯門公園爬蟲館(眼鏡凱門鱷)。荔園動物園舊時亦有養過鱷魚(揚子鱷;仲有養過灣鱷一段時間)。
而喺廣州養鱷魚係出名嘅地方,就有番禺嘅長隆野生動物世界。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.