貝貝

  想搵第二個意思嘅話，請睇貝貝 (搞清楚)。

貝貝係香港最出名嘅灣鱷明星。有人喺2003年11月發現貝貝喺新界元朗山貝河出沒，從此聲名大噪，傳媒爭住影佢，市民爭住睇佢，相機日捕夜捕。之後，貝貝同澳洲生態學家利弗（John Lever）同番禺捕鱷專家何展釗呢幾個人周旋咗幾個月，重未捉得到。終於喺七個月後，2004年6月俾漁農自然護理署捉住，送咗去嘉道理農場暫住。2006年8月15號搬去香港濕地公園 —— 專為貝貝而設永久嘅屋企「貝貝之家」裏面長住。

貝貝響香港濕地公園嘅貝貝之家

改名

2004年7月12號，漁農自然護理署同香港電台一齊搞咗個鱷魚改名比賽，反應熱烈。8月12號，漁農自然護理署宣佈元朗小灣鱷命名為「貝貝」；英文名 Pui Pui，係因為呢個名生動活潑又易記，最啱攞嚟形容喺山貝河搵倒嘅小灣鱷。之前，首先發現嗰條鱷魚嘅南生圍姓陳嘅村民講笑噉同佢改咗個名叫「陳鱷鱷」。

幾大

貝貝游緊水

專家估計捉倒嗰時貝貝係 4 歲，所佢就係條千禧年出世（2000年），1.75 米長，19.5 kg 重。佢大個之後大概會有 3 米，貝貝之家嘅設計預埋呢樣嘢。

貝貝之家

貝貝之家簡介：

• 位置：香港濕地公園遊客中心外面
• 面積
  • 戶外範圍：20 平方米（陸地）、50 平方米（水池）
  • 內室：14 平方米

戶外設施

1. 水池：水深一米，水面有突出嚟嘅石台，畀鱷魚遮陰同匿埋。
2. 紅外線暖爐：藏喺石簷底嘅紅外線暖爐，響凍嘅日子畀啲溫暖貝貝（溫度係攝氏 25 度）
3. 電熱板：陸上嘅電熱板，響凍嘅日子畀貝貝休息取暖。
4. 電子磅：收埋喺石簷下面，簷底有紅外線暖爐。每當貝貝攤喺度取暖嗰陣，工作人員可以響室內嘅儀器紀錄重量，完全唔使騷擾貝貝。
5. 濾水系統：池水不停循環過濾，確保水質好正。先進嘅過濾系統包括過濾沙缸同紫外光消毒。
6. 戶外植物：戶外展區種嘅植物除點綴之外，亦係畀貝貝遮蔭同匿埋嘅地方，品種包括蒲葵、風車草、海芋、大薸。

室內設施

室內屋企同戶外範圍由一道活門分開，畀貝貝自由出入。內室方便獸醫做健康檢查，亦可以畀貝貝舒舒服服過冬。

1. 通風系統同自然光：室內個窗特大，風扇同抽風系統，保持空氣流通。自然光由窗射入嚟，對鱷魚有益。
2. 暖管：室內通風系統重有暖管，可以響冬天提供暖氣。溫度太低嗰陣重可以加紅外線暖爐。
3. 暖水：好凍嘅冬天時可提供暖水，等室內池水保持 20 度以上。
4. 閉路電視：室外戶內都有閉路電視，24 小時睇住貝貝嘅活動。嚟旅遊嘅人可以響戶外隔住塊玻璃睇吓貝貝嘅起居生活……

參考

• 《我叫貝貝小灣鱷》，載香港《明報》，2004年8月13號。
• 香港濕地公園，貝貝之家介紹牌
• 小灣鱷貝貝遷入濕地公園（附圖）
• 漁農自然護理署年報 2003-2005

拎

• 香港濕地公園貝貝之家網頁