From Wikipedia, the free encyclopedia
人類有攞動物(包括人類)啲腦嚟食嘅文化。腦同多數第啲動物器官一樣,可以攞嚟食,佢主要由蛋白質同脂肪兩種有機化合物組成。
![]() |
喺世界好多地方嘅菜系當中,古人都有用非人動物嘅腦煮餸:例如滿漢全席裏面就有猴腦呢味餸;當時嘅清朝宮廷覺得馬騮嘅腦好食,所以就有咗噉嘅做法-清朝嘅宮廷廚師會將一隻馬騮固定喺張飯檯上面,然後等準備好嗮啲配料之後,就喺張檯中間嘅窿仔嗰度露隻馬騮嘅頭出嚟,然後就監生用利器打開隻馬騮嘅頭殼,再將配好嘅調味料倒入去隻馬騮嘅頭殼,俾食客用匙羹等嘅餐具𢳂隻馬騮嘅腦嚟食。到咗現代,猴腦呢種食法經已因為人道理由而俾人禁咗[1][2]。
另一方面,世上亦有啲族群會為咗宗教原因而食人腦,例如巴布亞新畿內亞嘅法雷族(Fore)據講會以食死者嘅腦做葬禮嘅一部份-喺法雷族嘅傳統葬禮上,同死者親嘅人會將死者嘅腦食落肚,認為噉做能夠令死者喺一定程度上達到長生不死[3]。
食腦被指會對人嘅健康造成嚴重危害。研究指,將腦等嘅神經組織食落肚會好容易惹到朊毒體(prion)相關嘅病:朊毒體係一啲異常嘅蛋白質,一嚿朊毒體能夠影響佢周圍嘅同類蛋白質,令到呢啲同類跟住佢一齊變成異常嘅形狀;朊毒體會引致多種嘅神經退化病(neurodegenerative diseases),即係一啲令個腦嘅神經細胞快速死亡嘅病,呢啲病喺廿一世紀初都仲係絕症,會令患者喺幾個月至幾年嘅時間之間因為神經系統喪失功能而死亡[3][4]。