城市
聚落形態一種 / From Wikipedia, the free encyclopedia
城市(粵拼:sing4 si5)又嗌都市(dou1 si5)、城(粵拼:seng4*2(白讀),sing4(文讀)),係聚落一種,係人類活動如政治、經濟、社會等最活躍嘅舞臺,因爲人口集中,所以城市地方人口多、人口密度高。
「城市」或者「都市」可以拆字來理解:「城」、「都」意味住城市有好大嘅社會、行政影響;「市」就有經濟意味。所以城市同鄉村、市鎮嘅區別往往在於大細[註 1]、人口密度[註 2]、緊要程度[註 3]、法定地位。
喺活動上,城市人口比較多從事第二產業、第三產業。喺形態上,中心機能集中嘅地方嗌做市區(再發達啲,就會喺市中心形成核心商業區),市區之外嘅週邊嗌做郊外。而家有城市膨脹現象,即係城市從市區蔓延到郊區,郊區急劇城市化,成個城市無序擴張。