From Wikipedia, the free encyclopedia
和合石(粵拼:wo4 hap6 sek6;英文:Wo Hop Shek)係香港一地,亦係一村,叫和合石村。和合石介於南華莆同粉嶺之間,北大刀岃山腳谷地,所以又嗌粉嶺南。和合石南,靠近涌水,村落羣集,有和合石村、和興村、和合石新村、畫眉山村等。而和合石,亦以和合石墳場而聞名香港。而村落以北嘅平地,係粉嶺平原嘅一部份,粉嶺新市鎮伸到呢度,有多個公共屋邨、私人屋邨、同居者有其屋。
和合石行政上歸北區。
和合石村最早立村,因而成爲地名。喺二十世紀初,彭氏客家人立和合石村,村名寓意,和諧好合[1]。村中古屋,瓦頂磚屋,多數係兩進式,屋頂呈金字[1]。加咗新屋,而成四排[1]。其中兩排平衡,係鄭、羅二圍搬來[1]。新村亦叫新圍,係和合石舊圍向東擴展。而和興村係二十世紀後葉先有,喺新圍西北對出。
畫眉山村,係沙頭角印洲塘烏洲塘村沈氏搬過來嘅。以側邊畫眉山而名。
二十世紀頭,大埔公路同九廣鐵路相繼通車,亦途經和合石。當時最近嘅火車站,係粉嶺火車站。
一九四九年,香港難民者眾,唔少外來人到和合石定居[1]。一九五零年,和合石墳場啟用,一九五一年九廣鐵路和合石支線啟用,帶旺呢度石業同建築,亦有人賣香燭、鮮花及果品等祭品維生[1]。而近粉嶺田心一面,亦有蝴蝶新村。香港政府亦起咗馬路,由大埔公路入村同墳場,卽家下和興路、和家樓路同銘賢路。一九八三年廢和合石支線,但和合石墳場就不斷擴大[1]。
粉嶺新市鎮興起,和合石一帶起咗唔少屋邨。平地中間有華明邨、華心邨、花都廣場、側邊有景盛苑、欣盛苑、昌盛苑、雍盛苑、牽情間、碧湖花園。而田心村亦拆咗做百福田心遊樂場。而和合石支線嘅路軌,亦因此而拆走,建成碧湖花園、華心邨同和興體育館。
粉嶺公路代替大埔公路,大埔公路大窩一段,亦改名大窩支西路,粉嶺一段做馬會路。和合石附近,亦路口去粉嶺公路、馬會路、大窩支西路。原本粉嶺到和合石,九廣鐵路以西,係無馬路。亦因爲新市鎮,開咗條百和路,駁通百福同和合石,伸到去上水。
和合石係北大刀岃東北谷地,地勢平坦,係粉嶺平原南支。呢支平原,南邊以畫眉山、新圍、和合石爲南,塘坑、黃崗山、田心爲北,田心到畫眉山嘅蝴蝶山腳爲西。平地呈三角形。舊時平地只係種田,而村就起靠山邊,以防水浸淹屋。
和合石嘅涌水,會北流入梧桐河。