sicrijheu e walon, dessineu et pondeu From Wikipedia, the free encyclopedia
José Schoovaerts (e walon, Djozé, so les fis, Djozewal[1], Rabulèts[2]), c' est on waloneu k' a vnou å monde li 15 di djulete 1936 a Åjhô.
Dispu diviè 2000, il a scrît des tecses so totes sôres di sudjets e walon. Des ratournaedjes di Belès letes, u di pinsêyes di des scrijhaedjes di filozofes, ucobén des paskeyes erotikes, evnd.
Ses tecses e walon ont stî eplaidîs dins l' Rantoele gazete u co Coutcouloudjoû. Mins l' Djozé Schoovaerts s' a purade publiyî so cogne infôrmatike, sol Daegntoele, pal voye di s' gazete éndjolike Rabulets, et des waibes ki vont avou.
Il a ratourné e walon et mete dizo l' cogne di bindes d' imådjes des scrijhaedjes di filozofes et powetes etrindjirs come Nietzsche ("Insi djåzéve Zaratoustra"), Machiavel ("Li Prince"), Stirner, Lao-Tseu, Shakbar, Descartes.
Il a eto adjinçné li prumî fime d' imådjes e walon, "Noersipene"
Il est eto foirt fel po dire li sinne, todi e walon, so les foroms éndjolikes.
Di s' mestî, il esteut dessineu et spiroutî, aprume di caricateures. Eto, i gåyote todi les pådjes di ses Rabulets avou des desséns et des bindes d' imådjes. Il a stî eto gaztî et livrî.
admetou dins l’ soce « La mine souriante » da Marcel Antoine.
E 1995 : il edåme l’ enimådjaedje do roman e walon « So l' anuti » da Lorint Hendschel.
Avou les desséns ki n' ont po fini nén siervou po « So l’ anuti » il va rarindjî ene Binde d' imådjes, à môde di shûte, « L' Avespré », l' passer dins les Rabulets et, po ene pårt dans l’ Li Rantoele. Li tot va parexhe come live.
Di 1995 a 1999 : I shût les cénk anêyes del sicole di walon des Relîs Namurwès.[4]
Di 2000 a 2003 : I shût les cours di walon dinés pa Lorint Hendschel a l’ UCL a Ocgniye (Noû Lovén).
E 2000, il enonde li prumire gazete éndjolike e walon, k' i lome RABULèts.
Di 2003 a 2005, il a dessiné les covietes del Rantoele gazete et adjinçner di cisse gazete e walon la.
E 2006, e moes d' djulete 2006, il a renondé RABULèTS. I l' edåma pa ene novele binde d' imådjes ("Et l' niût s' a stindou") k' on-z î pout, avou ene miete di boune volté, ricnoxhe å ddins ene pougneye di djins del Walonreye d' adon. E moes d' setimbe, gn ava ene shûte lomêye "L' Avesprêye tcheyowe, i fwait tot noer".
Fén 2006, i toirtcheye deus bindes d' imådjes so des tecses da Nietsche, "El novele idole" eyet "Li moirt k' est volontaire". Il askepeye eto ene rimouwante pitite sucete a l' après d' Choderlos d' Laclos "Tchåderlote". Dizo l' tite "Riskeus aloyaedjes", ele parexha, e coleurs, dins l' Rantoele 42. Pol Rantoele 44, i s' atake å ratournaedje e BD do live "Li Prince" da Machiavel.
E 2007, i s'a plonké dins on ovraedje di tos les diåles : fé bodjî les imådjes di Noersipene ! Djanvî a fini k' il aveut "dedja" metou 54 moyalès sgondes dins l' boesse. Cwand on sondje k'i fåt 24 imådjes po ene sigonde di fime, on s' rind conte ki ça dmande do tins po divni Walt Disney. Todi èst-i, k' may fini, il aveut emantchî 20 munutes (e coleurs !) et dedja sayî d' î djonde ène bele muzike... A l' fén d' 2007, i n' èstéve nén co foû del bouye tapêye dissu s' tauve. Mins, e moes d' djulete 2008, vola li «miråke Noersipene» ki s' enonde avou les prumires et co xhiltantès sayes, so ene waibe di strimigne, «blip.tv».
Todi e 2007, il a rprins l' gorea come mwaisse dessineu del Rantoele-gazete, adjinçnêye adon pa Lucyin Mahin. I gåyote, dispu don, tos les limeros avou ene coviete la k' a gn a ene andoûlante kimere, et on cok. Et toirtchî cwate pådjes divintrinnes di BD e coleurs. I scrît des årtikes so les oteurs k' i translate e walon.
Et vo n' la-t i nén k' il a edåmé 2008 avou on ratournaedje e BD d' on tecse da Max Stirner. Et l' fini avou l' translataedje di tot l' "Tao tô king" da Lao-Tseu et minme è mète ène fèle pougnîye dès "tuzaedjes" è imaedjes.
A l' edåme di 2009, c' est a Shakbar k' i s' a-st ataké et, å prétins, a Descartes.
E 2010, i s' a minme ataké à ratourner HEGEL !
E 2011, il askepeye li Professeur Titôrvå.
E 2013, i wåde ci persounaedje la come mwaisse persounaedje d' ene binde d' imådje medicåle, Gama-coûte. C' est l' prumî côp k' ene binde d' imådje tuzêye e walon va esse ratournêye e-n inglès.
E 2017, c' est l' deujhinme pårteye, foirt tecnike, ratournêye do francès pa Lucyin Mahin.
E 2018, i lait ouve come dessineu des covietes del Rantoele. Mins i boute co felmint so les rantoeles di soçnaedje, Fesbok et Twitter, avou des tecses et des desséns.
E 2020, i ratele avou les pådjes e coleur del Rantoele, dessinant si prôpe istwere cwand il a yeu èn accidint des ecdûts do cervea.
Il a eplaidî so spès papî cåzu tos sès ovraedjes èt lès sipåde à dès nén trop nâreûs :
Djozé eploye on walon ki rprind des mots di totes les coines del Walonreye, et avou on cmaxhî sistinme di scrijhaedje. Si rclame-t i bén hôt dins s' gazete "Rabulèts"
Dins ses tecses, li Djozé djowe avou les mots, avou leus sinses et leus cognes. I screye eto voltî so des sudjets erotikes ou d' actouwalité. I n' est nén nareus do dire li sinne so les soces waloneuses. Sins peu d' hagnî, i scrît des sacwès ki sketnut l' cåde des djermêyes di scrijheus e walon di dvant, et les tabous des pezants ki djouwnut les "mwaisses moenneus spepieus coridjeus".
A dater di 2006, i publiyrè todi dpus di tecses rimetous e rfondou.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.