سلطنت غزنویہ

سلطنت غزنویہ 976ء سے 1186ء تک قائم ایک حکومت تھی جس کا دار الحکومت افغانستان کا شہر غزنی تھا۔ اس کا سب سے مشہور حکمران محمود غزنوی تھا جس نے ہندوستان پر 17 حملے کیے اور سومنات پر حملہ کرکے بطور بت شکن خود کو تاریخ میں امر کر دیا۔

غزنویان سلطنت غزنویہ
963–1187
Ghaznavid Empire at its greatest extent
دار الحکومت	غزنی (1151ء تک) لاہور (1151ء سے)
عمومی زبانیں	فارسی (دفتری، عدالت) Ref: Homa Katouzian, "Iranian history and politics", Published by Routledge, 2003. pg 128
مذہب	سنی اسلام
حکومت	ایمپائر
شاہ
• 963-977	الپتگین
• 1160-1187	خسرو ملک غزنوی
تاریخی دور	قرون وسطیٰ
•	963
•	1187
رقبہ
تخمینہ 1029ء	3,400,000 کلومیٹر2 (1,300,000 مربع میل)
ماقبل مابعد Saffarid Dynasty دولت سامانیہ غوری سلطنت سلجوقی سلطنت

قیام

جب سامانی حکومت کمزور ہو گئی اور اس کے صوبہ دار خود مختار ہو گئے تو ان میں ایک صوبہ دار سبکتگین (366ھ تا 387ھ) نے افغانستان کے دار الحکومت کابل کے جنوب میں واقع شہر غزنی میں 366ھ میں ایک آزاد حکومت قائم کی جو تاریخ میں دولت غزنویہ اور آل سبکتگین کے نام سے جانی جاتی ہے۔ بعد میں سبکتگین کا خراسان پر بھی قبضہ ہو گیا۔ اسی سبکتگین کے زمانے میں مسلمان پہلی مرتبہ درہ خیبر کے راستے پاکستان میں داخل ہوئے ۔

اس زمانے میں لاہور میں ایک ہندو راجا جے پال حکومت کرتا تھا اس کی حکومت پشاور سے آگے کابل تک پھیلی ہوئی تھی اور اس کی سرحدیں سبکتگین کی حکومت سے ملی ہوئی تھیں۔ راجا جے پال نے جب دیکھا کہ سبکتگین کی حکومت طاقتور بن رہی ہے تو اس نے ایک بڑی فوج لے کر غزنی پر حملہ کر دیا لیکن لڑائی میں سبکتگین نے اس کو شکست دے دی اور جے پال کو گرفتار کر لیا گیا۔ جے پال نے سبکتگین کی اطاعت قبول کرکے اپنی جان بچائی اور سالانہ خراج دینے کا وعدہ کیا۔ اب سبکتگین نے جے پال کو رہا کر دیا اور وہ لاہور واپس آ گیا لیکن اس نے وعدے کے مطابق خراج نہیں بھیجا جس کی وجہ سے سبکتگین نے حملہ کر دیا اور وادی پشاور پر قبضہ کر لیا۔

محمود غزنوی

تفصیلی مضمون کے لیے محمود غزنوی

فائل:Ghazna-02.png

دولت غزنویہ

سبکتگین کا 20 سال کی حکومت کے بعد انتقال ہو گیا۔ اس کے بعد اس کا بیٹا محمود غزنوی تخت پر بیٹھا۔ محمود خاندان سبکتگین کا سب سے بڑا بادشاہ ہوا ہے۔ اسلامی تاریخ کے مشہور حکمرانوں میں سے ایک محمود ہندوستان پر 17 حملوں کے باعث شہرت کی بلندیوں پر پہنچا۔

محمود بچپن سے ہی بڑا نڈر اور بہادر تھا۔ وہ اپنے باپ کے ساتھ کئی لڑائیوں میں حصہ لے چکا تھا۔ بادشاہ ہونے کے بعد اس نے سلطنت کو بڑی وسعت دی۔ وہ کامیاب سپہ سالار اور فاتح بھی تھا۔ شمال میں اس نے خوارزم اور بخارا پر قبضہ کر لیا اور سمرقند کے علاقے کے چھوٹے چھوٹے حکمرانوں نے اس کی اطاعت قبول کرلی۔ اس نے پہلے بخارا اور سمرقند کاشغر کے ایلک خانی حکمرانوں کے قبضے میں تھے اور خوارزم میں ایک چھوٹی سے خود مختار حکومت آل مامون کے نام سے قائم تھی۔ جنوب میں اس نے رے، اصفہان اور ہمدان فتح کرلئے جو بنی بویہ کے قبضے میں تھے۔ مشرق میں اس نے قریب قریب وہ تمام علاقہ اپنی سلطنت میں شامل کر لیا جو اب پاکستان کہلاتا ہے ۔

محمود عدل و انصاف اور علم و ادب کی سرپرستی کے باعث بھی مشہور ہے۔ اس کے دور کی مشہور شخصیات میں فردوسی اور البیرونی کسی تعارف کے محتاج نہیں۔

زوال

محمود کے لڑکے مسعود کے آخری زمانے میں وسط ایشیا کے سلجوقی ترکوں نے غزنوی سلطنت کے شمال اور مغربی حصوں پر قبضہ کر لیا۔ اب سلاطین غزنی کے قبضے میں صرف وہ علاقے رہ گئے جو اب مشرقی افغانستان اور پاکستان پر مشتمل ہیں۔

بارہویں صدی عیسوی میں تعمیر کیا جانے والا مینار سلطان مسعود غزنوی

سلطان ابراہیم

دور زوال کے غزنوی حکمرانوں میں سلطان ابراہیم (451ھ تا 492ھ) کا نام سب سے نمایاں ہے۔ اس نے اپنے 40 سالہ دور حکومت میں سلطنت کو مستحکم کیا، سلجوقیوں سے اچھے تعلقات قائم کیے اور ہندوستان میں مزید فتوحات حاصل کیں۔ اس کے عہد میں ہندوئوں نے مسلمانوں کو پنجاب سے بے دخل کرنے کی کوشش کی لیکن وہ اس میں کامیاب نہیں ہوئے۔ ابراہیم نے دہلی تک تمام علاقہ غزنی کی سلطنت میں شامل کر لیا اور اس کی افواج نے بنارس تک کامیاب حملے کیے ۔

ابراہیم بڑا دیندار اور رعایا پرور حکمران تھا۔ رات کو غزنی کی گلیوں میں گشت کرتا اور محتاجوں اور بیوائوں کو تلاش کرکے ان کی مدد کرتا۔ وہ اعلیٰ درجے کا خوشنویس تھا۔ ہر سال ایک قرآن مجید لکھتا جسے ایک سال مکہ معظمہ اور دوسرے سال مدینہ منورہ بھیجتا۔ اس کو محلات سے زیادہ ایسی عمارتیں بنانے کا شوق تھا جن سے عوام کو فائدہ پہنچے چنانچہ اس کے عہد میں 400 سے زائد مدارس، خانقاہیں، مسافر خانے اور مساجد تعمیر کی گئیں۔ اس نے غزنی کے شاہی محل میں ایک بہت بڑا دوا خانہ قائم کیا جہاں سے عوام کو مفت ادویات ملتی تھیں۔ اس دوا خانے میں خصوصاً آنکھ کی بیماریوں کی بڑی اچھی دوائیں دستیاب تھیں۔

خاتمہ

545ھ بمطابق 1150ء میں غزنی پر غور کے ایک حکمران علاؤ الدین نے قبضہ کرکے شہر کو آگ لگادی جس کی وجہ سے دنیا کا یہ عظیم شہر جل کر خاکستر ہو گیا۔ علاؤ الدین کے اس ظالمانہ کام کی وجہ سے لوگ اس کو ”جہاں سوز“ یعنی دنیا کا جلانے والا کہتے ہیں۔ اس کے بعد غزنوی خاندان کے آخری دو حکمرانوں کا دار السلطنت لاہور ہو گیا۔ 582ھ میں غور کے ایک دوسرے حکمران شہاب الدین غوری نے لاہور پر قبضہ کرکے آل سبکتگین کی حکومت کا خاتمہ کر دیا۔

اہمیت

غزنوی حکمرانوں کا دور پاکستان کی تاریخ میں خاص طور پر بڑی اہمیت رکھتا ہے۔ پاکستان تقریباً 200 سال تک غزنی کی سلطنت کا حصہ رہا اور اس زمانے میں اسلامی تہذیب کی جڑیں مضبوط ہوئیں۔ کوہ سلیمان کے رہنے والے پٹھانوں نے اسی زمانے میں اسلام قبول کیا اور لاہور پہلی مرتبہ علم و ادب کا مرکز بنا۔

علم و ادب کی سرپرستی

غزنوی حکمران علم و ادب کے بڑے مربی و سرپرست تھے۔ خصوصا محمود غزنوی کے دور کے فردوسی اور البیرونی کے کارنامے دنیا آج بھی یاد کرتی ہے۔

فردوسی کا شاہنامہ فارسی شاعری کا ایک شاہکار سمجھاجاتا ہے اور دنیا اسے آج تک دلچسپی سے پڑھتی ہے۔ البیرونی اپنے زمانے کا سب سے بڑا محقق اور سائنس دان تھا۔ اس نے ریاضی، علم ہیئت، تاریخ اور جغرافیہ میں ایسی عمدہ کتابیں لکھیں جو اب تک پڑھی جاتی ہیں۔

غزنویوں کے دور میں لاہور پہلی مرتبہ علم و ادب کے مرکز کے طور پر ابھرا۔ اس زمانے میں فارسی کے کئی ادیب اور شاعر یا تو لاہور میں پیدا ہوئے یا یہاں آکر آباد ہوئے۔ یہاں کے شاعروں میں مسعود سعد سلمان اور عوفی بہت مشہور ہیں۔ ان کا شمار فارسی کے صف اول کے شعرا میں ہوتا ہے۔ یہ دونوں شاعر سلطان ابراہیم اور اس کے جانشینوں کے زمانے میں تھے ۔

لاہور کے علما میں حضرت علی بن عثمان ہجویری (400ھ تا 465ھ) بہت مشہور ہیں۔ وہ ایک بہت بڑے ولی تھے جن کی وجہ سے لاہور کے علاقے میں اسلام کی اشاعت ہوئی اور بہت سے ہندو مسلمان ہوئے۔ حضرت ہجویری آج کل داتا گنج بخش کے نام سے مشہور ہیں۔ انھوں نے 40 سال تک اسلامی دنیا کے بہت بڑے حصے کی سیر کی اور آخر میں لاہور آکر رہنے لگے۔ ان کا مزار لاہور میں موجود ہے ۔

حضرت ہجویری ”کشف المحجوب“ نامی ایک کتاب کے مصنف ہیں۔ یہ علم تصوف میں فارسی زبان کی پہلی کتاب ہے اور تصوف کی سب سے اچھی کتابوں میں سے ہے۔ یہ کتاب انھوں نے لاہور میں لکھی تھی۔ اس کتاب کا اردو ترجمہ بھی ہو گیا ہے ۔

عہد غزنوی کی دو عظیم ہستیاں ابو سعید ابوالخیر (357ھ تا 440ھ) اور سنائی (465ھ تا 545ھ) ہیں۔ ابوالخیر اپنے عہدے کے بڑے صوفی اور ولی تھے۔ ان کی شہرت زیادہ تر رباعیوں کی وجہ سے ہے کیونکہ وہ فارسی زبان کے پہلے بڑے رباعی گو شاہر تھے۔ ان کی یہ رباعیاں آج بھی مقبول ہیں اور خدا سے محبت اور اخلاقی تعلیم ان کا خاص موضوع ہے۔

سنائی غزنویوں کے آخری دور کے سب سے بڑے شاعر ہیں اور فارسی میں صوفیانہ شاعری کے بانی ہیں۔ ان کا کلام سوز و گداز اور اخلاقی تعلیم سے بھرا ہوا ہے۔ ابو سعید ابوالخیر کا تعلق خراسان سے تھا اور سنائی کا شہر غزنی سے ۔

عربی زبان کا مشہور ادیب بدیع الزماں ہمدانی (متوفی 1007ء ) بھی اسی زمانے سے تعلق رکھتا ہے۔ وہ ہرات کا رہنے والا تھا۔ اس کی کتاب ”مقامات“ عربی انشا پردازی کا اعلیٰ نمونہ سمجھی جاتی ہے ۔

آل سبکتگین

لقب	نام	دور حکومت
أمیر	الپتگین	963 - 975
أمیر	اسحاق ابن الپتگین	975–977
أمیر ابو منصور	سبکتگین	977–997
أمیر	اسمعیل غزنوی	997 - 998
یمین الدولہ ابو لقاسم محمود غزنوی بت شکن	محمود غزنوی	998 - 1030
جلال الدولہ	محمد غزنوی	1030 – 1031 پہلا دور
شھاب الدولہ	مسعود غزنوی	1031 - 1041
جلال الدولہ	محمد غزنوی	1041 دوسرا دور
شھاب الدولہ	مودود غزنوی	1041 - 1050
؟ ‎	مسعود غزنوی دوم	1050
بھاء الدولہ ‎	علی غزنوی	1050 - 1053
عز الدولہ	عبدالرشید غزنوی	1053
قایم الدولہ	طغرل حاجب	1053 (غاصب)
جمال الدولہ	فرخ زاد غزنوی	1053 – 1059
ظہیر الدولہ	ابراہیم غزنوی	1059 – 1099
علاء الدولہ‎	مسعود غزنوی سوم	1099 – 1115
کمال الدولہ	شہرزاد غزنوی	1115
سلطان الدولہ	ارسلان غزنوی	1115 – 1118
یمین الدولہ	بہرام شاہ غزنوی	1118 – 1152
معزالدولہ	خسرو شاہ غزنوی	1152 – 1160
تاج الدولہ	خسرو ملک غزنوی	1160 – 1187
سلطنت غوریہ نے سلطنت غزنویہ کو ختم کر دیا ـ

• دولت سامانیہ کے زیر سایہ جو حکمران تھے، وہ سبز خانوں میں نمایاں کیے گئے ہیں ـ
  • نیلے خانوں میں وہ افراد ہیں جو مختصر عرصے کے لیے دعویدار تھے حکومت کے ـ

اہم تاریخیں

ملتان کی فتح	1005ء
پشاور کی جنگ	1008ء
قنوج کے راجا کی اطاعت	1017ء
کالنجر کے راجا کی اطاعت	1022ء
سومنات پر حملہ	1025ء

مزید مطالعہ کے لیے

• آئینہ حقیقت نماز از اکبر شاہ خاں نجیب آبادی
• محمود غزنوی از پروفیسر حبیب (اردو ترجمہ)
• محمود غزنوی از نصیر احمد جامعی
• آثار الکرام از حکیم سید شمس اللہ قادری (حیدرآباد دکن)۔ یہ عہد غزنویہ کی علمی و ادبی تاریخ ہے
• شعر العجم حصہ اول از شبلی نعمانی

ویکی ذخائر پر سلطنت غزنویہ سے متعلق سمعی و بصری مواد ملاحظہ کریں۔