From Wikipedia, the free encyclopedia
Si Raha Siagu ay ang raha ng Karahanan ng Butuan na tinatawag din ng mga dalubhasa sa kasaysayan o mga mananalaysay bilang Raha Siawi[1] o Raha Awi.[2] Namuno siya sa Butuan at Calagan[3] (Lungsod ng Surigao na ngayon[4][lower-alpha 1]) sa Hilagang Mindanao noong tinatayang maagang ika-16 na dantaon.[5] Siya ang naging pinuno ng mga Manobo.[6]
Raha Siagu | |
---|---|
Nasyonalidad | Karahanan ng Butuan Calagan |
Ibang pangalan | Raah Siawi Raha Awi Raha Siaui |
Titulo | Raha |
Kamag-anak | Raha Kolambu Raha Humabon Raha Tupas |
Noong Marso 28, 1521, tinanggap ni Raha Siagu at ni Raha Kolambu na raha ng Limasawa at kapatid ni Raha Siagu ang pagdating ng manggagalugad na Portuges na si Fernão de Magalhães (o si Ferdinand Magellan) sa pulo ng Limasawa na bahagi na ngayon ng bansang Pilipinas.[7] Nangyari bago mapatay si Magalhães sa pulo ng Mactan sa pamumuno ni Lapulapu.[8] Isa sina Raha Siagu at Raha Kolambu sa mga unang pinunong nakilala ni Magalhães na tinanggap ang Kristiyanismo at dumalo sa kauna-unahang Misang Katoliko sa lugar na bahagi na ngayon ng mga Kapuluang Pilipinas na naganap noong Marso 31, 1521, Linggo ng Pasko ng Muling Pagkabuhay.[9][5]
Ginawa nina Raha Siagu at Raha Kolambu ang sanduguan o pagsasandugo (o blood compact sa Ingles) kay Fernão de Magalhães,[10][11] na inangkin ang pag-aari ng mga kapuluan para sa hari ng Espanya,[12] na si Carlos V, Banal na Emperador Romano sa panahon iyon.[13][lower-alpha 2] Naipangalan ang pulo bilang Kapuluan ng San Lazaro noong Marso 16, 1521.[14] Ang sanduguan ay tanda ng pagkakasundo at pagkakaibigan sa pagitan ng mga partido kung saan kinukuha ang dugo ng pinuno ng bawat partido at hinahalo sa alak na iinumin ng lahat ng nakisali.[15] Nakipagkaibigan ang mga Kastila sa mga raha sa pamamagitan ng sanduguan para maging teritoryo ng Espanya ang kapuluan.[16]
Sabi sa mga talang Tsino na natapos ang Karahanan ng Butuan nang sinuko ni Raha Siagu ang kanyang soberanya sa pagpapalawak ng kolonyalismo ng Espanya noong 1521.[17]
Pinsan ni Raha Siagu si Raha Humabon ng Karahanan ng Sugbo (o Cebu).[18] Pamangkin ni Raha Humabon si Raha Tupas,[19] ang huling ng Raha ng Sugbo,[20] at dahil dito, pamangkin[lower-alpha 3] din siya ni Raha Siagu. Si Raha Siagu ang unang Waray na nakilala ng mga mananakop na Kastila.[21] Ang kanyang kasuotan ay yari sa seda at bulak, may malaking hikaw, may tila gintong patak sa mga ngipin, puno ng tatu sa katawan at may tangan na balaraw.[22] Ipinakita niya ang kanyang hospitalidad sa mga Kastila at hinainan sila ng litsong baboy nakalagay sa platerang poselana at tuba na lahat ay nakalagay sa banig.[23] Naganap ang piging na binigay ni Raha Siagu nang Biyernes Santo kung saan bawal kumain sa Katoliko ng karne[24] at nakalimutan ito ng mga banyagang Kastila.[21]
Ayon sa tagapagtala ni Fernão de Magalhães na si Antonio Pigafetta, mayroong minahan ng ginto si Raha Siagu.[4] Sinalarawan ang Butuan noon na maraming ginto at may palamuting ginto sa mga bahay, at kahit ang alipin ni Raha Siagu ay mayroong gintong alahas.[25]
Ang Gawad Raha Siagu (o Rajah Siagu Award) na binigay ng Pambansang Komisyon sa Ginagampanan ng Kababaihang Pilipina (Komisyon sa Kababaihan ng Pilipinas na ngayon), Sangay sa Lungsod ng Butuan, ay ipinangalan kay Rajah Siagu.[26] Ibinibigay ang parangal na ito sa Pinakatangi-tanging Mamamayan sa Larangan ng Agham at Teknolohiya.[26] Isa sa mga nagawaran ng parangal na ito ang kilalang siyentipikong marina na si Jurgenne Honculada-Primavera.[27]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.