G-Spot

Ang Gräfenberg Spot o G-Spot, na maisasalin bilang dakong-G, pook na G o lugar na G, ay binigyang ng kahulugan bilang isang hugis balatong (sitaw o patani)^[1] na pook ng puke. Ilang mga babae ang nag-ulat na isa itong sonang erohenosa na, kapag binuyo o inudyok, ay mag-aaring maghantong sa malakas na pagkapukaw na seksuwal, makapangyarihang orgasmo at ehakulasyong pambabae.^[2] Ang dakong Gräfenberg, pook na Gräfenberg o lugar na Gräfenberg ay karaniwang inilalarawan bilang nakalagak sa isa hanggang tatlong mga pulgada paitaas sa pangharapang (anteryor) na dingding ng puke sa pagitan ng buklat o buka at ng uretra^[3] at isang pook na sensitibo na maaaring maging bahagi ng prostatang pambabae.^[4]

Bagaman pinag-aaralan na ang dakong-G magmula pa noong dekada ng 1940,^[5] nagtagal ang hindi pagkakasundo hinggil sa pag-iral nito bilang isang bukod-tanging kayarian, kahulugan at lokasyon.^[6][7][8] Nilagom ng isang pag-aaral sa Britanya na ang pag-iral nito ay hindi napatunayan at subhektibo, batay sa mga pagtatanung-tanong at karanasang personal.^[7] Ang ibang mga pag-aaral, na gumamit ng ultrasound, ay nakatagpo ng ebidensiyang pisyolohikal ng dakong G sa mga babae na nag-ulat ng pagkakaroon ng mga orgasmo habang nakikipagtalik.^[7][9] Nagkaroon din ng hipotesis na ang G-Spot ay isang karugtong ng tinggil at na ito ay sanhi ng mga orgasmong pampuke.^{[8][10][11][12]}

Nangangamba ang mga seksologo at iba pang mga mananaliksik na maaaring ituring ng mga babae ang kanilang mga sarili bilang dispunksiyonal o hindi makaganap kapag hindi sila nakaranas ng dakong-G.^[13][14][15] Ilan sa mga babae ang sumailalim sa pamamaraan ng siruhiyang plastiko na tinatawag na amplipikasyon ng dakong-G upang mapainam ang pagkamapandama o sensitibidad nito.^[5]