మానవ పరిణామం
కోతి ఆధునిక మానవుడిగా రూపొందిన క్రమం / From Wikipedia, the free encyclopedia
మానవ పరిణామం అనేది శరీర నిర్మాణపరంగా ఆధునిక మానవుల ఆవిర్భావానికి దారితీసిన పరిణామ ప్రక్రియ. ఇది ప్రైమేట్స్ పరిణామ చరిత్రతో, ప్రత్యేకించి హోమో జాతి పరిణామ చరిత్రతో మొదలై, హోమినిడ్ కుటుంబం లోనే గొప్ప జాతిగా హోమో సేపియన్స్ జాతి ఆవిర్భవించడానికి దారితీసింది. రెండు కాళ్ళపై నడక, భాష వంటి లక్షణాల అభివృద్ధి ఈ ప్రక్రియలో భాగం [1] వీటితో పాటు, ఇతర హోమినిన్లతో జాత్యంతర సంతానోత్పత్తి వంటివి కూడా ఈ పరిణామ ప్రక్రియలో భాగమవడాన్ని బట్టి, మానవ పరిణామం సూటిగా ఒక సరళరేఖలో సాగినది కాదని, అదొక సాలె గూడు లాగా విస్తరించిందనీ తెలుస్తోంది.[2][3][4][5]
![Thumb image](http://upload.wikimedia.org/wikipedia/commons/thumb/c/c5/Akha_cropped.png/220px-Akha_cropped.png)
భూమి ప్రత్యేక గోళంగా ఏర్పడి సుమారు నాలుగు వందల ఏభై కోట్ల సంవత్సరాలయితే ఆ తరువాత మరో ఇరవై కోట్ల సంవత్సరాలకు[ఆధారం చూపాలి] సముద్రాలలో సేంద్రియ రసాయనిక పదార్థాల కలయిక వల్ల జీవం ఏర్పడింది. సేంద్రియ రసాయనిక పదార్థాల నుంచి ఏకకణ జీవులు, వాటినుంచి జలచరాలు, వాటినుంచి నాలుగుకాళ్ళ జంతువులు, వాటినుంచి స్తన్య జంతువులు, వాటి నుంచి ప్రథమ శ్రేణి జంతువులు (Primates), వాటినుంచి మానవుడూ వచ్చాయి.
మానవ పరిణామాన్ని అధ్యయనం చెయ్యడంలో ఫిజికల్ ఆంత్రోపాలజీ, ప్రైమటాలజీ, ఆర్కియాలజీ, పాలియోంటాలజీ, న్యూరోబయాలజీ, ఎథాలజీ, భాషాశాస్త్రం, ఎవల్యూషనరీ సైకాలజీ, పిండశాస్త్రం, జన్యుశాస్త్రం వంటి అనేక శాస్త్రాలు భాగం పంచుకున్నాయి.[6] 8.5 కోట్ల సంవత్సరాల క్రితం, చివరి క్రెటేషియస్ పీరియడ్లో ప్రైమేట్స్, ఇతర క్షీరదాల నుండి వేరుపడ్డాయని జన్యు అధ్యయనాలు చూపుతున్నాయి. తొట్టతొలి శిలాజాలు మాత్రం 5.5 కోట్ల సంవత్సరాల క్రితం, పాలియోసీన్లో కనిపిస్తాయి.[7]
- హోమినోయీడియా (వాలిడుల) సూపర్ ఫ్యామిలీ లోని హోమినిడే కుటుంబం, అదే సూపర్ ఫ్యామిలీ లోని హైలోబాటిడే (గిబ్బన్లు) కుటుంబం నుండి 1.5 – 2 కోట్ల సంవత్సరాల క్రితం వేరుపడింది;
- హోమినిడే కుటుంబం లోని హోమినినే ఉప కుటుంబం (ఆఫ్రికన్ గొప్ప వాలిడులు), పోంగినే (ఒరంగుటాన్స్) నుండి 1.4 కోట్ల సంవత్సరాల కిందట వేరుపడింది;
- హోమినినే ఉప కుటుంబం లోని హోమినిని తెగ (మానవులు, ఆస్ట్రలోపిథెసీన్లు, ఇతర అంతరించిపోయిన ద్విపాద ప్రజాతులు, చింపాంజీలు), గొరిల్లి తెగ (గొరిల్లాలు) నుండి 80-90 లక్షల సంవత్సరాల క్రితం వేరుపడింది;
- హోమినిని తెగ లోని హోమినినా (మానవులు, అతడి ద్విపాద పూర్వీకులు), పానినా (చింపాంజీలు) అనే ఉపతెగలు 40-70 లక్షల సంవత్సరాల క్రితం వేరుపడ్డాయి.