![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/e/ec/FIDE_World_FR_Chess_Championship_2019_-_Magnus_Carlsen_%2528cropped%2529.jpg/640px-FIDE_World_FR_Chess_Championship_2019_-_Magnus_Carlsen_%2528cropped%2529.jpg&w=640&q=50)
மாக்னசு கார்ல்சன்
நார்வே நாட்டு சதுரங்க ஆட்டக்காரர் / From Wikipedia, the free encyclopedia
இசுவென் மாக்னசு ஓன் கார்ல்சன் (Sven Magnus Øen Carlsen, பிறப்பு: நவம்பர் 30, 1990)[1] ஒரு நோர்வே சதுரங்க கிராண்ட்மாஸ்டர் ஆவார். இவர் பன்னாட்டு சதுரங்க கூட்டமைப்பின் உலகத் தரவரிசையில் முதலிடம் எட்டிய இளம்திறனாளர் ஆவார். இவரது எலோ தரவுகோள் 2872ஆக உள்ளது.
மாக்னசு கார்ல்சன் Magnus Carlsen | |
---|---|
![]() 2019 இல் கார்ல்சன் | |
பிறப்பு | சுவென் மாக்னசு ஓன் கார்ல்சன் 30 நவம்பர் 1990 (1990-11-30) (அகவை 33) தோன்சுபர்க், நோர்வே |
நாடு | நோர்வே |
பட்டம் | கிராண்ட்மாஸ்டர் (2004) |
உலக வாகையாளர் | 2013–இற்றை |
பிடே தரவுகோள் | 2856 (திசம்பர் 2021) |
உச்சத் தரவுகோள் | 2882 (மே 2014) |
தரவரிசை | இல. 1 (திசம்பர் 2021) |
உச்சத் தரவரிசை | இல. 1 (சனவரி 2010) |
வலைத்தளம் | |
magnuscarlsen |
இவர் ஐந்து தடவைகள் உலக சதுரங்க வாகையாளராகவும், மூன்று தடவைகள் உலக விரைவு சதுரங்க வாகையாளராகவும், ஐந்து தடவைகள் உலக பிளிட்சு சதுரங்க வாகையாளராகவும் விளங்கியுள்ளார். முதன்முதலில் 2010 இல் பிடே உலகத் தரவரிசையில் முதலிடத்தை அடைந்தார். மேலும் காரி காஸ்பரோவிற்கு அடுத்தபடியாக உலகில் தமது காலத்தில் அதிக மதிப்பிடப்பட்ட வீரராக உள்ளார். இவரது உச்ச மதிப்பீடு 2882 என்பது பாரம்பரிய சதுரங்க வரலாற்றில் மிக உயர்ந்ததாகும். அத்துடன் பாரம்பரிய சதுரங்கத்தில் மேல் மட்டத்தில் மிக நீண்ட கால ஆட்டமிழக்காதவர் என்ற சாதனையையும் படைத்துள்ளார்.[2]
சதுரங்க மேதையான கார்ல்சன் தனது 13-ஆவது அகவையில் டாட்டா கோரசு தொடரின் சி பிரிவில் முதலிடம் பெற்றார். பின்னர் சில மாதங்களில் கிராண்ட்மாஸ்டர் பட்டம் பெற்றார். 15-ஆவது அகவையில் நோர்வே சதுரங்க வாகையாளரானார். 18-ஆவது அகவையில் 2800 என்ற மதிப்பீட்டைக் கடந்து, மிக இளவயதில் இந்த மதிப்பீட்டைப் பெற்ற சாதனையாளரானார். தனது 19-ஆவது அகவையில், பிடே உலக தரவரிசையில் முதலிடத்தைப் பெற்று, இளவயதில் முதலிடம் பெற்றவர் என்ற பெயரைப் பெற்றார்.
கார்ல்சன் உலக சதுரங்க வாகையாளராக 2013 போட்டியில் விசுவநாதன் ஆனந்தை வென்றார். 2014 இல் ஆனந்தை மீண்டும் வென்று பட்டத்தைத் தக்க வைத்துக் கொண்டார். அதே ஆண்டில் உலக விரைவு வாகையாளர், பிளிட்சு வாகையாளர் பட்டங்களையும் வென்று மூன்று உலகப் பட்டங்களை ஒரே ஆண்டில் பெற்று சாதனை படைத்தார். இம்மூன்று பட்டங்களையும் மீண்டும் அவர் 2019 இல் பெற்றார். 2016 இல் செர்கே கரியாக்கின், 2018 இல் பாபியானோ கருவானா, 2021 இல் இயன் நெப்போம்னியாட்சி ஆகியோரை வென்று உலக சதுரங்க வாகையாளர் பட்டங்களைத் தக்கவைத்துக் கொண்டார்.
ஒரு இளைஞனாக அவரது தாக்குதல் பாணியால் அறியப்பட்ட கார்ல்சன், பின்னர் ஒரு உலகளாவிய வீரராக வளர்ந்தார். எதிராளிகள் தனக்கு எதிராகத் தயார்படுத்துவதை மிகவும் கடினமாக்குவதற்கும், விளையாட்டுக்கு முந்தைய கணினிப் பகுப்பாய்வின் பயன்பாட்டைக் குறைப்பதற்கும் அவர் பல்வேறு திறப்புகளைப் பயன்படுத்தி விளையாடுகிறார். சதுரங்க ஆட்டம் ஒன்றில் நடுப்பகுதி ஆட்டமே தனக்கு மிகவும் பிடித்த பகுதியாக இருப்பதாக அவர் கூறுகிறார்.[3] அவரது நிலைப்பாட்டின் தேர்ச்சியும் இறுதி ஆட்டத்திறனும் முன்னாள் உலக வாகையாளர்களான பாபி பிசர், அனத்தோலி கார்ப்பொவ், காப்பாபிளான்க்கா, வசீலி சிமிசுலோவ் ஆகியோருடன் ஒப்பிட முடிகிறது.