![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/5/5f/Old_Market_Roundabout%252C_Bristol.jpg/640px-Old_Market_Roundabout%252C_Bristol.jpg&w=640&q=50)
போக்குவரத்துப் பொறியியல்
From Wikipedia, the free encyclopedia
போக்குவரத்துப் பொறியியல் (Transportation engineering) அறிவியல், தொழில்நுட்ப நெறிமுறைகளை எந்தவொரு போக்குவரத்து முறைமைக்குமான திட்டமிடல், வடிவமைப்பு, இயக்கம், மேலாண்மை ஆகியவற்றுக்குப் பயன்படுத்தும் பொறியியல் புலமாகும். இது மக்களையும் பொருள்களையும் சுற்றுச்சூழல் நலம் ஊறுபடாதவாறு காப்பாகவும் திறம்படவும் வேகமாகவும் பொருளியலாகச் சிக்கனமாகவும் உயரேந்துடனும் போக்குவரத்து செய்யவேண்டும் [சான்று தேவை]. இது குடிசார் பொறியியல் (கட்டிடப் பொறியியலின்) உட்புலம் ஆகும்.[1] குடிசார் பொறியியலில், இதன் முதன்மையை இதிலடங்கிய ஆறுவகை உட்புலங்களில் இருந்து உணரலாம். இதில் வான், விண்வெளிப் போக்குவரத்து, வானூர்திப் போக்குவரத்து, நெடுஞ்சாலைப் போக்குவரத்து, குழாய்வழிப் போக்குவரத்து, நீர்வழிப் போக்குவரத்து, துறைமுகப் போக்குவரத்து கடலோரப் போக்குவரத்து, நாவாய்ப் போக்குவரத்து, நகர்ப்புறப் போக்குவரத்து ஆகியன அடங்கும்.[2]
![Thumb image](http://upload.wikimedia.org/wikipedia/commons/thumb/5/5f/Old_Market_Roundabout%2C_Bristol.jpg/640px-Old_Market_Roundabout%2C_Bristol.jpg)
போக்குவரத்துப் பொறியியலின் திட்டமிடல் கூறுபடுகள் நகரத் திட்டமிடல் அடிப்படைகளோடு உறவுடையதாகும். இதில் தொழில்நுட்ப முன்கணிப்பு முடிவுகளும் அரசியல் காரணிகளும் அடங்கும். பயணர்களின் பயன முன்கணிப்பில் வழக்கமாக நகர்ப்புறப் போக்குவரத்து படிமம் பயன்படுகிறது. இப்படிமத்தில், பயண நேர்வின் மதிப்பீடு (எந்நோக்கத்துக்காக, எத்தனை பயணங்கள்), பயணப் பரவல் (முனையத் தேர்வு, அதாவது பயணர் போகுமிடத் தேர்வு), முறைமைத் தேர்வு (எந்த போக்குவரத்து முறைமையைப் பயன்படுத்துவது எனும் முடிவு), வழித்தட தேர்வு (எந்தத் தெருக்களை அல்லது வழிகளைப் பயன்படுத்துவது எனும் முடிவு) ஆகியவை தேவையாகின்றன. மேலும் நுட்பமான முன்கணிப்பில் பயணர் முடிவுகள் (தானி உரிமை உட்பட), பயணப்பிணைப்பு (ஒரு முறையிலேயே தனிப் பயணங்களை இணைக்கும் முடிவுகள்) வீடு அல்லது வணிக இருப்பிடத் தேர்வு( இது நிலப் பயன் முன்கணிப்பு எனப்படுகிறது) ஆகியனவும் உள்ளடங்கும். பயணர்களின் பயணங்களே, போக்குவரத்து அமைப்பின் உச்ச நெரிசலை முடிவு செய்வதால், போக்குவரத்துப் பொறியியலின் குவிமையமாகின்றன.
போக்குவரத்துப் பொறியியல் சார்ந்த வடிவமைப்புக் கூறுபாடுகள் போக்குவரத்து வசதிகளின் அளவுகளைத் தீர்மானித்தல், தொடர்புடைய கட்டுமானக் கூறுபாடுகளின் அளவுகளைத் தீர்மானித்தல், சாலைகள் முதலியவற்றின் வடிவவியல் கூறுபாடுகளைத் தீர்மானித்தல் போன்றவற்றை உள்ளடக்கியவை ஆகும்.