பாலின அடையாளம்
ஒருவரின் தனது பாலினத்தைப் பற்றிக் கொண்டுள்ள தனிப்பட்ட உணர்வும் அது தொடர்பான அனுபவமும் / From Wikipedia, the free encyclopedia
பாலின அடையாளம் (Gender identity) என்பது ஒருவர் தன் பாலினத்தை எவ்வாறு உணர்கிறார் அதாவது அடையாளப் படுத்திக் கொள்கிறார் என்பதைக் குறிக்கும்.[1] பாலின அடையாளம் ஒருவருக்குப் பிறப்பின்வழி உயிரியலாக அமையும் பாலாக அமையலாம் அல்லது அதில் இருந்து வேறுபடலாம்.[2]
விளக்கமாக, ஒருவர் தன்னுடய பாலினத்தை எவ்வாறு நடைமுறையில் பட்டறிகிறாரோ அதுவே அவருடய பாலின அடையாளம் (gender identity) ஆகும். அதாவது, ஒருவர் தான் எந்த பாலைச் சேர்ந்தவர் என்று உணர்கிறாரோ அதுவே அவரின் பாலின அடையாளம் ஆகும். பாலினம் என்பது ஒரு சமூகப் பண்பாட்டு உருவாக்கம் ஆகும். பொதுவாக ஆண், பெண் என்ற இரு பால்கள் மட்டுமே சமூகத்தால் ஏற்கப் படுகின்றன.
பாலின வெளிப்பாடு என்பது ஒருவரது பாலின அடையாளத்தின் வெளிப்பாடு ஆகும்; ஆனால், இந்நிலை எப்போதும் அமையவேண்டும் என்பதில்லை.[3][4] ஒருவர் குறிப்பிட்ட பாலினப் பாத்திரத்துக்கு உரிய நடத்தைகளையும் உளப்பான்மைகளையும் தோற்ற நிலைமைகளையும் வெளிப்படுத்தினாலும், அவ்வெளிப்பாடு கட்டாயமாகப் பாலின அடையாளமாக அமையவேண்டியதில்லை. பாலின அடையாளம் எனும் சொல்லை முதலில் இராபர்ட் ஜே. சுட்டோல்லர் 1964 இல் உருவாக்கினார்.[5]
அனைத்து சமூகங்களும் பிற சமூக உறுப்பினர்களில் இருந்து வேறுபடும் அல்லது இணையும் ஒருவரது தன்னடையாளத்தைச் சார்ந்த பாலினக் கருத்தினங்களின் தொகுப்பைக் கொண்டுள்ளது.[6] பெரும்பாலான சமூகங்களில், ஆண், பெண்ணைக் குறிக்கும் இயற்பண்புகளைச் சார்ந்த அடிப்படை பாலினப் பிரிவு நிலவுகிறது;[7] இந்தவகைப் பெண்மை, ஆண்மை எனும் பாலின இருமையை பால், பாலினம் சார்ந்த (பால், பாலின அடையாளம், பாலின வெளிப்பாடு போன்ற) அனைத்துக் கூறுபாடுகளிலும் அனைத்து மக்களும் பின்பற்றுகின்றனர்.[8] சிலர் தாம் பிறப்பின்வழி உயிரியலாகப் பெற்ற பால் அமைவை அதன் அனைத்து முகங்களிலும் அடையாளப் படுத்திக் கொள்வதில்லை;[9] இதில் பெயர்பாலினரும் இருமையை ஏற்காத விதிர்பாலினரும் (genderqueer) அடங்குவர். மேலும், சில சமூகங்களின் உள்ள மூன்றாம் பாலினரும் (அலிகளும்) அடங்குவர்.
வழக்கமாக, பாலின அடையாளம் ஒருவரின் மூன்றாம் அகவையில் தோன்றும்.[10][11] மூன்றாம் அகவைக்குப் பிறகு, இந்நிலையை மாற்றுவது அரிது.[11] அப்படி மாற்ற எடுக்கும் முயற்சிகள் வெற்றி பெறாமல் பாலினக் கலைவு ஏற்பட வாய்ப்புள்ளது.[12] பாலின அடையாளம் உயிரில், சமூகக் காரணிகளால் விளைகிறது.