![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/f/f8/Lepton.png/640px-Lepton.png&w=640&q=50)
அணுவடித்துகள்
அதன் அளவு அல்லது வெகுஜனமானது அணுவின் அளவை விடக் குறைவாகவோ அல்லது அணு இயற்றப்பட்டதாகவோ இருக்க / From Wikipedia, the free encyclopedia
இயற்பியலில், அணுவடித்துகள் (அல்லது துணை அணுத்துகள் அல்லது அணுவகத்துகள்) என்பது அணுவைவிடவும் சிறியதான துகளாகும். அணுவைக் கட்டமைக்கும் துகள்களும் இதில் அடங்கும் (அணுவடித்துகள்களில் சில ஐதரசன் போன்ற மிகச் சிறிய அணுவை விடப் பெரியதாகவும் இருக்கும்!) அணுவடித்துகள்கள் இரண்டு வகையானவை:
- அடிப்படைத் துகள்கள் - இற்றைய கணிப்புகளின்படி இவை மேலும் சிறிய துகள்கள் எதனாலும் கட்டமைக்கப்படாதவை;
- கூட்டுத் துகள்கள்
![Thumb image](http://upload.wikimedia.org/wikipedia/commons/thumb/f/f8/Lepton.png/320px-Lepton.png)
துகள் இயற்பியல் மற்றும் அணுக்கரு இயற்பியல் ஆகியன இத்துகள்களைப் பற்றியும் இவற்றிற்கு இடையிலான வினைகள் பற்றியும் ஆயும் அறிவியல் துறைகளாகும்.
நவீன இயற்பியலின் (சீர்மரபு ஒப்புரு) அணுவடித்துகள்கள் கீழ்க்கண்டவாறு:
- குவார்க்குகளின் ஆறு வகை (இவ்வகைகள் மணம் என்று குறிக்கப்பெறுகின்றது): மேல், கீழ், ஏதிலி, கவர்ச்சி, அடி, உச்சி;
- ஆறுவகை லெப்டான்கள் (மென்மிகள்): எலக்ட்ரான், எலக்ட்ரான் நுண்நொதுமி, மியூவான், மியூவான் நுண்நொதுமி, டௌவான், டௌவான் நுண்நொதுமி;
- பன்னிரண்டு அளவி போசான்கள் (விசைக் கடத்திகள்): (மின்காந்தப் புலத்தின்) ஒளித்துகள், (வலிக்குறை விசைப்புலத்தின்) W மற்றும் Z போசான்கள் மற்றும் (வலிய விசைப்புலத்தின்) எட்டுப் பசைத்துகள்கள்;
- ஹிக்ஸ் போசான்[1][2][3]
இவை தவிர ஈர்ப்பு விசைக்கான கடத்தியாக கிராவிட்டான் என்ற துகள் ஒன்று இருப்பதற்கான சாத்தியங்களையும் பல கோட்பாடுகள் முன்வைக்கின்றன. இன்னும் பல வகையான அணுவடித்துகள்களும் இப்பேரண்டத்தில் இருப்பதற்கான சாத்தியங்களும் உள்ளன.
கூட்டுத் துகள்கள் (நேர்மின்னி அல்லது அணுக்கரு போன்றவை) இரண்டு அல்லது பல அடிப்படைத் துகள்களின் கட்டுற்ற நிலைகள் ஆவன. எடுத்துக்காட்டாய் ஒரு நேர்மின்னி என்பது இரண்டு மேல் குவார்க்குகள், ஒரு கீழ் குவார்க்கு ஆகியவற்றின் கூட்டு ஆகும். அதே போல ஹீலியம்-4 அணுவின் கருவானது இரண்டு நேர்மின்னிகள் மற்றும் இரண்டு நொதுமிகளினால் ஆனதாகும். கூட்டுத் துகள் என்பதில் அனைத்து ஹாட்ரான்களும் அடங்கும்: இவையாவன (நேர்மின்னிகள் மற்றும் நொதுமிகள் போன்ற) பேரியான்களும், (பையான்கள் மற்றும் கேயான்கள் போன்ற) மீசான்களும் ஆகும்.