From Wikipedia, the free encyclopedia
எம். ஏ. சுமந்திரன் என அழைக்கப்படும் மதியாபரணன் ஆபிரகாம் சுமந்திரன் (Mathiaparanan Abraham Sumanthiran, பிறப்பு: பெப்ரவரி 9, 1964), இலங்கை அரசியல்வாதியும், நாடாளுமன்ற உறுப்பினரும், இலங்கைத் தமிழ் மனித உரிமை ஆர்வலரும், வழக்கறிஞரும், சனாதிபதி சட்டத்தரணியும் ஆவார்.[1][2]
எம். ஏ. சுமந்திரன் M. A. Sumanthiran நாடாளுமன்ற உறுப்பினர், சனாதிபதி சட்டத்தரணி | |
|---|---|
 2013 இல் சுமந்திரன் | |
| இலங்கை நாடாளுமன்ற உறுப்பினர் | |
பதவியில் உள்ளார் | |
| பதவியில் ஆகத்து 2020 | |
| தொகுதி | யாழ்ப்பாண மாவட்டம் |
| பதவியில் ஆகத்து 2015 – மார்ச் 2020 | |
| தொகுதி | யாழ்ப்பாண மாவட்டம் |
| பதவியில் 2010–2015 | |
| தொகுதி | தேசியப் பட்டியல் |
| தனிப்பட்ட விவரங்கள் | |
| பிறப்பு | மதியாபரணன் ஆபிரகாம் சுமந்திரன் 9 பெப்ரவரி 1964 இணுவில், இலங்கை |
| குடியுரிமை | இலங்கையர் |
| தேசியம் | இலங்கைத் தமிழர் |
| அரசியல் கட்சி | இலங்கைத் தமிழரசுக் கட்சி |
| பிற அரசியல் தொடர்புகள் | தமிழ்த் தேசியக் கூட்டமைப்பு |
| முன்னாள் கல்லூரி | சென்னைப் பல்கலைக்கழகம் மொனாஷ் பல்கலைக்கழகம் |
| தொழில் | வழக்கறிஞர் |
| இணையத்தளம் | www |
சுமந்திரன் 1964 பெப்ரவரி 9 இல்[2] இலங்கையின் யாழ்ப்பாண மாவட்டம், இணுவிலில் பிறந்தார்.[3][4] இவரது குடும்பம் வடமராட்சி பிரதேசத்தைச் சேர்ந்தவர்கள். தந்தை கரவெட்டியைச் சேர்ந்தவர். தாயார் குடத்தனையைச் சேர்ந்தவர்.[4] கொழும்பில் வளர்ந்த சுமந்திரன் கொழும்பு றோயல் கல்லூரியில் கல்வி கற்றார்.[4][5] பின்னர் சென்னைப் பல்கலைக்கழகத்தில் இயற்பியலில் இளங்கலைப் பட்டம் பெற்றார்.[6] பின்னர் இலங்கை சட்டக் கல்லூரியில் சட்டம் பயின்று வழக்குரைஞரானார்.[6]
2001 ஆம் ஆண்டில் ஆத்திரேலியாவின் மொனாஷ் பல்கலைக்கழகத்தில் இணைய மற்றும் இலத்திரனியல் சட்டத்தில் முதுகலைப் பட்டம் பெற்றார்.[6][7]
சுமந்திரன் மெதடிய கிறித்தவர் ஆவார்.[8] இலங்கை மெதடிசத் திருச்சபையின் துணைத் தலைவராகப் பணியாற்றியவர்.[9][10]
1991 ஆம் ஆண்டு முதல் கொழும்பில் வழக்குரைஞராகப் பணியாற்றி வரும் சுமந்திரன் உரிமையியல் வழக்குகளில் மீயுயர், மேன்முறையீட்டு, உயர், மற்றும் மாவட்ட நீதிஅமன்றங்களில் வாதாடி வருகிறார்.[6] இலங்கை காப்புறுதிக் கூட்டுத்தாபன, மற்றும் இலங்கை கடல்வள சேவைகள் ஆகியவற்றைத் தனியார் மயமாக்கல் போன்றவற்றில் இவர் வெற்றிகரமாக வாதாடியுள்ளார்.[6] அடிப்படை மனித உரிமை மீறல்கள், நாடாளுமன்ற சட்டமூலங்களுக்கான சட்டமீளாய்வு போன்ற வழக்குகளில் வாதாடியுள்ளார்.[6] கொழும்பில் இருந்து தமிழர் கட்டாய வெளியேற்றங்களை இவர் தடுத்து நிறுத்தியுள்ளார்.[6][11]
சுமந்திரன் இலங்கை நாடாளுமன்றத்துக்காக ஏப்ரல் 2010 தேர்தலில் தமிழ்த் தேசியக் கூட்டமைப்பின் தேசியப் பட்டியல் உறுப்பினராகத் தெரிவு செய்யப்பட்டார்.[12][13][14] 2012 மே மாதத்தில் இவர் இலங்கைத் தமிழரசுக் கட்சியின் வெளிவிவகார மற்றும் சட்ட விவகாரங்களுக்கான செயலாளராக நியமிக்கப்பட்டார்.[15][16] 2014 செப்டம்பரில் தமிழரசுக் கட்சியின் இரண்டு உதவிச் செயலாளர்களில் ஒருவராக நியமிக்கப்பட்டார்.[17][18][19][20] சுமந்திரன் 2015 நாடாளுமன்றத் தேர்தலில் யாழ்ப்பாண மாவட்டத்தில் ததேகூ வேட்பாளராகப் போட்டியிட்டு 58,043 விருப்பு வாக்குகள் பெற்று மீண்டும் நாடாளும்ன்றம் சென்றார்.[21][22]
2017 சனவரியில் சுமந்திரனைக் கொலை செய்யத் திட்டமிட்டதாகக் குற்றம் சாட்டி இலங்கை காவல்துறையின் பயங்கரவாத புலனாய்வுத் திணைக்களத்தினர் விடுதலைப் புலிகளின் முன்னாள் உறுப்பினர்கள் சிலரைக் கைது செய்தனர்.[23][24] 2016 திசம்பர் 12 இலும் 2017 சனவரி 13 இலும் மருதங்கேணி அருகே சொரணம்பட்டு-தாளையடி வீதியில் கொலை முயற்சி இடம்பெற்றதாகக் குற்றம் சாட்டப்பட்டது.[25][26] விடுதலைப் புலிகளின் முன்னாள் உறுப்பினர்கள் ஐவர் கைது செய்யப்பட்டனர்.[23][27][28] ஐந்து சந்தேக நபர்களும் 2017 செப்டம்பரில் யாழ்ப்பாணம் உயர் நீதிமன்றால் பிணையில் விடுவிக்கப்பட்டனர்.[29] 2018 சூலையில் இவர்கள் கொழும்பு உயர்நீதிமன்றத்தில் பயங்கரவாத தடுப்புச் சட்டத்தின் கீழ் குற்றம் சாட்டப்பட்டனர்.[30][31][32]
2020 நாடாளுமன்றத் தேர்தலில் சுமந்திரன் மீண்டும் தெரிவு செய்யப்பட்டு நாடாம்ளுமன்றம் சென்றார்.[33][34][35] யாழ்ப்பாண மாவட்ட வேட்பாளர்களுக்கான விருப்பு வாக்குகள் யாழ்ப்பாணம் மத்திய கல்லூரியில் 2020 ஆகத்து 6 இல் எண்ணப்பட்டன. இதன்போது பல்வேறு வேட்பாளர்களின் ஆதரவாளர்களுக்கிடையே வாக்குவாதங்களும் கைகலப்புகளும் இடம்பெற்றன.[35] ததேகூ வேட்பாளர் சசிகலா ரவிராஜ் (நடராஜா இரவிராஜின் மனைவி) வாக்கு எண்ணப்படுதலில் சுமந்திரன் தலையிட்டதாக குற்றம் சாட்டினார்.[36][37] சுமந்திரன் இக்குற்றச்சாட்டுகளை மறுத்திருந்தார்.[35][38][39] வாக்குக் கணிப்பீட்டில் கலந்து கொண்ட சுயாதீனமான தேர்தல் கண்காணிப்பு அமைப்பு, வேட்பாளர்களும் அவர்களது ஆதரவாளர்களும் வாக்குகள் எண்ணப்படும் செயல்முறையை சரியாகப் புரிந்து கொள்ளாமையும், சமூக ஊடகங்களில் ஆதாரமற்ற வதந்திகள் பரப்பப்பட்டமையுமே இந்த வன்முறைச் சம்பவத்திற்குக் காரணம் எனக் குற்றம் சாட்டியது.[40]
| தேர்தல் | தொகுதி | கட்சி | கூட்டணி | வாக்குகள் | முடிவு | ||
|---|---|---|---|---|---|---|---|
| 2015 நாடாளுமன்றம்[41] | யாழ்ப்பாண மாவட்டம் | இலங்கைத் தமிழரசுக் கட்சி | தமிழ்த் தேசியக் கூட்டமைப்பு | 58,043 | தெரிவு | ||
| 2020 நாடாளுமன்றம்[42] | யாழ்ப்பாண மாவட்டம் | இலங்கைத் தமிழரசுக் கட்சி | தமிழ்த் தேசியக் கூட்டமைப்பு | 27,834 | தெரிவு | ||
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
