From Wikipedia, the free encyclopedia
හොන්ඒ රැජින (හංගුල්: 헌애왕후, හන්ජා: 獻哀王后) (964–1029) හෙවත් චොන්චු වැන්දඹු රැජින (천추태후, 千秋太后) යනුවෙන් හඳුන්වන්නේ ගොර්යෝහි ග්යොංජොං රජුගේ තෙවන වල්ලභ රැජිනියයි.[1] ඇගේ පුත්රයා වූ ගොර්යෝහි මොක්ජොං රජුගේ බාල වියේ දී ඇය විසින් 997 සිට 1009 දක්වා ගොර්යෝවේ රාජ්ය පාලනය මෙහෙයවා ඇත. ඇගේ කථා පුවත එම්ප්රස් චොන්චු නම් රූපවාහිනී කතාමාලාව සඳහා පාදක වී ඇත.[2][3].
හොන්ඒ රැජින උපත ලැබූයේ ගොර්යෝ රාජධානියේ රාජකීය පෙළපතේ හ්වංජු ශාඛාවේ ය. ඇගේ පියා වූ වං උක් (හංගුල්: 왕욱, හන්ජා: 王旭) යනු ගොර්යෝහි තේජෝ රජුට දාව ඔහුගේ සිව්වන බිසව වූ සින්ජොං රැජිනට (හංගුල්: 신정왕후, හන්ජා: 神靜王后) උපන් පුත්රයෙකි. වං උක් තේජෝගේ අටවන පුත්රයායි. ඇයට වැඩිමහල් සොහොයුරකු සිටි අතර, වං චි නම් ඔහු අනාගතයේ ගොර්යෝහි සොංජොං රජු බවට පත් විය. ඇගේ නැගණිය පසුව ගොර්යෝහි හ්යොන්ජොං රජුගේ භාර්යාවක බවට පත් විය.
හොන්ඒ රැජින පිය පෙළපත ඔස්සේ තේජෝ රජුගෙන් පැවතෙන්නියක වුව ද, ඇයට ගොර්යෝ රාජකීය පෙළපත් නාමය වූ වං (හංගුල්: 왕, හන්ජා: 王) යන්න ලබා දී නැත. ඒවෙනුවට ඇය සහ ඇගේ නැගණිය විසින් ඇගේ පීතෘපාර්ශ්වීය මිත්තණිය වූ සින්ජොං රැජිනගේ පෙළපත් නාමය වන හ්වංබෝ (හංගුල්: 황보, හන්ජා: 皇甫) යන්න භාවිතා කොට ඇත.
හොන්ඒ රැජින සිය පළමු මස්සිනා වූ ගොර්යෝහි ග්යොංජොං සමග විවාහ වූවා ය. ඇගේ සැමියාගෙන් පසු සිහසුනට පත්වූ ගොර්යෝහි සොංජොං රජු ඇගේ සොහොයුරා වේ. 997දී ඇගේ පුත්රයා වූ ගොර්යෝහි මොක්ජොං සිහසුනට පත්වීමත් සමග, ඇය අනුරාජයා බවට පත්වූවා ය. කෙසේනමුත්, ඇය කිම් චි-යැං සමග විවාහයට එකඟ වූ අතර, කිම් චි-යැංගේ පුත්රයකුට ඇය උපත ලබාදුන්නා ය. කිම් චි-යැං සිය පුත්රයාව සිහසුනට පත් කිරීමට කුමන්ත්රණ සිදුකළේ ය.
රජුව මරා දමා සිහසුන පැහැර ග්නනා බවට බවට තර්ජනය කරමින් කිම් චි-යැං විසින් මන්වොල්දේ රාජ මාලිගය ගිනිබත් කිරීමත් සමග, මොක්ජොං රජු ගං ජෝ සෙන්පතියාව කේසොං අගනුවර වෙත කැඳවී ය. ගං ජෝ සෙන්පතියා ක්ෂණිකව කිම් චි-යැං සහ ඔහුගේ ආධාරකරුවන්ට මරණ දණ්ඩනය පැනවී ය.
අනතුරුව ගං ජෝගේ සතුරන් වූ විද්වත් නිලධාරීන් පිරිසක් සෙන්පති රාජ්ය පාලනය සියතට ගන්නට සැලසුම් කරන බවට දූසමාන ආරංචි පතුරුවන්නට වූහ. මෙම ආරංචි රජුට ද සැලවූ අතර, රජු ගං ජෝව මරා දැමීමට සැලසුම් කළේ ය. මෙම කුමන්ත්රණය සහ රජුගේ සැකය පිළිබඳ ගං ජෝට දැනගන්නට ලැබිණි. ඒ අනුව ඔහු රජු ඇතුළු සිය සතුරන් සියලු දෙනාව විනාශ කරන මෙන් සිය හමුදාවන්ට අණකළේ ය. මොක්ජොං රජුව ඝාතනය කිරීමෙන් පසු, සෙන්පති ගං විසින් ගොර්යෝහි හ්යොන්ජොං සිහසුනට පත්කරන ලදී. චොන්චු රැජිනියව හ්වංජු වෙත පිටුවහල් කෙරිණි. 1029දී ඇය නැවත රාජ මාලිගයට පැමිණි අතර, සුංදොක් මාලිගයේ ඇගේ කුටියේ දී අවසන් හුස්ම හෙළුවා ය.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.