Магдебургске право
From Wikipedia, the free encyclopedia
From Wikipedia, the free encyclopedia
Магдебургске варошске право, нѣм. Magdeburger Weichbildrecht, лат. Ius theuthonicum — феодалне варошске право, вывинуте в XII. сторочу в нѣмецком Магдебургу (1188), а з часом прияте во вецерох мѣстах Европы, котре ся стало символом варошского самоурядованя феодалной епохы. В славянскых землях ся тыж называло «нѣмецкым правом».[1][2][3]
Интензивный рост варошох и вывин варошского права в нѣмецкых землях (в том числѣ найросширенѣйшых его систем — Магдебургского и Любекского варошского права) звычайно звязують з походами X.–XI. ст. нѣмецкых императорох до Италии, де ся они запознали з варошами, а наступно подля взору и звычаю их, зокрема, заклали ряд саксонскых варошох на рѣках Зале, Лаба тай Одра.[4][3]
В XIII. сторочу магдебургске право ся зачинать росширьовати на Чешске и Мадярске кральовства, а од половкы стороча на землѣ Польского кральовства, На польскых землях за два стороча таке право достали 555 вароши, в их числѣ тоты, што днесь суть на западѣ Украины. Магдебургске право екзистовало до XVIII.–XIX. ст. а поступно было вытѣснене новѣйшыма законами новонасталых держав.[1]
Варошы з магдебургскым правом мали самоурядованя, даньову и судову имуниту, право властности на землю, полеготы про ремесла и торговлю и были вывольнены од феодалных повинностей (окрем фурманкы). Магдебургске право обсяговало порядок выбраня варошской влады, ей функции, основны нормы цивилного и криминалного права, правила судного поступку и зданьованя, вызначало чинность торговцьох, ремеселникох и др.[3]
Едным з економично найважнѣйшых было право вольной торговлѣ. Напримѣр, в Киевѣ через XVI.–XVII. ст. платило «право складу», подля чого чужоземцѣ, што везли товары Днѣпром або по суху, мусѣли стати ту на 10–20 днѣ и продавати часть свого товару. З того мали добрый хосен городска рада и тамошны гандляре, котры скупововали гуртом значны партии транзитных товарох, а пак их перепродавали. Складске право мали тыж Луцк, Камянець, Львов.[2]
В Мадярском кральовствѣ привилегованы «корунны варошѣ» (умѣщены на кральовскых землях) в конци XIII. ст. стали ся и центрами меджинародной торговлѣ. З Мадярского кральовства за границу, переважно в западны державы, вывозили найвеце сыровины, вино, маржину и конѣ, а ввозили передо вшиткым зложены и якостнѣйшы ремеселны выробкы, луксушны выробкы и присмачкы. Зоз Польщи импортовали соль, олово и звѣрячы скоры, из давной Руси переважно кожушины и воск. Меджинародну торговлю зоз западныма державами и Середоморьом найвецей вели Братислава и Трнава. В торговли з Польщов головну роль мала Левоча, а конця XIII. ст. посредником меджинародной торговлѣ меджи Польщов и Ардялом стали ся Кошицѣ.[5]
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
