Livio Andronico
From Wikipedia, the free encyclopedia
Livio Andronico (in latino: Livius Andronīcus; Tarde, 280 n.C. cchiù o mene – 200 n.C. cchiù o mene) [1] ha state'nu poete e drammaturghe latino.
Jndr'à le fonde andiche jè ccu frequenze indicate semblicemende cu 'u nomen Livio, ca pigghiò, 'na vota ca addevenìe liberto, da 'a gens addò avère trasute a fa parte quanne avère arrevate a Rome; ma mandenìe sembre, pigghiannele cumme cognomen, 'u nome sue greche de Andronico; le fonde andiche dicene ca ausave pure 'u nome de Lucio Livio Andronico.[2][3]
De nascita e cultura greche,[4] jidde facìe rappresendà a Rome jndr'à 'u 240 n.C. 'nu dramme tiatrale ca jè tradizzionalmende conziderate 'a prima opera letterarie scritte jndr'à lenga latina.[5] Facìe cchiù nnande 'nu sbuenne de otre opere, probbabbilmende le traducìe da Eschilo, Sofocle e Euripide.[6] Cu l'intende de avvicinà le giuvane romane a 'u studie d'a letterature, traducìe in versi saturni l'Odissea de Omero.
Le frammende ca onne rumaste de l'opera soje, pure ca sonde avveramende picche, ne facene rilevà l'influenze da 'a coeva letterature ellenistiche alessandrine e 'na particolare predilezione pe l'effette de pathos e le preziosisme stilistece, ca cchiù nnande jndr'à 'u timbe onne state codificate jndr'à lenga letterarie latina.[7] Pure ca Odusia soje rumase a lunghe in use cumme teste scolastiche,[8] l'opera soje ha state conziderate in età classiche cumme 'na cose assaije primitive e ca no valève quattre de 'nu solde, tande da essere generalmende schifate.[9][10]