Sofocle
From Wikipedia, the free encyclopedia
From Wikipedia, the free encyclopedia
Sofocle (Σοφοκλῆς / Sophoklễs) (Colono, 496 n.C. – Atene, 406 n.C.) ha state 'nu drammaturghe ateniese.
(IT)
«Molte sono le cose incredibili, ma nessuna è più incredibile dell’uomo.» |
(ROA–TARA)
«Assaije sonde le cose ingredibbele, ma nisciune jè cchiù 'ngredibbele de l'omme.» |
(Sofocle, Antigone) |
Jè conziderate, 'nzieme a Eschilo e Euripide, une de le cchiù granne poete traggece de l'andica Grecie.
Sofocle nascìe jndr'à 'u 496 n.C jndr'à 'u demo de Colono, ca ere 'nu sobborghe de Atene. Figghie de Sophilos, ricche ateniese proprietarie de schiave, recevìe 'a megghia formazione culturale e sportive, cose ca le permettìe a 15 anne de candà da soliste pu core pa vittorie de Salamina.
'A carriera soje de autore traggeche jè coronate da 'u successe: a 27 anne conguiste 'u prime trionfe gareggianne cu Eschilo.
Plutarco, jndr'à Vite de Cimone, conde 'u prime trionfe de Sofocle, uagnone cu 'u talènde, condre 'u famose assaje e 'nzigne a quidde mumende ingondrastate Eschilo, spicciate jndr'à 'nu mode insolite senze 'u sortegge consuete de le arbitre.
Eschilo, successivamende a sta sconfitte, scacchiò 'u volondarie esilie in Sicilia. In totale, Sofocle, conguiste 24 vittorie, arrivanne seconde jndr'à tutte le otre occasiune.
Amiche de Pericle e 'mbengate jndr'à vite politeche, ha state strateghe 'nzieme a quist'urteme jndr'à uerre condre a Samo (441-440 n.c.). Pò ha recuperte 'n'imbortande careche finanziarie jndr'à 'u 443-442 n.C. e, quanne 'u simulacre d'u Die Asclepio avenìe trasferite da Epidauro a Atene, Sofocle avenìe disegnate a ospitarle jndr'à casa soje 'mbonde a quanne no g'avesse state pronde 'u sanduarie destinate a 'u Die. Ste fatte testimoniescene 'a granne stime ca 'u poete greche tenève verse le congittadine sue.
Jndr'à le funziune pubbleche sue condrebbuì a l'elabborazione d'a costituzione de le Quattrecinde.
Se 'nzurò cu l'ateniese Nicostrata ca le davìe 'nu figghie, Iofone. Avìe pure 'n'amande, chiamate Teoris, 'na femmene de Sicione, da 'a quale avìe 'n'otre figghie, Aristone, ca pò devènde attane de Sofocle 'u uagnone.
Se dice ca picche apprime d'a morta soje, Iofone accumenzò 'nu processe condre a l'attane Sofocle pe 'na questione d'eredità, dicenne ca s'avere studechite pe l'età. 'A semblice letture de l'urtema opera soje mettìe fine a 'u processe.
Murìe jndr'à 'u 406 n.C. e l'urtema traggedie, l'Edipe a Colono, avenìe rappresendate apprisse 'a morta soje 'u stesse anne cumme segne de granne onore e recanoscenze. Seconne 'a storiografije andiche, notoriamende amande de aneddote pittoresche assaije, murìe affucate da 'n'acine d'uve.
Sofocle abbolìe l'obblighe d'a "triloggie legate", regolarizzò jndrà traggedie'u 'mbieghe d'u terze attore (ggià presende jndr'à certe scene de l'Orestea de Eschilo), purtò da dudece a quinnece le coreute e perfezionò l'ause de scenografije (innovaziune de le quale ne parle pure Aristotele, Poetica, 49a).
'A 'ndroduzione d'u terze attore, da 'u quale resultave superate 'a rigide condrapposizione de doje posiziune anditetiche, avesse combortate 'na cchiù granne articolazione de le rapporte inderpersonale e 'na nova scioltezze dinameche d'u ritme tiatrale. L'aumende d'u numere de le coreute da dudece a quinnece 'nfatte consendive de carcà de cchiù 'a funzione d'u corifeo e de l'elemende spettacolare.
Sofocle screvìe, seconne 'a tradizione, 'a bellezze de cindevindetre treggedie, de le quale però ne rumanene sulamende sette: Antigone (442 n.C.), Aiace, Edipe Rre, Elettra, Filottete (409 n.C.), Le Trachinie e Edipe a Colono (406 n.C.).
Le eroe sue sonde sckaffate jndr'à 'nu munne de condraddiziune insanabbele, de conflitte cu forze inevitabbilmende destinate a travolgerle. 'U condrebbute sue origgenale a 'u sviluppe d'a traggedie greche avenìe rappresendate da l'accenduazione de l'umanità de le personagge, ca onne tutte de lore quacchecose de uaste, 'na tabe fiseche e psichiche. Le personagge sofoclèe sò pure generose e bbuène, ma assaije probbie sule e purtate a 'a traggedie da 'u male ca onne jndre de lore. Comungue, non ge apparene maje scrafagnate combletamende da 'u destine, ma probbie jndr'à vana lotte condre de jidde, recevone 'na chiene dimenzione umane, portatrice de 'nu destine de dannazzione e, condemboraneamende, de glorie.
Rispette a Eschilo, le core traggeche sofoclèe o secondarie a l'azione, partecipane sembre de mene attivamende e addevendane piuttoste spettature e commendature de le fatte. Jè de Sofocle 'a 'ndroduzione d'u monologhe (in greche ρήσις, rhesis) - pe esembie, chidde de Aiace e de Edipe - ca permetteve a l'attore de fà vedè l'abbilità soje e a 'u personagge de esprimere combiutamende le probbie penzire. 'A psicologgije de le personagge se approfondisce, iesse fore 'n'inedite analise d'a realtà e de l'omme. Sofocle tendò de luà l'enfasi (onkos) a le personagge sue, pe restituì combletamende 'a drammaticità, jndr'à 'nu munne descritte cumme ingiuste e senze 'a luce.
Jndr'à l'Edipe a Colono, 'u core ripete «'a sorta megghie jè no nascere probbie». Le avvenemìnde ca scrafagnane le esistenze de le eroe non ge sonde jndr'à nisciune mode spiegabbele o giustificabbele e, jndr'à stu fatte putime 'ndrucà l'inizie de 'na sofferte riflessione sus 'a condizione umane, angore osce a die attuale jndr'à 'u munne condemboranèe.
Quiste jè l'elenghe de le sette traggedie ca onne arrivate a nuje partenne da le cindevindetre ca Sofocle ave scritte jndr'à vita soje.
Condrolle de autorità | VIAF (EN) 101760867 · ISNI (EN) 0000 0001 2283 6085 · SBN (IT, EN) CFIV001293 · BAV (EN, IT, JA) 495/16680 · CERL (EN) cnp01259273 · LCCN (EN) n79127755 · GND (DE) 118615688 · BNE (ES) XX999398 (data) · BNF (FR) cb11925151n (data) · J9U (EN, HE) 987007268477305171 · NSK (HR) 000001986 · NDL (EN, JA) 00457180 · CONOR.SI (SL) 7913571 |
---|
Autore: Omero · Esiodo · Alceo · Saffo · Anacreonte · Simonide · Pindaro · Bacchilide · Corinna · Eschilo · Sofocle · Euripide · Aristofane · Isocrate · Lisia · Demostene · Menandro · Callimaco · Teocrito · Apollonio Rodio · Plutarco · Luciano di Samosata
Genere: Epiche · Eleggìe · Liriche greche (Liriche monodiche · Liriche corale) · Poesie giambiche · Epillio · Protrettiche · Romanze · Traggedie · Commedie
Storie | Epigrafije | Metriche
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.