Tibet
From Wikipedia, the free encyclopedia
Il Tibet (tibetan བོད་ Bod, ‹Pö›; chin. 西藏, Xīzàng) è ina vasta regiun alpina en l’Asia Centrala che furma la patria dal pievel tibetan. Cun in’autezza media da 4500 meters è il Tibet la regiun la pli auta dal mund, la quala vegn savens er numnada il ‹tetg dal mund›. La denominaziun ‹Tibet› vegn oz duvrada per l’entira regiun alpina tibetana, ma er per la Regiun autonoma dal Tibet, in territori cun administraziun communabla che la Republica Populara da la China ha annectà en ils onns 1950. La Regiun autonoma dal Tibet cumpiglia ca. la mesadad dal spazi cultural tibetan e sa chatta en il sid dal Tibet. Il nord e l’ost dal territori cultural tibetan furman parts da las provinzas chinaisas Qinghai, Gansu, Sichuan e Yunnan. En la lingua chinaisa uffiziala stat la noziun englaisa Tibet (q.v.d. il Xizàng chinais) adina per ‹Regiun autonoma dal Tibet›. Ma er la noziun tibetana bod respectivamain bod yul n’enserra per il pli betg las regiuns tibetanas da l’ost Amdo e Kham, regiuns che sa chattan per gronda part ordaifer la Regiun autonoma dal Tibet. Per che tut saja cumpiglià, sto vegnir duvrà il pled tibetan bod chen (Böchen) = ‹Tibet grond›.
![Thumb image](http://upload.wikimedia.org/wikipedia/commons/thumb/6/6b/Tibet-claims.jpg/320px-Tibet-claims.jpg)
![Thumb image](http://upload.wikimedia.org/wikipedia/commons/thumb/d/d0/YangpachenValley.jpg/640px-YangpachenValley.jpg)
![Thumb image](http://upload.wikimedia.org/wikipedia/commons/thumb/e/e1/Zhongdian-ciudad-antigua-calles-c08.jpg/640px-Zhongdian-ciudad-antigua-calles-c08.jpg)
L’appartegnientscha dal Tibet a la Republica Populara da la China è contestada en la publicitad (guarda er: status dal Tibet), schegea ch’i na dat nagin stadi sin il mund che mettess en dumonda quai a nivel diplomatic e politic.