Suzanne Perlman (☆ 18 di òktober 1923 na Budapest - † 26 di ougùstùs 2020 na London) tabata un pintor húngaro-hulandes. El a kosecha fama ku su portrètnan ekspreshonista i kuadronan paisahista i ta wòrdu konsiderá komo artista antiano, aunke el a produsí obranan den tres kontinente.[1].
E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.
Suzanne Perlman
| Pais di nashonalidat | Reino Hulandes  |
|---|---|
| Nòmber di dilanti | Suzanne |
| Fecha di nasementu | 18 òktober 1922 |
| Lugá di nasementu | Budapest |
| Fecha di fayesimentu | 2 ougùstùs 2020 |
| Lugá di fayesimentu | London |
| Okupashon | visual artist |
| Área di trabou | art of painting |
| A studia na | Columbia University School of the Arts, Art Students League of New York |
| Studiante di | Oskar Kokoschka, Sidney Gross |
| Lugá di trabou | Willemstad |
| Movemento | Expressionism |
| Distinshon | Orden di Oranje-Nassau |
| Wèpsait ofisial | http://www.suzanneperlman.co.uk |
| Obranan den kolekshon | Stedelijk Museum Amsterdam, Rijksmuseum |
| Status pa derecho di autor como creador | obra protehi pa derecho di autor |
Suzanne Sternberg a nase na Budapest den un famia hudiu ortodokso, ku tabatin un galeria di arte i antik.[2][3] Na edat di 17 aña e ta kasa ku un komersiante hulandes, Henri Perlman i ta bai biba na Rotterdam. Ku e menasa di persekushon nazi nan ta hui di Oropa logrando pa subi un barku dia 22 di yüni 1940 na Bordeaux, Fransia rumbo pa Kòrsou.[2][4][5]
Kòrsou
Na Willemstad e pareha ta habri "Fanny Shop", un negoshi na Hendrikplein ku tabata bende arte, souvenir i obhetonan antik. Henri i Suzanne Perlman ta haya tres yu hòmber. Banda di traha den e negoshi Suzanne Perlman tabata koresponsal pa Reuters y tabata skirbi resensia di arte i músika. E ta kuminsa pinta usando e piso riba e tienda komo su tayer.[4] Despues di Guera Mundial II e ta bay studia na e skol di arte di Universidat di Columbia na New York, Instituto Allende na Mexico i Saint Martin's School of Art na London.[6] Komo ku e no tabata por komunika adekuadamente na Papiamentu su obranan tabata sirbi komo vehíkulo pa ekspresa su apresio pa e isla i su poblashon. Inspirá pa Van Gogh e tabata ser atraí pa e hende humilde i trahadó, pintando portrèt di entre otro bendedó riba kaya, hungadó di domino riba kaya, bailadó ritual i tokadó di tambú.[7] E ta desaroyá un estilo ekspreshonista i tabata usa kolónan buyá, espesialmente den su obranan inisial. Durante su tempo na Kòrsou e ta wòrdu selekshona den dekada 60 pa partisipa na tayer bou guia di Oskar Kokoschka na Salzburg.
New York
Desde fin di añanan sesenta e ta muda pa New York, unda e ta kontinua su estudio na Art Students League of New York komo alumno di Sidney Gross, artista i pintor merikano. E ta profundisá su mes den e movementu di ekspreshonismo abstrakto i tabata traha obranan abstrakto den kual ainda tabata radia e palet kolorido di Kòrsou.[3]
London
Despues di e morto di su kasa na 1983 Perlman ta bai biba na London serka di su famia. E mudansa ta trece un renasementu den su bida i su pintamentu. Tema di su pinturanan tabata London su parkenan, kamindanan yen trafiko, bida nokturno i su bistanan arkitektóniko.
Perlman a keda aktivo komo pintor te su morto na e edat di 96 aña na 2020. Na 2009 e ta wordu dekorá komo ofishal den Orden di Oranje-Nassau.[3]
Na 1961 e tabatin su promé ekshibishon solista den Museo di Kòrsou.[8] Despues a sigui ekshibishonnan na London (1967), Puerto Rico (1968), Gouda (1970) i Paris (1971), unda e ta risibí e "Prix La France Afrique" pa su obranan ekshibí.[9] Na 1982 tin un di dos ekshibishon na Museo di Kòrsou na okashon di e 250 aña di eksistensia di e snoa di Willemstad, Kòrsou.[6] Mas despues su obranan a wòrdu ekshibí entre otro na Merka, Venezia i na London, unda na 2018 a tene un exposishon retrospektivo di su obranan den e sentro kultural ‘Dutch Centre’.[6]
Su obranan ta representa den e kolekshon priva di Prinsesa Beatrix i den kolekshonnan di varios museo, entre otro:
- Museo di Kòrsou, Willemstad
- Museo Hudiu Historiko di Kòrsou
- Museo Hudiu na Budapest
- Museo Hudiu na Amsterdam
- Museo Hudiu na Venezia
- Rijksmuseum Amsterdam
- Museo di Gouda
- Museo di London
- El Museo del Barrio, New York
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
