Epictet
From Wikipedia, the free encyclopedia
Epictet, en grèc ancian Ἐπίκτητος / Epíktêtos, que significa « òme crompat, servitor », (Ierapolis, Frigia, 50 • Nicopolis, Epir 125 o 130) èra un filosòf de l’escòla estoïciana. Pauc d'elements de sa vida son coneguts e daissat pas cap d'òbra escricha de sa man. Son discípol Arrian faguèt la transmission de son òbra en publicant las nòtas presas pendent las leissons del mèstre, en uèit libres, que la mitat sont ara perdut, e tanben un resumit de doctrina morala, lo Manual, tèxtes qu'aguèron de segur una influéncia sus Marc Aurèli.
Epictet presica sus la partida etica de la filosofia. Quitament s'ensenha tanben la logica estoïciana, insistís fòrça sus la preponderança de l'accion, e sa filosofia es d'en primièr una practica. Fidèl a las conceptions tradicionalas de l'escòla del portic, presenta l'Òme coma somés al destin ordonat pels dieus. Son ensenhament se vòl un biais per aténher lo bonaür per l'ataraxia, la patz de l'alma acceptant, amb coratge e amor, tot decret del destin inexorable, realizant leialament son dever malgrat las circonsténcia, e agissent amb benvolença cap als autres Òmes.