Vroomshoop

Vroomshoop is n doarp in de gemeente Tweanteraand in t noordn van Tweante. In 2005 har t ongevear 9091 inwonners. Vuur de gemeentelike herindelige van 2001 heurdn t too n Ham, wat Sallaand was. Rechtevoort ligt t deels in Tweante, deels in Sallaand.

De Skolle bie Vroomshoop

Geskiedenis

t Doarp is offisjeel esticht in 1850, mear wörd al in 1772 eneumd. Vroomshoop lig an t Oaveriessels Kanaal op de stean woer at n tak Zwolle-Vroomshoop eaindigt in t kanaal Almelo-Haandrik. t Kanaal wör lös edoan op 5 september 1856. n Eerstn kanaaloawergaank was ne skolle.

Vroomshoop wör esticht in verbaand met vervennige en hef doarumme n venkoloniaal karakter. Noa de vervennige wördn de of estökne groondn gebroekt duur de boern. Dee kömn völle oet Grönningn en Dreante op Vroomshoop op an. An de Tolndiek stoat nog n antal Grönningse boerderiejn.

Dr beent verskeaidene verhaaln wodöanig at Vroomshoop an öarn naamn ekömn is. n Eerstn is det monnikn en missionarisn vroger an ne bepoalde verhoging in t laandskop zeen konn woer at ze warn. Doarumme heetn dit peunt n vroomsen hoop. t Tweede verhaal is det disse verhoging vroger de Bromershoop heetn, en det Vroomshoop doar ne verbastering van is.

In mei 2007 wör dr kuierd det de oolde peuntbrugge vort mos, umdet t deenk zo oold en slecht oonderheuldn was det dr gin verkeer mear oawerhen kon. Dr zol nen dam vuur in de plaatse komn. De inwonners protesteerdn, umdet t historiese wearde hef en umdet de brugge wat toerisme antrekt.

Trein

In 1906 dee de NOLS de liene Mariënbarg-Almelo lös. t Stesjunnke bie Vroomshoop heetn eerst n Ham-Vroomshoop, mear t lea te vear vort van n Ham, woerduur at t later umme zat wör noar Vroomshoop. Toertieds lea dr ook nen spoerhaawn, mear den bleek vake te kleain en woer oeteaindelik vort edoan. Rechtevoort wörd de spoerliene bejag duur de Syntus, in opdracht van Connexion.

Besehenswärdigheden

Kort boetn Vroomshoop ligt t natuurgebeed de Zaandstuve. Kort doarbie he'j t zwembad en n iesbaan, dee at beaide n zelfdn naamn hebt.

Bekeande leu oet Vroomshoop

• Jarno Hams (11 november 1974 in Hengel), vanof 2004 töt 2012 7x Stoarkste Man van Neerlaand. Op egröaid in Vroomshoop, en aait doar woond, met oetzeundering van 2 joar in Emn.)

Oetgoande verbeendige

• verhaaln, filmkes en fotoos oet Vroomshoop

	Plaatsn in de gemeente Tweanteraand
	Broenehaar · De Pölle · Hallerhook · n Ham · Linde · Meer · Magel · Noord-Meer · Vjenne · Vjensewieke · Vroomshoop · Weitemanslaanden · Westerhaar · Westerhoevn Oaveriessel · Steden en dörpen in Oaveriessel      Nederlaand · Previncies · Gemientes