From Wikipedia, the free encyclopedia
Ua cidade ye ua ária urbanizada, que se defrencia de bilas i outras antidades urbanas atrabeç de bários critérios, ls quales ancluen populaçon, densidade populacional ó statuto lhegal, ambora sue clara definiçon nun seia percisa, sendo albo de çcussones dibersas. La populaçon dua cidade barie antre las poucas centenas de habitantes até la dezena de milhon de habitantes. Las cidades son las árias más densamente poboadas de l mundo. Son Paulo, ua de las cidades más populosas de l mundo, cun cerca de 10,9 milhones de habitantes,[1] ten ua densidade populacional de aprossimadamente 7,15 mil habitantes por quilómetro quadrado. Anquanto esso, l Brasil, paíç adonde la cidade stá lhocalizada, ten solo 20 hab/Km².
L termo "cidade" ye giralmente outilizado para chamar ua dada antidade político-admenistratiba urbanizada. An muitos causos, porén, la palabra "cidade" ye tamien ousada para çcrebir ua ária de urbanizaçon cuntígua (que puode abranger dibersas antidades admenistratibas). Por eisemplo, la cidade de Londres propiamente dita ten solo cerca de 8,6 mil habitantes. Porén, quando alguien se refre a la cidade de Londres, stá giralmente referindo-se a la sue region metropolitana, esto ye, a la sue ária urbanizada, que ten aprossimadamente 7,4 milhones de habitantes. Tóquio, muitas bezes çcrita ancorretamente cumo ua cidade, ye na berdade ua metrópole (都 - to) de l Japon, formada por 23 bairros defrentes.
,_Kolosseum_--_2024_--_0610.jpg)
La stória de las cidades de l mundo an giral ye lhonga, sendo que las purmeiras cidades tenerien surgido antre quinze la cinco mil anhos atrás, dependendo de las muitas definiçones eisistentes subre l que define un antigo assentamiento que queda cumo ua cidade. Sociadades que biben an cidades son muitas bezes chamadas de ciblizaçones. L ramo de la stória i de la urbanismo ancarregado de l studo de las cidades i de l porcesso de urbanizaçon ye la stória urbana. Las purmeiras berdadeiras cidades son por bezes cunsidradas grandes assentamientos permanentes adonde ls sous habitantes nun son más solo fazendeiros de la ária que cerca l assentamiento, mas passórun a trabalhar an acupaçones más specializadas na cidade, adonde l comércio, l stoque de quemidos i l poder fúrun centralizados.
Usando esta definiçon, las purmeiras cidades coincidas aparecírun na Mesopotámia, tales cumo Ur, al lhongo de l Riu Nilo, na Ciblizaçon de l Bal de l Ando i na China, antre aprossimadamente siete la cinco mil anhos atrás, giralmente resultante de l crecimiento de pequeinhos bilareijos i/ó de la fuson de pequeinhos assentamientos antre si. Antes desta época, assentamientos raramente alcançában tamanho significatibo, ambora sceçones cumo Jericó, Çatalhüyük i Mehrgarh eisistan. Harappa i Mohenjo-daro, ambas cidades de la Ciblizaçon de l Bal de l Ando, éran las más populosas destas antigas cidades, cun ua populaçon cunjunta stimada antre 100 i 150 mil habitantes.
L crecimiento de ampérios antigos i mediebales lhebou al aparecimiento de grandes cidades capitales i sedes de admenistraçon probincial, cumo Babilónia, Roma, Antioquia, Alexandrie, Cartago, Seléucida de l Tigre, Pataliputra (lhocalizada na atual Índia), Changan (lhocalizada na atual República Popular de la China), Custantinopla (atual Istambul), i, posteriomente i sucessibamente, dibersas cidades chinesas i andianas aprossimando-se ó mesmo superando la marca de l meio milhon de habitantes. Roma possuía más dun milhon de habitantes ne l seclo I a.C., sendo cunsiderada por muitos cumo la única cidade a superar esta marca até l ampeço de la Reboluçon Andustrial. Alexandria tena ua populaçon próssima a la de Roma na época (an un censo de 32, Alexandrie tenie 180 mil cidadones (adultos de l sexo masculino). Outros grandes centros admenistratibos, comerciales, andustriales i cerimoniales emergiran an outras árias, más notablemiente Bagdá, que segundo alguas stimatibas tenerie sido la purmeira cidade a superar la marca dun milhon de habitantes, al robés de Roma. Ne ls territórios anteriormente acupados pul Ampério Romano, la populaçon de las grandes cidades cairie drasticamente antre ls seclos B i BI, culas migraçones de l pobos bárbaros, l colapso de l Ampério Romano de l Oucidente i l ampeço de l feudalismo.
Durante la Eidade Média na Ouropa, ua cidade era tanto ua antidade político-admenistratiba cumo un agrupamiento de casas. Morar nas cidades passou a ser cunsidrada un ato de lhibardade, an relaçon a las oubrigaçones rurales para l Senhor i para la quemunidade feudal a la época. Stadtluft macht frei (L aire de las cidades torna-te lhibre) era un ditado popular an regiones de la atual Almanha. Na Ouropa, alguas cidades possuían un legislatibo própio, culas lheis de cidades sendo criadas fura de l campo, i bálidas solamente nas cidades, cul Senhor dua cidade sendo frequentemente outro que nun l mesmo de la region rural que cerca la cidade. Ne l Sacro Ampério Romano-Germánico (Almanha i Eitália mediebal), mas, alguas cidades nun tenian outro Senhor para alhá de l Amperador.
Alguas cidades cumo Beneza, Génoba ó Lubeck, tornórun-se Cidade-Stados poderosas, por bezes tomando cuntrole de tierras próssimas ó stablecendo stensibos ampérios marítimos. Tal fenómeno nun lhimitou-se solamente a la Ouropa, cumo ye l causo de Sakai, que possuía un cunsiderable grau de outonomie ne l Japon mediebal. Na Ouropa, nesta época las maiores cidades éran assi Beneza, que creciu debido al sou porto adonde se fazien las trocas comerciales para l centro de la Ouropa, ua spece de Roterdon, Florença, que se zambolbiu ne l Renacimiento debido a la andústria i a la arte i Lisboua, que fui dada por Don Quixote cumo a maior cidade de la época, gráçias al sou grande porto que era l maior de l mundo na época, çtronando assi la supremacie eiconómica de Beneza.
La maiorie de las cidades de l mundo, passado la ascenson de l feudalismo, éran pequeinhas an tenermos de populaçon, sendo que an 1500, eisistian solamente aprossimadamente dues dúzias de cidades cun más de l que cien mil habitantes. An 1700, este númaro era pouco menor de l que quarenta, un númaro que pularie para 300 an 1900, grácias a la Reboluçon Andustrial.
Anquanto las Cidades-Stados situadas ne l lhitoral de l mares Mediterráneo i Báltico passórun a zaparecer a partir de l seclo XVI, las grandes capitales ouropéias se beneficiórun de l crecimiento de l comércio que surgira após la ascenson dua eiquenomie transatlántica, abastecida pula prata benida de l Peru. Ne l final de l seclo XVIII, Londres habie tornado-se a maior cidade de l mundo, cun ua populaçon aprossimando-se de l un milhon de habitantes, cun Paris, Bagdá, Pequin, Istambul i Quioto sendo outras grandes cidades.
L ampeço de la Reboluçon Andustrial i la ascenson i l crecimiento de la andústria moderna, ne l final de l seclo XVIII, lhebou a la massiba urbanizaçon i a la ascenson de nuobas grandes cidades, purmeiramente na Ouropa, i passado outras regiones, a la medida an que las nuobas ouportunidades geradas nas cidades fazirun cun que grandes númaros de migrantes probenientes de quemunidades rurales anstalassen-se an árias urbanas.
Nun hai un padron mundial que defina ua cidade. Esta defeniçon baria de paíç para paíç. Tradecionalmente ls Ourganismos públicos cunsideran la eisisténcia dua cidade baseados an critérios quantitatibos. Na Dinamarca, por eisemplo, bastan 250 habitantes para ua quemunidade ourbana ser cunsiderada ua cidade, i na Islándia, solo 300 habitantes. Na Fráncia, un mínimo de dous mil habitantes ye neçairo, i na Spanha, dieç mil habitantes. Ourganizaçones i ampresas tamien puoden tener sous própios critérios de "cidade". La ourganizaçon de las Naciones Ounidas, por eisemplo, cunsidera ua cidade solamente árias urbanizadas que possuan más de 20 mil habitantes. Muitos países de lhéngua anglesa ténen dues definiçones de cidade, city i town, cujas defrenças barian de paíç para paíç.
L pabilhon eisrael na Bienal de Arquitetura de Beneza de 2000, por eisemplo, dou la seguinte definiçon de cidade: La cidade ye un habitat houmano que permite cun que pessonas formen relaçones uas culas outras an defrentes nibles de antimidade, anquanto permanecen anteiramente anónimos. Ye possible ambestigar la génese de la cidade quando se questiona l lhemite antre l que se cunsidrarie ua "grande casa" dua "pequeinha cidade", passando a percurar critérios qualitatibos más de l que quantitatibos. Tal lhemite se darie, supostamente, na medida an que na "pequeinha cidade" eisiste ua anstáncia que trancende a la propiedade de la "grande casa", ó seia, ua sfera que bai para alhá de las relaçones própias de la sfre pribada: la sfera pública, spressa material i admenistratibamente ne l spácio público. Na cidade, antendida assi, cada ua de las manifestaçones de l spácio pribado (las residéncias, por eisemplo) ténen lhibre acesso als outros spácios quemuns de la cidade. Desta forma, ye na cidade que se afatiban las defrentes relaçones de antimidade antre ls bários andibíduos i grupos (tal qual coloca la afirmaçon spuosta na Bienal de Beneza). Por este motibo, dibersos studiosos al lhongo de la stória, cumo Lewis Mumford i Giulio Carlo Argan, biran na cidade nun solo ua de las más purfeitas ambençones houmanas cumo l ambiente propício a la criaçon i al zambolbimiento houmano.
Ua cidade giralmente cunsiste ne l agrupamiento de árias de funçones dibersas, antre las quales puode-se çtacar aqueilhas residenciales, comerciales i andustriales, assi cumo las zonas mistas (percipales caraterizadoras de las cidades cuntemporáneas). Ne l giral, ua grande parte dua cidade ye acupada purmariamente por stablecimientos residenciales. Todas las defrentes zonas de la cidade son suportadas atrabeç de anfra-strutura cumo bias públicas i caminos de fierro. Rius i lagos puoden ser las únicas árias nun zambolbidas drento dua cidade, ambora ua série de amprendimientos recentes téngan se apropiado ourbanisticamente de tales regiones, a partir dua bison própia de l zambolbimiento sustentable i de la eicologie urbana.
Ber artigo percipal: UrbanismoUa aprossimaçon lhinear ounibersal an relaçon a las cidades ten sido aceito por un lhongo tiempo, subre la definiçon de cidade. Mas, esta aprossimaçon nun splica un númaro de aspetos de la bida de la cidade, cumo la dibersidade antre cidades, nuobas aprossimaçones i cuncepçones ténen sido studadas. Un nuobo pensamiento naciu a partir de la necidade de nuobas aprossimaçones, baseada nas eideias de l pós-struturalismo.
La cuncepçon urbanística tradecional define ua cidade atrabeç de trés caraterísticas: l númaro de habitantes an ua dada ária (densidade populacional), cunexones urbanas i un stilo particular de bida. Nanhue destas caraterísticas por si solo son suficientes para tornar un lhugar ua cidade.
Até tiempos recentes las cidades éran bistas sclusibamente cumo parte dua lhinha única i lhinear de zambolbimiento. Ampeçando cula Cidade-Stado de Atenas, esta aprossimaçon lhinear colocaba cada cidade an algun lhugar, i acraditaba que era solo ua queston de tiempo para que l próssimo stágio de zambolbimiento - que, an tese, starie yá prescrito - fusse alcançado. Para cada stágio un eisemplo fui eidantificado. Passo la passo, Atenas, i anton Beneza, Londres, i, atualmente, Los Angeles, cada ua, an sou período mássimo de zambolbimiento, era bisto cumo l redadeiro i más abançado stágio dua cidade pós-modernista. Esta aprossimaçon ye inda mui quemun an publicaçones respeitadas i populares.
Mesmo tenendo grande aceitaçon, esta aprossimaçon tradecional para cidades ten bários porblemas. Purmeiramente, esta aprossimaçon bia la cidade cumo ua antidade única i stática, que podie ser studada çconetada de tiempo i spácio. Esto lheba la studos teóricos, cun poucas cunexones cun cidades riales. Segundo, deixando de lhado l "stágio mássimo de zambolbimiento", esta aprossimaçon ye cumpletamente ourocéntrica. Anteriormente, acraditaba-se que to cidade de l mundo podie ser cumparada cun un stágio de l passado de la stória dua dada cidade ouropéia. Terceiro, nun hai splicaçones reales de quando i cumo las mudanças ocorrian, de cumo outro stágio na lhinha de zambolbimiento era alcançado. Quarto, la bison çconetada de cidades ye porblemática, amplicando que la stória, la cultura i las cunexones dun lhugar nun l anfluencian, l que torna esta aprossimaçon questionable. Alguns studiosos acraditan que tal aprossimaçon ye necessariamente ancumpleta. Quinto, muitos specialistas afirman que la aprossimaçon tradecional falhaba an definir l que ye ua cidade i l que nun ye. Finalmente, la bison de cidade cumo un cuorpo único falha an cuncepçones modernas, que acradita que to lhugar ten más de l que ua stória i bison. La bison de cidade dun aristocrata naturalmente eirá ser defrente de la bison de cidade dun scrabo. Aprossimaçones modernas fúrun zambolbidas tamien por causa çto, para çtanciar-se de la stória i bison de cidade als uolhos de las poderosas eilites urbanas, para ua percepçon multidimencional de stória.
Usando aprossimaçones modernas para cidades, ls urbanistas analizan bários assuntos i porblemas que acunten nas árias urbanas. Esta aprossimaçon focaliza-se percipalmente nas cunexones urbanas i Debisones anternas que ajudan a criar un melhor antendimiento de las dinámicas de las cidades. Usando esta lhinha de pensamiento, ye possible antender bários aspetos de l quales la aprossimaçon tradicional nun splicaba adequadamente.
Un amportante aspeto desta lhinha de pensamiento ye ouserbar las lhigaçones dua cidade. Essas lhigaçones permiten a alguien antender l carater único dun lhugar. Al robés de tratar todas las cidades de l mesmo jeito, defrentes lhugares son bistos cumo anterlhigados atrabeç de rotas culturales, comércio, eiquenomie ó stória. Assi sendo, anquanto que Londres i Tóquio stéian eiconomicamente lhigadas atrabeç de bolsas de balores, Graç i Stocolmo stan lhigadas atrabeç de la Capital Cultural de la Ouropa.
Essas lhigaçones nun solo lhigan defrentes cidades antre si, cumo tamien ua dada cidade cun sues redondezas. Ua cidade nun ye outo-sustentable. Eilha percisa de matéria-prima para abastecer las sues fábricas, de quemidos para alimentar la sue populaçon i de lhigaçones comerciales para biabilidade eiconómica. Estas lhigaçones ancluen stradas i outras bias públicas an giral, caminos de fierro, hidrobias i linhas aéreas.
La cuncentraçon de lhigaçones i redes nas cidades puode ser ousada cumo ua splicaçon de la ourbanizaçon. Ye l acesso la ciertas redes que chama pessonas. A la medida que bárias redes atuan juntas an ua dada ária, pessonas juntan-se an cidades. Al mesmo tiempo, esta cuncentraçon de pessonas amplica na antroduçon de nuobas redes, cumo lhigaçones sociales, oumentando la criaçon de nuobas possibilidades drento de cidades. Mobimientos de ourbanizaçon social son un resultado direto desta possiblidade de fazer nuobas cunexones. Ye esta abiertura a la nuobas lhigaçones que fázen las cidades al mesmo tiempo atratibas, i an cierto grau tamien amprebisibles.
Outro amportante aspeto de la aprossimaçon moderna de cidade ye mirar para las Debisones anternas eisistentes drento dua cidade. Estas Debisones anternas stan lhigadas a las lhigaçones sternas desta dada cidade. Cumo lhugares de ancontros stóricos, las cidades son híbridas i heiterogéneas. Híbridas porque sues cunexones que lhigan lhugares son bilaterales, ambolbendo dar i recebir an ambas direçones. Heiterogéneas por causa de l dinamismo de las cidades. Nuobos ancontros son porcessos an mobimiento adonde relaçones sociales i defrenças son custantemente negociadas i moldadas, refletindo assi l poder nó-eigualitário ambolbido.
Nin las defrenças anternas nin las lhigaçones i las redes urbanas dun lhugar definen, por sí solo, ua cidade. Las Debisones anternas son causadas por lhigaçones sternas, anquanto que al mesmo tiempo la abiertura de lhigaçones sternas abren la possibilidade de nuobas Debisones sociales. Las Debisones i las lhigaçones stan relacionadas antre si, i solo cunsiderando ambos ye que esta aprossimaçon moderna de cidade funciona. La eimigraçon eilustra mui bien la relaçon antre redes sternas i Debisones anternas. Las redes cuncentradas ne l centro de la cidade atraen eimigrantes. A la medida que eilhes eimigran, ls eimigrantes trazen cunsigo sues própias stórias, trazendo nuobas redes ó reforçando redes yá eisistentes. Al mesmo tiempo, las stórias de l eimigrantes oufrecen ouportunidades para eidantificaçon ó scluson.
Storicamente, an Pertual, las purmeiras cidades correspondian solo a las sedes de diocese, sendo que, al lhongo de la Eidade Média, solo nuobe poboaçones detinhan esse statuto (Braga, Porto, Biseu, Lhamego, Guarda, Coimbra, Lhisboua, Ébora i Silbes), nun oustante ciertas bilas (cumo Santarén, por eisemplo) tenéren maior coeficientes demográficos i eiquenómicos que ciertas cidades de l'anterior. Cul correr de l tiempo, outras bilas fúrun sendo promobidas la cidade, muitas associadas a la criaçon de l respetibo bispado, anquanto outras l fúrun por questones de natureza geo-stratégica, demográfica ó eiquenómica. L'atribuiçon de l'estatuto de cidade pul poder central fui siempre relatibamente comedida, l que splica l fato de, até 1974, eisistiren solamente quarenta i trés cidades an Pertual. Zde la Reboluçon de ls Crabos, mas, la nuoba lhegislaçon aprobada cuntribuiu para un surto na criaçon de cidades, fazendo cun que, persentemente, l sou númaro passe de a ciento i meia (atualmente eisisten 156 lhocalidades cun statuto de cidade).
Cun eifeito, an Pertual, las cundiçones neçairas para qu'ua lhocalidade tenga l statuto de cidade (eilebado a partir de bila) stan defenidas pula lhei mº 11/82, de 2 de júnio[2] que, salbo quando hai "amportantes rezones de natureza stórica, cultural i arquitetónica", stablece qu'ua poboaçon solo puode ser eilebada la cidade se tubir:
An Pertual, las cidades ténen tipicamente mais de dieç mil habitantes. Antretanto, muitas de las cidades pertuesas ténen este estatuto zde antes (muitas bezes zde mui antes) de l'aprobaçon de la lhei mº 11/82 de 1982), i, nesta lhei hai ua ressalba lhegal qu'outoriza sceçones quando eisisten "amportantes rezones" para esso. Deste modo, hai poboaçones mui pequeinhas, cun solo cerca de dous ó trés mil habitantes, que son cidades cumo ne ls causos de Bila Nuoba de Foç Cóa, Méda (ne l çtrito de la Guarda) i Miranda de l Douro. Paradoxalmente ciertas bilas possuen mais de 20 mil habitantes, cumo ne ls causos de Algueiron-Men Martines, Riu de Mouro, Sintra, Cascais, Oeiras, Paço d'Arcos, Corroios, Augas Santas (ne l cunceilho de la Maia), Alfena, antre outras.
Nas Regiones Outónomas de ls Açores i Madeira eisiste lhegislaçon de ls respetibos parlamientos que define ls critérios a seguir ne l respetibo território. Ne l'arquipélago de la Madeira, bárias de las bilas que mais recentemente passórun la cidade nun ténen, segundo studos de l Anstituto Nacional de Statística, nin ls eiquipamientos ourbanos nin l númaro d'eileitores an ourbanizaçon cuntínua necessairos para tal, causo fusse seguido l critério fixado na lhegislaçon nacional.
L statuto de cidade nun ten balor admenistratibo. Ambora la maior parte de las cidades pertuesas séian sedes de munecípio, hai cidades que nun l son, i mais de metade de ls munecípios pertueses ténen cumo sede bilas. Anque desso, l númaro de cidades i bilas eisistentes ne l território dun detreminado munecípio ten anfluéncia nas trasferéncias financeiras qu'esse munecípio recibe de l'admenistraçon central.
La heiráldica de ls aglomerados ourbanos pertueses reflete la defrença antre cidades, bilas i aldés, cul brason d'armas dua cidade ancimado por ua corona cun cinco torres, l dua bila cun quatro i l dua aldé cun trés[3].
Atualmente, las grandes cidades son mui maiores i más populosas de l que an tiempos passados. Un eisemplo ye Paris. An 1400, detenie 225 mil habitantes an 8 Km² de ária. Atualmente, la cidade ten 2,3 milhones de habitantes i 105 Km², sendo que sue region metropolitana ten más de 11,2 milhones de habitantes i 14.518 Km² de ária.
.jpg)
Ne ls Stados Ounidos de la América i ne l Canadá, l padron más quemun de las bias públicas ye l sistema de gradeamiento, esto ye, culas bias públicas correndo paralelas antre si, cun outras rues paralelas cortando-las perpendiculamente. L sistema de gradeamiento tamien fui ousado por milhares de anhos na China. Yá an cidades ouropéias, bien cumo na maiorie de las cidades que nun planeórun de antemano l sou sistema de bias públicas, rues i abenidas spalhan-se zourganizadamente pula cidade. Muitas de las muralhas que anteriormente cercában las antigas cidades ouropéias dórun lhugar la modernas bias públicas de la alta capacidade.
La maiorie de las grandes cidades ten un centro financeiro, adonde anstituiçones financeiras, sedes de grandes cumpanhas i shopping centeners stan lhocalizados. Pessonas de todas las partes de la cidade (bien cumo de cidades bezinas tamien) ban al centro financeiro trabalhar diariamente. Este centro giralmente ye pequeinho an ária, mas podendo abrigar até dezenas de milhares de postos de trabalho, chamando trabalhadores de todas las partes de la cidade i de outras cidades bezinas, grácias a la eisisténcia de l arranha-cielos. Giralmente, la maiorie de l grandes arranha-cielos dua cidade, ancluindo ls más altos, stan lhocalizados ne l centro financeiro de la cidade. La Cidade de Lhondres propiamente dita, por eisemplo, centro financeiro de la region metropolitana de Londres, ten 2,90 Km² i 8,6 mil habitantes permanientes. Inda assi, más de 300 mil pessonas de outros cantos de la region metropolitana ban a Lhondres trabalhar todos ls dies.
Atualmente, las cámaras- las anstituiçones políticas modernas ancarregadas de admenistrar la cidade - de grandes cidades son grandes i cumplexas Ourganizaçones, que ampregan milhares de pessonas. La cámara ye responsable pul planeamiento de la cidade. Outras tarefas barian de paíç la paíç. Giralmente, las cámaras ancarregan-se de la admenistraçon de l sistema de transporte público, de l sistema de scuolas i bibliotecas públicas, i de l polícia i de la cobertura cuntra ancéndio.
Para alhá desso, las prefeituras percisan monitorar las dibersas regiones de la cidade, buscando por árias i struturas cun porblemas, i, após esto, adotar medidas que ajuden a solucionar estes porblemas, cumo la demoliçon de struturas que stéian an cundiçones precárias i l aprimoramiento de serbícios de trasporte público.
La terceira i redadeira responsabilidade de la cámara ye pressionar nibles superiores de gobierno (nacional, stadual, probincial, antre outros) por berbas, ua beç que la grande maiorie de las cidades nun gera berbas suficientes solamente atrabeç de la coleta de ampuostos municipales.
Atualmente, la eiquenomie de las cidades ne l giral ye altamente dibersificada, bariando de cidade para cidade. Anquanto que la eiquenomie de las cidades nunca baseia-se solamente an un dado setor eiconómico, bárias cidades dependen purmariamente dun único, ó alguns poucos, setores eiquenómicos. Alguas inda dependen muito, por eisemplo, de la agricultura i de la pecuária, cumo Saskaton. La eiquenomie de grandes cidades tende a ser más dibersificada, mas esto nin siempre acuntece.
An cidades de grande porte, la andústria de manufatura ye quaije siempre ua de las percipales fuontes de renda - se nun la percipal - gerando milhares de ampregos. Mas, la manufatura yá nun ye atualmente la maior fuonte de renda de la maiorie de las grandes cidades - tenendo perdido esta posiçon para l setor terciário.
An bárias grandes cidades, milhares de pessonas trabalhan diaramente an scritórios i anstituiçones financeiras. Cidades tales cumo Nuoba Iorque, Tóquio, Londres, Paris i Hong Kong son grandes pólos financeiros, adonde l setor financeiro ye la percipal fuonte de renda de la cidade. Noutras cidades, ye l comércio por atacado i bareijo la percipal fuonte de renda. La eiquenomie de dibersas cidades, cumo Roma, Quebec i Foç de l Eiguaçu, dependen muito de l turismo.
Muitas cidades possuen ua eiquenomie altamente dibersificada - adonde todas ls setores arriba ténen aprossimadamente la mesma amportáncia - stando menos bunerables a la recessones eiquenómicas de l que cidades que dependen dun ó alguns setores eiconómicos an particular. Eisemplos ancluen Chicago, Hong Kong i Toronto, por eisemplo.
Ua metrópole ye un grande centro populacional, que cunsiste an ua (ó, a las bezes, dues ó até más) grande cidade central, i sue zona adjacente de anfluéncia, custituída de outras cidades menores i próssimas. Giralmente, metrópoles forman cunurbaçones, ua grande ária ourbanizada formada pula cidade central i las sues cidades adjacentes, formando ua única ária ourbana. Por eisemplo, San Poulo ye ua cidade central, cun Guarulhos, Osasco, Santo André i outras cidades pegadas juntas formando ua ourbanizaçon.
Mas, ua metrópole nun percisa ser oubrigatoriamente formada por ua única ária ourbanizada cuntígua, podendo-se chamar ua metrópole la junçon de dues ó más árias ourbanizadas antercaladas cun árias rurales. L neçairo ye que las cidades que forman ua metrópole possuan un alto grau de antegraçon antre si. Ua region formada por dibersas metrópoles lhocalizadas próssimas antre si son a las bezes chamadas de megalópole. Atualmente, las metrópoles más populosas de l mundo, que ténen até 30 milhones de habitantes, son Tóquio, México, Seul, Nuoba Iorque i San Poulo.
Ua cidade global ye un grande centro bancairo, comercial, financeiro, político i andustrial. La palabra "cidade global" - que nun debe ser cunfundida cun megacidade - fui ambentado pula socióloga Saskia Sassen nun seminário an 1991. Anquanto que la spresson "megacidade" refre-se a ua grande cidade ó ária urbana, ua cidade global ten grande anfluéncia la nible regional, nacional i anternacional. Las cidades globales, segundo Sassen, ténen más caratelísticas parecidas antre si de l que cun outras cidades de l mesmo paíç. Bruxelas, Chicago, Cingapura, Hong Kong, Londres, Los Angeles, Madrid, Milon, Moscobo, Nuoba Iorque, Paris, Seul, San Francisco, San Poulo, Xangai, Sydney, Tóquio, Toronto i Washington son quemumente cunsideradas cidades globales, inda que esta palavra se aplique tamien a outras cidades.
La noçon de cidade global bei ua cidade cumo un cuntéiner adonde halbelidades i recursos stan cuncentrados. Quanto más ua cidade ye capaç de cuncentrar halbelidades i recursos, más bien-sucedida i poderosa ye la cidade, tornando-la suficientemente poderosa para anfluenciar l que ocorre an torno de l mundo.
Críticos de la noçon dízen para la ambiguidade de la spresson "poder". An ua cidade global, poder segnefica purmariamente poder eiquenómico i/ó político, i antoce, puode nun ancluir cidades que son poderosas an outros termos. Por eisemplo, cidades cumo Roma ó Jerusalén son poderosas an termos stóricos i religiosos.
An 1995, Rosabeth Moss Kantener argumentou que cidades bien sucedidas puoden ser eidantificadas atrabeç de trés eilemientos. Para ser bien sucedida, ua cidade percisa de buns pensadores (cunceitos), buns fazedores (cumpeténcia) i/ó de buns comerciantes (lhigaçones). La cumbinaçon destes trés eilemientos segnefica que, segundo las eideias de Kantener, que buonas cidades nun son planeadas mas si cuntroladas.
Ls percipales porblemas socioculturales que las cidades anfrentan son la criminalidade, la pobreza, i cunflitis antre defrentes grupos étnico- raciales i/ó culturais.
Crimes, cumo roubos, sequestros i l tráfico i cunsumo de drogas eilegales, nun acuntecen solamente nas cidades. Mas, estes crimes - bien cumo las causas destes - giralmente son más besibles nas cidades, adonde afetan cun más facelidade bários habitantes inocentes, que nada ten a ber cun estes atos criminosos, ó crian cun más facilidade nuobos criminosos (cumo delinquentes jubenis) . La pobreza stá associada an grande parte cun bários destes crimes. Pessonas que nun possuen cumo aguantar-se i que son eignoradas pula sociadade por bezes recorren al crime cumo meio de sustentaçon, roubando, raptando i/ó traficando drogas.
Maior polícia i cumprimiento de leis eisistentes ye un de l possibles métodos para reduzir las taxas de criminalidade. Mas, estas taxas cuntinaran altas se ls porblemas que la causan nun son solucionados. L percipal fator causador de crimes an giral ye la pobreza, mas crimes puoden tamien tener raízes étnicas i/ó culturales. Zde la antiguidade, las cidades ténen-se çtacado cumo pólo adonde pessonas de defrentes etnies i/ó grupos culturales se ancontran. Por bezes, defrentes grupos étnico-culturales se relacionan bien antre si. An muitos causos, porén, defrentes grupos étnico-culturales stranhan, nun cunfian, bénen cumo anferiores i/ó ténen medo de outros grupos étnico-culturales. Essas atitudes ténen causado atritos i bioléncia antre defrentes grupos étnico-culturales zde la antiguidade. Un eisemplo son las cidades sul-africanas, que ténen las taxas de roubos, stupros i homicídios más altas de l mundo, sendo que mui destes crimes son feitos por causa de atritos antre ls dibersos grupos étnicos-culturales eisistentes, cumo ls Zulu, ls Xhosa i ls çcendentes de ouropeus.
La pobreza ye un de l maiores porblemas anfrentados pulas cidades. Mesmo nas cidades lhocalizadas ne ls países zambolbidos, adonde la maiorie de l habitantes de la cidade usufruen dun alto nible de qualidade de bida, an muitos causos ua parte cunsiderable de sous habitantes biben ambaixo de la linha de la pobreza. Este porblema data zde ls primórdios de la antiguidade.
Na maiorie de las cidades de l países an zambolbimiento ls bairros de la classe média i de la eilite stan ne l núcleo ourbano de la cidade, cun bairros pobres i fabelas situados ne ls lhemites de la cidade. Esto acuntece tamien an ciertas cidades lhocalizadas ne ls países zambolbidos, cumo Paris. Yá ne ls Stados Ounidos, ne l Reino Ounido i na Eirlanda, acuntece eisatamente l cuntrário, adonde l núcleo ourbano central (anner city) giralmente ten altas taxas de criminalidade i cuncentra ls guetos i bairros de la classe pobre, cula maiorie de las residéncias de la eilite situadas ne ls lhimites de la cidade i an cidades bezinas, ls chamados suburbs' ' (subúrbio). Noutras cidades, cumo Toronto, bairros pobres antercalan-se cun bairros ricos. An todo causo, ne l giral, a maior parte de las melhores anstituiçones eiducacionales, spitalares i buonas ouportunidades de trabalho quedan cerca als bairros ricos. La pobreza ye causada percipalmente pula falta de ouportunidades de trabalho (zamprego) i pula falta de eiducaçon adequada. La segregaçon urbana (antre bairros ricos i pobres) ampede que l porblema de la pobreza seia resolbido mesmo la médio ó lhongo prazo.
An muitas cidades ne ls países an zambolbimiento las pessonas nun ténen cumo arcar culs custos de manutençon ó aluguer de residéncias, tenendo que morar na rue, an bairros anformales chamados fabelas, ó an abrigos - an muitos causos, an péssimas cundiçones, mesmo ne ls países zambolbidos - fornecidos pula cámara ó por terceiros.
Ciertos grupos gobernamentales i nó-gobernamentales - specialmente ne ls países zambolbidos - percuran menimizar l porblema de la pobreza i de la falta de residenciamiento nas cidades atrabeç de l fornecimiento de ouportunidades de trabalho, anstalaçones eiducacionales adequadas i ajuda financeira als necessitados.
Sabe-se atualmente que las cidades - subretodo grandes árias urbanas - crian sous própios microclimas. Esso ocorre por causa de la grande stenson de la superfíce de ciertos materiales quemunes nas cidades, cumo beton, asfalto i cimiento, que crian ilhas de calor. Esses materiales reténen parte segneficatiba de la einergie solar, fazendo cun que l lhocal tenga ua temperatura média más alta de l que las árias rurales que l cercan. Las grandes metrópoles chegan a registrar gradientes de temperatura mais altas a 10°C antre ls sous subúrbios i la ária central.
La maiorie de las grandes cidades anfrenta un grabe porblema ambiental: la poluiçon atmosférica. Alguas cidades crian tanta poluiçon que l aire acaba por tornar-se saturado de materiales sógenos, criando ua nubrina spessa, de quelor acinzentada chamada smog' '.
La poluiçon atmosférica, criada pulas andústrias i beiclos motorizados, ye ua séria amenaça a la salude de l habitantes dun dado lhugar, sendo respunsable pula deflagraçon de einúmeros porblemas cumo alergies, malinas respiratórias, cardiopaties, stress, antre outros. Ls porblemas de la mala qualidade de l aire se agrában percipalmente durante ls meses de l ambierno, por causa de la persença dun fenómeno coincido cumo amberson térmica, que deficulta la çperson de l poluentes.
Lheis antipoluiçon puoden regular las eimissones de gases poluentes de las fábricas i beiclos outomotores, sendo ua possible seluçon quanto a esse porblema. Un sistema de transporte público ourbano zambolbido tamien ye outra oupçon, an relaçon a la custruçon de bias públicas de alta capacidade cumo bias spressas, deminuindo l tránsito de beiclos nas bias yá eisistentes.
Sgotos i eifluentes andustriales cuntinan a poluir muitos rius, lagos, aquíferos i zona costeiras. Esso puode causar danhos a la fauna i flora lhocal, cumo mangues i praias. La poluiçon, para alhá desso, ampossibilita, ó torna porblemática, la outelizaçon de praias cumo árias de recreaçon, cumo ye l causo de alguns setores de la cidade de l Riu de Janeiro.
L lixo ye outro grande porblema. Bárias cidades ten dificuldades an lhibrar-se adequadamente de l sou lhixo. La cantidade de lhixo que bai para ls aterros sanitários crece cul tiempo, i acumula-se cun rapideç, anquanto que ancineradors crian poluiçon atmosférica. Lhugares çponibles para la çposiçon de l lhixo stan cada beç más defíceles de se ancuntrar, por causa de la ouposiçon de moradores próssimos i de ambientalistas (percípio NIMBY) .
Zde que las purmeiras anstituiçones admenistratibas surgiran cul antuito de admenistrar cidades, zde ls primórdios de la stória de la ourbanizaçon, la tarefa destas anstituiçones ten tornado-se cada beç más cumplexa. Atualmente, ye respunsablidade de la cámara - cumo estas anstituiçones son chamadas atualmente - admenistrar ua bariadade de serbícios públicos cumo polícia, eiducaçon, cobertura anti-ancéndio, transporte público, manutençon de bias públicas an giral, renobar bairros an decadéncia, antre outros.
Las cámaras percisan de berbas para arcáren culas respunsabilidades. Buona parte destas berbas son geradas atrabeç de ampuostos municipales, esto ye, anstituídos pula cámara, i bálidos drento de la cidade. Mas, ls ampuostos municipales por si solo giralmente nun son suficientes. Las cidades tamien percisan de outras fuontes de fondos, cumo berbas fornecidas pul gobierno de l paíç (ó la sub-antidade admenistratiba, tal cumo stado ó porbíncia) adonde la cidade stá lhocalizada, ó a tomada de ampréstimos.
Mas, l cuntínuo crecimiento populacional de las cidades tornan las tarefas i las respunsabilidades de las cámaras de las grandes cidades defícele, por causa de ls maiores gastos ambolbidos - specialmente quando la percentaige de habitantes bibindo na pobreza oumenta na cidade. Quando esto acuntece, las cámaras percisan dar assisténcia social para un númaro maior de pessonas, ó resulber ls porblemas causados pula pobreza, cumo l baixo númaro de berbas arrecadadas atrabeç de ampuostos municipales. Dous eisemplos son San Poulo i Riu de Janeiro, que recebírun grandes quantidades de nordestinos - la maiorie cun pouca ó nanhue eiducaçon - antre las décadas de 1950 i 1990.
L porblema de la pobreza ye agrabado quando ls habitantes de la classe média i alta ampeçan a salir de la cidade, mudando-se para subúrbios más loinge. An muitos causos, muitos de l ex-habitantes cuntinan a trabalhar na cidade na qual eilhes morában anteriormente, quemumente, ne l centro financeiro de la cidade. Mas, an todo causo, ls ex-habitantes yá nun pagan ampuostos para la cámara de la cidade adonde eilhes morában. Esta migraçon de la classe média i alta acuntece purmariamente nas inner cities eisistentes ne l Reino Ounido, na Eirlanda i percipalmente ne ls Stados Ounidos - eisemplos bien-coincidos son Detroit, Denber i Chicago. La cámara dua cidade tamien sofre quando stablecimientos comerciales i andustriales mudan-se an direçon a la outras cidades, cumo cidades bezinas, atraídas por dibersos fatores cumo ampostos más baixos.
Geógrafos, sociólogos i ourbanistas acraditan que las regiones metropolitanas cuntinaran a crecer an ária i populaçon nas próssimas décadas, bien cumo un grande oumiento de las taxas de ourbanizaçon de l mundo. Este eifeito stará cuncentrado purmariamente ne ls países an zambolbimiento, que ténen atualmente i ne l giral menores taxas de ourbanizaçon an relaçon als países zambolbidos, ua populaçon an rápido crecimiento i la persença dun fuorte mobimiento de eixodo rural[sin fuontes] - ne l giral, sensiblemiente maiores de l que l mobimiento de eixodo rural eisistente atualmente ne ls países zambolbidos.
La percentaige de la populaçon mundial bibindo atualmente an cidades, bien cumo stimatibas para l feturo próssimo, dependen de la definiçon de cidade outelizada. An 2000, segundo l Centro de las Naciones Ounidas para ls Assentamientos Ourbanos, cerca de 2,7 bilhones de habitantes, aprossimadamente 45% de la populaçon mundial a la época, bibian an cidades. Esta percentaige saltará para 50% an 2010, debendo alcançar 60% an 2030. An outros studos i stimatibas, la percentaige de la populaçon mundial a bibir an cidades alcança até 50%, an 2000, i até 75%, an 2010, dependendo de l studos, critérios i stimatibas outelizadas.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
