C++
From Wikipedia, the free encyclopedia
C++ (си плас плас эсвэл си нэмэх нэмэх гэж дуудна) нь компайлагддаг, free-form бичилттэй програмчлалын хэл. Өндөр түвшний болон доод түвшний програмчлалын хэлнүүдийн аль алиных нь шинж чанарыг өөрт агуулсан байдаг тул дунд түвшний хэл хэмээн ангилдаг.[3] Императив, объект хандлагат, генерик програмчлалын шинж чанарыг бүрдүүлдэг.
Парадигм | Олон парадигмт:[1] процедурт, функционал, объект хандлагат, генерик |
---|---|
Гарсан он | 1983 |
Зохиогч | Бярне Строуструп |
Тогтвортой хувилбар | ISO/IEC 14882:2011 (2011) |
Төрөлжүүлэлт | Static, Nominative |
Голлох хэрэгжүүлэлт | LLVM Clang, GCC, Microsoft Visual C++, Intel C++ Compiler |
Өөрт нөлөөлсөн | C, Simula, ALGOL 68, Ada, CLU, ML |
Бусдад нөлөөлсөн | Perl, LPC, Lua, Pike, Ada 95, Java, PHP, D, C99, C#,[2] Falcon, Seed7 |
Хэрэгжүүлэхэд хэрэглэсэн хэл | C++ |
Үйлдлийн систем | Cross-platform (multi-platform) |
Файлын өргөтгөл | .cc .cpp .cxx .c++ .h .hh .hpp .hxx .h++ |
Вэбсайт | News, status & discussion about Standard C++ |
C++ нь хамгийн өргөн хэрэглэгддэг програмчлалын хэлнүүдийн нэг бөгөөд [4][5] олон тооны техник, програм хангамжийн платформ дээр хэрэгжүүлсэн байдаг. C++ ашиглан бичигдсэн програмууд нь гүйцэтгэл сайтай байдаг тул системийн програм, хэрэглээний програм, төхөөрөмжийн драйвер, эмбэддэд програм хангамж, өндөр гүйцэтгэлийн сервер, клиентийн програм, компьютерийн тоглоом гэх мэт энтертайнментийн чиглэлийн програм хангамж бүтээхэд хэрэглэдэг.[6] Маш олон нээлттэй эхийн болон пропритетари компайлерууд байдгаас FSF, LLVM, Microsoft, Intel компаниудын компайлерүүд нь хамгийн өргөн хэрэглээтэй. C++ нь гарсан цагаасаа C#[2], Java гэх мэт олон програмчлалын хэлэнд нөлөөлөх хүчин болжээ.
C++ хэлийг Белл лабораторид 1979 оноос Бярне Строуструп хөгжүүлж эхлэсэн бөгөөд анх C with Classes буюу класстай Си хэл хэмээн нэрлэж байжээ. Ерөнхийдөө Си хэлэнд класс гэх мэт объект хандлагат технологийн шинж чанарыг нэмж өгсөн байна. 1983 онд C++[7] гэж нэрлэсэн бөгөөд "++" операторыг хошин байдлаар хэрэглэжээ (C + C(lasses) = C++). Си хэл дээр класс, виртуаль функц, operator overloading, давхар удамшил, темплейт, exception handling гэх мэт зүйлсийг нэмж, type system болон бусад зарим шинж чанарыг нь өөрчилжээ.
C++ хэлийг Олон Улсын Стандартын Байгууллага (ISO) стандартчилдаг бөгөөд хамгийн шинэ хувилбар нь 2011 оны 9 сард ISO/IEC 14882:2011 нэртэй стандарт болж хэвлэгджээ (албан бусаар C++11 гэнэ).[8] Тус хэлний стандартууд нь 1998 онд анх ISO/IEC 14882:1998 гэж, дараа нь 2003 онд ISO/IEC 14882:2003 гэж гарч байжээ. Одоогийн стандарт болох C++11 нь эдгээрээс илүү олон давуу тал, өргөжүүлсэн стандарт санг агуулна.