ചർച്ച് ഓഫ് സൗത്ത് ഇന്ത്യ
From Wikipedia, the free encyclopedia
ഇന്ത്യയിലെ പ്രമുഖ പ്രൊട്ടസ്റ്റന്റ് ക്രൈസ്തവസഭകളിലൊന്നാണ് ദക്ഷിണേന്ത്യ ഐക്യസഭ അഥവാ ചർച്ച് ഓഫ് സൗത്ത് ഇന്ത്യ (സി.എസ്.ഐ.). ഇന്ത്യയുടെ സ്വാതന്ത്ര്യ ലബ്ധിയോട് അനുബന്ധിച്ച് വിവിധ പ്രൊട്ടസ്റ്റന്റ് സഭകൾ ലയിച്ച് രൂപമെടുത്തതാണ് ഈ സഭ. ദക്ഷിണേന്ത്യയിലും ശ്രീലങ്കയിലുമായി 35 ലക്ഷത്തോളം അംഗങ്ങൾ ഈ സഭയിലുണ്ട്.[3]
ചർച്ച് ഓഫ് സൗത്ത് ഇന്ത്യ (സി.എസ്.ഐ.) ദക്ഷിണേന്ത്യൻ സഭ | |
---|---|
വിഭാഗം | ആംഗ്ലിക്കൻ, പ്രൊട്ടസ്റ്റന്റ് |
സഭാ സംവിധാനം | എപ്പിസ്കോപ്പൽ |
മോഡറേറ്റർ | എ. ധർമ്മരാജ് റസാലം |
സംഘടനകൾ | ആംഗ്ലിക്കൻ കമ്മ്യൂണിയൻ, സി.സി.എ., സി.സി.ഐ., എൻ.സി.സി.ഐ., ഡബ്ല്യു.എ.ആർ.സി., ഡബ്ല്യു.സി.സി. |
പ്രദേശം | ആന്ധ്രാപ്രദേശ്, കർണാടക, കേരളം, തമിഴ്നാട്, ശ്രീലങ്ക |
ഉത്ഭവം | 1947 സെപ്റ്റംബർ 27 മദ്രാസ്, മദ്രാസ് സംസ്ഥാനം |
ലയനം | ആംഗ്ലിക്കൻ-പ്രൊട്ടസ്റ്റന്റ് വിശ്വാസധാരയിലുള്ള വിവിധ സഭകൾ (പ്രധാനമായും ആംഗ്ലിക്കൻ, കോൺഗ്രഗേഷണൽ, മെഥഡിസ്റ്റ്, പ്രെസ്ബിറ്റീരിയൻ)[1] |
Congregations | 14,000 [2] |
അംഗങ്ങൾ | 35 ലക്ഷം[3] |
പ്രവർത്തകൾ | 1,214 [3] |
ആശുപത്രികൾ | 104 [2] |
ആംഗ്ലിക്കൻ സഭ, മെഥഡിസ്റ്റ് സഭ, പ്രെസ്ബിറ്റീരിയൻ സഭ, കോൺഗ്രിഗേഷണൽ സഭ എന്നിങ്ങനെ വ്യത്യസ്ത പാരമ്പര്യങ്ങളിലുള്ള ക്രൈസ്തവസഭകൾ 1947-ൽ ഒന്നുചേർന്നാണ് ദക്ഷിണേന്ത്യ ഐക്യസഭ രൂപമെടുത്തത്. ഇവയിൽ പ്രെസ്ബിറ്റീരിയൻ സഭയും കോൺഗ്രിഗേഷണൽ സഭയും 1908-ൽ തന്നെ ഒത്തുചേർന്നു് സൗത്ത് ഇന്ത്യ യുണൈറ്റഡ് ചർച്ച് (എസ്.ഐ.യു.സി) എന്ന സഭ രൂപവത്കരിച്ചിരുന്നു. അതിനാൽ 1947-ൽ നടന്നത് ആംഗ്ലിക്കൻസഭ, മെഥഡിസ്റ്റ് സഭ, എസ്.ഐ.യു.സി എന്നിവയുടെ ലയനമായിരുന്നു. സി.എസ്.ഐ രൂപംകൊണ്ട കാലത്തു സാമ്പത്തിക സഹായത്തിനും നേതൃത്വത്തിനും വിദേശസഭകളെ ആശ്രയിച്ചിരുന്നു. എന്നാൽ ഇന്ന് സഭ സ്വയംപര്യാപ്തമാണ്. വിദേശീയരായി ആരും അധികാരസ്ഥാനങ്ങളിലില്ല.
ചർച്ച് ഓഫ് നോർത്ത് ഇന്ത്യ, ചർച്ച് ഓഫ് പാകിസ്താൻ, ചർച്ച് ഓഫ് ബംഗ്ലാദേശ് തുടങ്ങിയ ഐക്യസഭകൾ സി.എസ്.ഐയുടെ ചുവടുപിടിച്ചു രൂപീകരിക്കപ്പെട്ടിട്ടുള്ളവയാണ്.