അസ്റ്റിഗ്മാറ്റിസം
കാഴ്ച വൈകല്യം / From Wikipedia, the free encyclopedia
കണ്ണിലെ റെറ്റിനയിൽ പ്രകാശം കൃത്യമായി കേന്ദ്രീകരിക്കാത്തതു മൂലം കണ്ണിനുണ്ടാകുന്ന ഒരു പ്രശ്നമാണ് അസ്റ്റിഗ്മാറ്റിസം. ഇത് മൂലം ഏത് അകലത്തിലും വികലമായ അല്ലെങ്കിൽ മങ്ങിയ കാഴ്ച ഉണ്ടാകുന്നു. കണ്ണിന് സ്ട്രെയിൻ, തലവേദന, രാത്രിയിൽ വാഹനമോടിക്കുന്നതിനുള്ള ബുദ്ധിമുട്ട് എന്നിവയാണ് മറ്റ് ലക്ഷണങ്ങൾ. ചെറിയ പ്രായത്തിൽ തന്നെ കണ്ടെത്തി ചികിൽസിക്കാതിരുന്നാൽ, ഇത് ആംബ്ലിയോപിയയ്ക്ക് കാരണമാകും.
അസ്റ്റിഗ്മാമാറ്റിസം | |
---|---|
Blur from astigmatic lens at different distances | |
സ്പെഷ്യാലിറ്റി | നേത്രവിജ്ഞാനം, നേത്ര രോഗങ്ങൾ, ഒപ്റ്റോമെട്രി |
ലക്ഷണങ്ങൾ | മങ്ങിയ കാഴ്ച, തലവേദന, കണ്ണിന് സ്ട്രെയിൻ [1] |
സങ്കീർണത | ആംബ്ലിയോപ്പിയ |
കാരണങ്ങൾ | വ്യക്തമല്ല[2] |
ഡയഗ്നോസ്റ്റിക് രീതി | നേത്ര പരിശോധന[1] |
Treatment | കണ്ണട, കോൺടാക്റ്റ് ലെൻസ്, ശസ്ത്രക്രിയ[1] |
ആവൃത്തി | മുതിർന്നവരിൽ 30% - 60% (യൂറോപ്പ്, ഏഷ്യ)[3] |
അസ്റ്റിഗ്മാറ്റിസത്തിന്റെ കാരണം വ്യക്തമല്ല, എന്നിരുന്നാലും ഇത് ഭാഗികമായി ജനിതക ഘടകങ്ങളുമായി ബന്ധപ്പെട്ടിരിക്കുന്നുവെന്ന് വിശ്വസിക്കപ്പെടുന്നു. കോർണിയയുടെ, അല്ലെങ്കിൽ കണ്ണിലെ ലെൻസിന്റെ ക്രമരഹിതമായ വക്രത, അസാധാരണതകൾ എന്നിവ മൂലം ഈ അവസ്ഥ ഉണ്ടാകാം. പ്രാഥമിക നേത്ര പരിശോധനയിലൂടെ രോഗനിർണയം സാധ്യമാണ്.
കണ്ണടകൾ, കോണ്ടാക്റ്റ് ലെൻസുകൾ, ശസ്ത്രക്രിയ എന്നിവയാണ് മൂന്ന് പ്രധാന ചികിത്സാ രീതികൾ. കണ്ണടകളാണ് ഏറ്റവും ലളിതമായത്. കോണ്ടാക്റ്റ് ലെൻസുകൾക്ക് വിശാലമായ കാഴ്ച മണ്ഡലം നൽകാൻ കഴിയും. റിഫ്രാക്റ്റീവ് ശസ്ത്രക്രിയകൾ കണ്ണിന്റെ ആകൃതി സ്ഥിരമായി മാറ്റുന്നു.
യൂറോപ്പിലും ഏഷ്യയിലും, 30 മുതൽ 60% വരെ മുതിർന്നവരെ അസ്റ്റിഗ്മാറ്റിസം ബാധിക്കുന്നു.[3] എല്ലാ പ്രായത്തിലുമുള്ള ആളുകളെയും അസ്റ്റിഗ്മാറ്റിസം ബാധിക്കാം.[1] 1801-ൽ തോമസ് യംഗ് ആണ് അസ്റ്റിഗ്മാറ്റിസം ആദ്യമായി റിപ്പോർട്ട് ചെയ്തത്.[2]