Покраини и територии во Канада

Покраините и териториите на Канада се првостепени административни единици во земјата. Постојат 10 покраини и 3 територии. Главната разлика помеѓу нив е во тоа што покраините имаат своја самобитност, додека пак териториите ѝ се потчинети непосредно на сојузната влада. Покраините се сметаат за косуверени делови, секоја со своја „Круна“, која ја претставува намесен гувернер (lieutenant-governor). Териториите не се суверени, туку претставуваат обични делови од државата. На чело на секоја територија стои комесар (commissioner).

Карта на покраините и териториите во Канада со нивните кратенки

Десетте покраини се Алберта, Британска Колумбија, Квебек, Манитоба, Нова Шкотска, Њу Бранзвик, Њуфаундленд и Лабрадор, Онтарио, Островот Принц Едвард и Саскачеван. Трите територии се Јукон, Нунавут и Северозападните Територии.

Покраини

Покраини во Канада

Знаме	Грб	Покраина	Пошт. кратенка	Главен град	Најголем град	Стапила во сојуз	Население[1]	Површина: земја (км2)	Површина: вода (км2)	Површина: вкупна (км2)	Службен јазик	Сојузен парламент: Општински пратеници	Сојузен парламент: Сенатори
		Онтарио	ON	Торонто	Торонто	1 јули 1867	12.851.821	917.741	158.654	1.076.395	англискиА	106	24
		Квебек	QC	Квебек	Монтреал	1 јули 1867	7.903.001	1.356.128	185.928	1.542.056	францускиБ	75	24
		Нова Шкотска	NS	Халифакс	ХалифаксВ	1 јули 1867	921.727	53.338	1.946	55.284	англискиГ	11	10
		Њу Бранзвик	NB	Фредериктон	Сент Џон	1 јули 1867	751.171	71.450	1.458	72.908	англискиД францускиД	10	10
		Манитоба	MB	Винипег	Винипег	15 јули 1870	1.208.268	553.556	94.241	647.797	англискиА, Ѓ	14	6
		Британска Колумбија	BC	Викторија	Ванкувер	20 јули 1871	4.400.057	925.186	19.549	944.735	англискиА	36	6
		Остров Принц Едвард	PE	Шарлоттаун	Шарлоттаун	1 јули 1873	140.204	5.660	0	5.660	англискиА	4	4
		Саскачеван	SK	Реџина	Саскатун	1 септември 1905	1.033.381	591.670	59.366	651.036	англискиА	14	6
		Алберта	AB	Едмонтон	Калгари	1 септември 1905	3.645.257	642.317	19.531	661.848	англискиА	28	6
		Њуфаундленд и Лабрадор	NL	Сент Џонс	Сент Џонс	31 март 1949	514.536	373.872	31.340	405.212	англискиА	7	6

Белешки:

А.^ де факто; францускиот има ограничен уставен статус

Б.^ Повелба за францускиот јазик; англискиот има ограничен уставен статус

В.^ Нова Шкотска ги има распуштено градовите во 1996 г. за сметка на „регионални заедници“

Г.^ Нова Шкотска има многу малку двојазични законодавни акти (три на англиски и француски; еден на англиски и полски); некои управни органи имаат озаконето двојазични имиња на англиски и француски

Д.^ Став 16 од Повелбата за права и слободи на Канада

Ѓ.^ Закон за Манитоба

• Пред осојузувањето, Онтарио и Квебек ја сочинувале колонијалната Покраина Канада.
• Британска Колумбија, Њу Бранзвик, Нова Шкотска и Островот Принц Едвард биле посебни колонии.
• Манитоба е создадена во исто време со Северозападните Територии.
• Сакскачеван и Алберта се создадени со одвојување на земјиште од Северозападните Територии.
• Њуфаундленд бил независен доминион во рамките на Комонвелтот пред да се припои кон Канада. Британските власти го префрлиле Лабрадор од Долна Канада во Њуфаундленд во 1809 г, но местоположбата на лабрадорската граница останала спорна сè до 1927 г. Покраината го сменила името од „Њуфаундленд“ во „Њуфаундленд и Лабрадор“ со уставен амандман усвоен на 6 декември 2001 г.
• Со исклучок на Фредериктон и Викторија, главните градови на покраините се или најголеми или втори по големина во својата покраина. Фредериктон е на третото место во Њу Бранзвик, а пак Викторија го зазема дури десеттото место во Британска Колумбија.

Главни градови на покраините

• 
  Законодавниот дом на Алберта во Едмонтон
• 
  Парламентот на Британска Колумбија во Викторија
• 
  Законодавниот дом на Манитоба во Винипег
• 
  Законодавниот дом на Њу Бранзвик во Фредериктон
• 
  Конфедерацискиот дом на Њуфаундленд и Лабрадор во Сент Џонс
• 
  Покраинскиот дом на Нова Шкотска во Халифакс
• 
  Законодавниот дом на Онтарио во Торонто
• 
  Покраинскиот дом на Островот Принц Едвард во Шарлоттаун
• 
  Парламентот на Квебек во Квебек
• 
  Законодавниот дом на Саскачеван во Реџина

Територии

Канада има три територии. За разлика од покраините, териториите немаат сопствена самобитност, туку само овластувањата што им ги дава сојузната влада.^[2][3][4] Териториите ја опфаќаат сета копнена Канада северно од 60° СГШ и западно од Хадсоновиот Залив, како и сите острови северно од континентална Канада (од оние во Џејмсовиот Залив, па сè до канадските арктички острови). На табелата, териториите се наведени по првенство (секоја покраина има првенство над териториите, без оглед на тоа кога се создадени).

Територии во Канада

Знаме	Грб	Територија	Пошт. кратенка	Главен и најголем град	Стапила во сојуз	Население	Површина: земја (км2)	Површина: вода (км2)	Површина: вкупно (км2)	Службени јазици	Сојузен парламент: Општински пратеници	[Сојузен парламент: Сенатори
		Северозападни Територии	NT	Јелоунајф	15 јули 1870	41.462	1.183.085	163.021	1.346.106	чипевјански, кри, англиски, француски, гвичински, инуинактун, инуктитут, инувијалучки, севернослејвиски, севернослејвиски, догрипски[5]	1	1
		Јукон	YT	Вајтхорс	13 јуни 1898	33.897	474.391	8.052	482.443	англиски француски	1	1
		Нунавут	NU	Икалуит	1 април 1999	31.906	1.936.113	157.077	2.093.190	инуинактунски, инуктитутски, англиски, француски	1	1

Белешка: Нунавут и Јукон се создадени со одвојување на делови од Северозападните Територии.

Главни градови на териториите

• 
  Законодавното собрание на Јукон во Вајтхорс
• 
  Законодавното собрание на Северозападните Територии во Јелоунајф
• 
  Законодавното собрание на Нунавут во Икалуит

Поврзано

• Географија на Канада
• Демографија на Канада

Наводи

1. „Број на населението и домовите за Канада, покраините и териториите според пописите од 2011 и 2006 г.“. Statcan.gc.ca. 8 февруари 2012. Архивирано од изворникот на 2020-01-19. Посетено на 8 февруари 2012. (англиски)
2. Министерство за правда на Канада (1985). „Закон за Северозападните Територии“. Архивирано од изворникот на 2006-09-02. Посетено на 27 јануари 2007. (англиски)
3. Министерство за правда на Канада (2002). „Закон за Јукон“. Архивирано од изворникот на 2011-06-05. Посетено на 27 јануари 2007. (англиски)
4. Министерство за правда на Канада (1993). „Закон за Нунавут“. Архивирано од изворникот на 2011-01-05. Посетено на 27 јануари 2007. (англиски)
5. Закон за службените јазици на Северозападните Територии, 1988 (со аманд. 1988, 1991-1992, 2003) (англиски)

Надворешни врски

„Покраини и територии во Канада“ на Ризницата ?

• Покраини и територии Архивирано на 9 февруари 2010 г. - Влада на Канада (англиски)
• Покраините и териториите во Канада Архивирано на 14 август 2010 г. - владин портал „Одиме во Канада“ (англиски)