Hagia Sophia
From Wikipedia, the free encyclopedia
Hagia Sophia atau Aya Sofya (dari Yunani Bizantium Yunani [aˈʝia soˈfia]; bahaso Latin: Sancta Sophia atau Sancta Sapientia; bahaso Arab: آيا صوفيا; "Kebijaksanaan Suci") adolah sabuah tampek ibadah di Istanbul, Republik Turki. Dari maso pambangunannyo pado taun 537 M sampai 1453 M, bangunan iko marupoan katedral Ortodoks jo tampek kadudukan Patriark Ekumenis Konstantinopel[1], kacuali pado taun 1204 sampai 1261, katiko tampek iko diubah dek Pasukan Salib Kaampek manjadi Katedral Katolik Roma di bawah kakuasoan Kakaisaran Latin Konstantinopel. Bangunan iko manjadi musajik mulai 29 Mei 1453 sampai 1931 pado maso kakuasoan Kasultanan Utsmani. Kudian bangunan iko disekulerkan sarato dibukak sabagai museum pado 1 Februari 1935 dek Republik Turki.[2] Namun manjadi musajik baliak pado Jumaik, 10 Juli 2020 sasudah pangadilan Turki mamutuihan basonyo konversi Hagia Sophia pado taun 1934 manjadi museum adolah ilegal. Kaputusan iko mambukak jalan untuak baliak mangubah monumen tasabuik manjadi musajik.[3]
 Hagia Sophia, Istanbul | |
| Koordinat | 41.008548°N 28.979938°E |
|---|---|
| Parancang | Isidore dari Miletus Anthemius dari Tralles |
| Tipe |
|
| Panjang | 82 m (269 ft) |
| Leba | 73 m (240 ft) |
| Tinggi | 55 m (180 ft) |
| Konstruksi partamo | 532 |
| Tanggal salasai | 537 |
Tanamo dek gobah gadangnyo, Hagia Sophia dipandang sabagai lambang arsitektur Bizantium jo dikecekan "alah mangubah sijarah arsitektur."[4] Bangunan iko tatap manjadi katedral nan gadang di dunia salamo hampia saribu taun sampai Katedral Sevilla disalasaian pado taun 1520.[5]
Bangunan nan kiniko mulonyo dibangun sabagai sabuah gareja antaro taun 532-537 ateh parintah Kaisar Romawi Timur Yustinianus I dan marupokan Gareja Kabijaksanoan Suci katigo nan dibangun di tanah nan samo jo duo bangunan sabalunnyo nan alah hancua dek karusuahan. Bangunan iko didesain dek ahli ukua Yunani, Isidore dari Miletus jo Anthemius dari Tralles.[6]. Gareja iko dipasambahkan kapado Kebijaksanaan Tuhan, sang Logos, pribadi kaduo dari Trinitas Suci,[7] alek paringatannyo diadokan satiok 25 Desember untuak mamparingati kalahiran dari inkarnasi Logos dalam diri Kristus.[7] Walaupun sasakali disabuik sabagai Sancta Sophia (saolah dinamoi dari Santa Sophia), sophia sabananyo palafalan fonetis Latin dari kata Yunani untuak kabijaksanoan. Namo langkoknyo dalam bahaso Yunani adolah Ναὸς τῆς Ἁγίας τοῦ Θεοῦ Σοφίας, Naos tēs Hagias tou Theou Sophias, "Tampek Paziarahan Kabijaksaan Suci Tuhan".[8][9]
Pado 1453 M, Konstantinopel ditaklukkan dek Utsmani di bawah kapamimpinan Sultan Mehmed II, nan kudian mamarintahkan pangubahan gareja utamo Kristen Ortodoks manjadi musajik. Tanamo sabagai Aya Sofya dalam ijoan Turki, bangunan nan barado dalam kaadaan rusak iko maagaiah kesan kuek pado panguaso Utsmani dan mamutuihkan untuak mangubahnyo manjadi musajik.[10][11] Babagai lambang Kristen sarupo ganto, gambar, jo mosaik nan manggambarkan Yesus, Maria, urang-urang suci Kristen, jo malaikaik-malaikaik disuruakkan jo kain itam. Babagai atribut Islam sarupo mihrab, minbar, jo ampek minaro, ditambahkan. Aya Sofya tatap batahan sabagai musajik sampai taun 1931 M. Kudian bangunan iko ditutuik untuak umum dek Pamarintah Republik Turki nan kudian dibukak baliak sabagai museum ampek taun sasudahnyo pado 1935. Pado taun 2014, Aya Sofya manjadi museum kaduo di Turki nan paliang banyak dikunjuangi, hampia 3,3 juta wisatawan per taun.[12] Manuruik data nan dikaluakan dek Kamenterian Budaya dan Pariwisata Turki, Aya Sofya marupokan tampek di Turki nan paliang mamikek paratian wisatawan pado 2015. Dari pangubahan mulo bangunan iko manjadi musajik sampai pambangunan Musajik Sultan Ahmed (disabuik juo jo Musajik Biru) pado 1616, Aya Sofya marupoan musajik utamo di Istanbul. Arsitektur Bizantium pado Aya Sofya mangilhami banyak musajik Utsmani, sarupo Musajik Biru, Musajik Şehzade (Musajik Pangeran), Musajik Süleymaniye, Musajik Rüstem Pasha, jo Musajik Kılıç Ali Pasha.[13]
Gareja partamo
Gareja partamo nan dibangun pado tanah tasabuik, dinamokan juo sabagai Μεγάλη Ἐκκλησία (Megálē Ekklēsíā, "Gareja Basa"), atau dalam bahaso Latin "Magna Ecclesia",[14][15] dek ukuarannyo nan sangaik gadang bilo dibandiangkan jo gareja katiko itu di kota Konstantinopel.[7] Gareja iko diresmian pado 15 Februari 360 pado maso pamarintahan Kaisar Konstantius II dek Uskup Arian, Eudoxius dari Antiokia, didirikan di sabalah tampek istano kakaisaran dibangun. Gareja Hagia Eirene (sacaro harfiah bamakna "Kadamaian Suci") di dakeknyo alah disalasaikan talabiah daulu sabalun Gareja Basa salasai. Kaduo gareja iko paguno sabagai gareja utamo dari Kakaisaran Romawi Timur.[16]
Manulih pado 440, Sokrates dari Konstantinopel mangklaim basonyo gareja iko dibangun dek Konstantius II, nan mangarajokannyo pado taun 346.[16] Tradisi nan indak labiah tuo dari abaik ka-7 malaporan basonyo bangunan iko dibangun dek Konstantinus Agung.[16] Zonaras mandamaikan kaduo pandapek tasabuik, manulih basonyo Konstantius alah mampelokan bangunan nan alah dikuduskan dek Eusebius dari Nikomedia iko, sasudah karuntuahannyo.[16] Karano Eusebius manjadi uskup Konstantinopel pado 339-341, dan Konstantinus maningga pado 337, tampaknyo mungkin sajo basonyo gareja partamo iko didirian dek Konstantinus.[16] Bangunan iko dibangun sabagai sabuah basilika batunggak Latin tradisional jo babagai galeri sarato baatok kayu, didahului jo sabuah atrium. Bangunan iko diklaim sabagai salah satu monumen nan paliang manonjol di dunia pado maso itu. Patriark Konstantinopel Yohanes Krisostomus talibaik pasalisiahan jo Parmaisuri Aelia Eudoxia, istri dek Kaisar Arcadius, nan kudian diasingkan pado 20 Juni 404. Pado karusuahan barikuiknyo, gareja partamo iko sabagian gadang tabaka. Indak ado nan tasiso dari gareja partamo iko.[16]
Gareja kaduo
Gareja kaduo dilewa pado 10 Oktober 415 ateh parintah Kaisar Theodosius II. Basilika iko punyo atok kayu nan dibangun dek arsitek banamo Rufinus. Pado maso Karusuahan Nika, gareja iko tabaka pado 13–14 Januari 532. Babarapo balok marmar dari gareja kaduo iko salamaik sampai kiniko, babarapo di antaronyo adolah relief nan manggambarkan duo baleh domba nan mawakili duo baleh rasul. Awalnyo bagian dari salah satu pintu mungko monumental, balok-balok tu kiniko barado di lubang panggalian nan badakekan jo pintu masuak museum sasudah panamuan pado taun 1935 di bawah halaman sisi barat dek A. M. Schneider. Panggalian barikuiknyo indak dilanjuikkan dek takuik marusak kautuahan bangunan.[16]
Gareja katigo
Pado maso pandudukan Konstantinopel pado Parang Salib Kaampek, gareja iko dijarah sarato dinodai dek Tentara Salib, cando nan dijalehkan dek sijarawan Bizantium Niketas Choniates. Pado maso pandudukan Latin di Konstantinopel (1204–1261), gareja iko barubah manjadi Katedral Katolik Roma. Baldwin I dimangkutoi sabagai kaisar pado 16 Mei 1204 di Hagia Sophia, jo upacara nan palaksanaannyo manggunoan adaik Bizantium. Enrico Dandolo, Doge Republik Venesia nan mamimpin pandudukan jo invasi tahadok Konstantinopel dek Tentara Salib Latin pado 1204, dimakamkan di dalam gareja iko. Makam nan alah taukia namonyo, nan manjadi bagian dari dekorasi lantai, diludahi dek banyak masyarakaik Romawi Timur nan marabuik baliak Konstantinopel pado taun 1261 M. Namun, katiko restorasi nan dipimpin dek Fossati basudaro sapanjang taun 1847–1849, muncua karaguan tahadok kaaslian makam doge tasabuik; tampaknyo labiah sarupo sabuah paringatan simbolis daripado situs pamakaman.
Sasudah dirabuik baliak pado 1261 dek banso Bizantium, gareja iko dalam kaadaan bobrok. Pada 1317, Kaisar Andronikus II mamarintahkan supayo ampek panopang (Πυραμὶδας, bahaso Yunani:"Piramídas") baru dibangun di sisi timur jo utara gareja. Pambiayaannyo manggunokan warisan dari mandiang istrinyo, Irene. Kubah gareja mangalami karatakan sasudah gampo bumi bulan Oktober 1344. Kudian babarapo bagian bangunan runtuah pado 19 Mei 1346; alhasil gareja iko ditutuik sampai 1354 katiko pabaikan dilakuan dek arsitek-arsiteknyo, Astras jo Peralta. [17] [18]
Musajik
Konstantinopel ditakluakkan dek Utsmani pado 29 Mei 1453. Banyak catatan nan marakam kajadian tu, walaupun babarapo ditulih sakian lamo sasudah paristiwa tasabuik tajadi dan masiang-masiang manyatokan sabagai catatan nan mandakati aslinyo. Baiak Yunani, Italia, Slavia, Turki, jo Rusia, kasadonyo punyo versinyo masiang-masiang nan mungkin sulik untuak disatuan.[19] Salah satu versi carito tasabuik adolah nan ditulis sijarawan kontemporer Inggirih banamo Steven Runciman nan tanamo dek bukunyo nan bajudul A History of the Crusades.[20]
Sasudah panakluakan, Hagia Sophia, disabuik Aya Sofya dalam pelafalan Turki, diubah manjadi musajik kakaisaran. Walaupun baitu, kabaradoan Gareja Kristen Ortodoks tatap diakui, sabagaimano dalam sistem millet Utsmani nan mambarikan agamo non-Islam kawenangan khusus dalam mangatua urusannyo surang. Gennadius Scholarius kamudian ditatapkan sabagai Patriark Konstantinopel partamo pado maso Utsmani, kamudian manatapkan kadudukannyo di Gareja Rasul Suci, nan kamudian bapindah ka Gareja Pammakaristos.[21] [22]
Pado abaik kaanam baleh, Sultan Suleiman Al Kanuni mambaok duo batang lilin kuno dari panaklukannya ateh Hungaria dan ditampekkan mangapik mihrab. Pado maso Selim II, dikaranokan muloi manunjuakkan tando-tando karapuahan, Aya Sofya dipakuek jo dukuangan struktural untuak bagian lua. Proyek iko dikapaloi arsitek Utsmani katiko itu, Mimar Sinan, nan tanamo juo sabagai salah satu insinyur gampo partamo di dunia.[23] Untuak mampakuek struktur basijarah Bizantium iko, Sinan mambangun duo minaro gadang di barat nan mulonyo ruang khusus sultan, jo türbe (bangunan untuak makam di Turki) untuak makam Selim II di tenggara bangunan pado 1576-7 M / 984 H.[17] Salain itu, lambang bulan sabit ameh dipasang di ateh gobah.[17] Kudian, makam iko manjadi makam dek 43 pangeran Utsmani.[17] Pado 1594 M / 1004 H, Mimar (kapalo arsitek) Davud Ağa mambangun makam Murad III (1574–1595), tampek sultan jo pamaisurinyo, Safiye Sultan, puto, jo putinyo dikabumikan.[17] Bangunan makam persegi salapan putonyo Mehmed III (1595–1603) dibangun arsitek kakaisaran Dalgiç Mehmet Aĝa pado 1608 / 1017 H. Di bangunan iko, dimakamkan pulo Handan Sultan, selir Mehmed III nan manjadi ibu suri dek putonyo Ahmed I. Dimakamkan pulo puto jo puti Ahmed I, puti dari Murad III, jo puto sultan lainnyo.[24] Putonyo nan lain, Mustafa I (1617–1618; 1622–1623), mangubah bakeh ruang untuk pambaptisan manjadi türbe-nyo.[24]
Museum
Kasultanan Utsmani runtuah pado November 1922 M kamudian digantikan dek Republik Sekuler Turki. Presiden partamonyo, Mustafa Kemal Atatürk mamarintahkan panutupan Aya Sofya pado 1931 M untuak umum, dan dibukak ampek taun kamudian pado 1935 M sabagai museum. Karpet untuak ibadah shalat dihilangkan, plester jo cat-cat kaligrafi dikalupehan, manampakkan baliak lukisan-lukisan Kristen nan tatutupi salamo limo abaik. Sajak maso itu, Aya Sofya dijadian salah ciek objek wisata terkenal dek pamarintah Turki di Istambul. Panggunoan Aya Sofya sabagai tampek ibadah dilarang kareh dek pamarintah Turki nan bahaluan sekuler.[25] Namun parintah itu malunak katiko pado 2006, pamarintah Turki mangizinkan alokasi khusus untuak sabuah ruangan doa Kristen jo museum Muslim staf dan sajak taun 2013,[26] muazin mangumandangkan adzan dari menara museum duo kali katiko siang hari.[27]
Baliak manjadi musajik
Pado suatu kampanye Partai Keadilan dan Pambangunan (AKP, Presiden Turki Recep Tayyip Erdogan manjanjikan untuak mangambalikan fungsi Aya Sofia sabagai musajik, sasuai jo usulan dan kainginan rakyat Turki (27/03/2019). Tantang kacaman jo protes dari babagai pihak ateh parubahan fungsi Aya Sofia, Presiden Erdogan mambandiangkan kajadian nan tajadi indak lamo sabalunnyo, yaitu sarangan nan manargetkan Musajik Al Aqsha di Yerussalem dan pihak lain hanyo diam, baaitu pulo jiko Aya Sofia manjadi musajik saharusnyo pihak lain cukuik diam, indak paralu malayangkan protes jo kacaman.[28][29][30]
Pado Bulan Juni 2020, babarapo Uskup Katolik di Turki jo tokoh-tokoh Katolik Roma manyatokan dukuangan sacaro indak langsuang tahadok kaputusan pamarintah Turki ateh status Aya Sofia. Manuruik inyo, Pamarintah Turki mampunyoi kadaulatan untuak manantukan eksistensi dan status Aya Sofia. Samantaro Patriarki Armenia mandukuang kaputusan pamarintah disaratoi jo harapan supayo salain dialiah-fungsikan sabagai musajik, pado bagian tatantu di Aya Sofia disadioan ruangan untuak tampek baibadah umaik Kristen. Hal tasabuik dimukasuikkan untuak manunjuakkan pasan padamaian, toleransi, jo ubuangan nan labiah arek antaro Islam jo Kristen[31].
Akianyo pado tanggal 10 Juli 2020, Pangadilan Tinggi Turki mambatalkan kaputusan 1943 nan mangubah status Aya Sofia manjadi museum. Sairiang jo kaputusan tasabuik, pado tanggal nan samo Presiden Turki Recep Tayyip Erdogan mangaluakan dekrit nan barisi "Hagia Sophia baliak ka fungsinyo samulo sabagai tampek ibadah umaik Islam. Ibadah partamo dapek dilakuan muloi 24 Juli 2020.".. Bagopun alah baraliah-fungsi sabagai musajik, Aya Sofia tatap tabukak untuak umum nan nio bakunjuang ka Aya Sofia.[32][33][34][35]
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
