Gorakshep
From Wikipedia, the free encyclopedia
From Wikipedia, the free encyclopedia
Gorakshep atau Gorashop (bahaso Nepali: गोराशप) adolah bakeh danau nan alah kariang, baku jo tatutuik pasia, nan tadapek di Nepal, jo namo pulo untuak pamukiman ketek nan barado di tapinyo, nan bakatinggian 5,164 m (16,942 kaki) dakek Gunuang Everest. Kampuang ko diunyi tapi indak sapanjang taun.
Walaupun panginapan untuak para pandaki di Gorakshep sadarano sajo, balakangan iko fasilitas nan labiah moderen alah mulai tasadio, sarupo akses internet satelit bakacapatan tinggi.
Gorakshep tamasuak dalam Taman Nasional Sagarmatha, tampek kalaiaran urang Sherpa, nan tanamo dek kaahliannyo sabagai pamandu jo pandaki gunuang. Di siko ko adolah tampek pambarantian taakia untuak jalua-jalua pandakian umum manuju Pangkalan Dasa Everest (Everest Base Camp) dari Lukla, nan paliang populer untuak para wisatawan jo olahragawan.
Jalua ko mambao para pandaki dari Lukla ka Namche Bazaar, Tengboche, Pangboche, Dingboche, Lobuche, inggo ka Gorakshep. Kabanyakan pandaki ka bamalam di sinan, dek ijin pandakiannyo malarang bakemah di Pangkalan Dasa Everest.[1]
Salain tu, Gorakshep marupoan juo "titiak tolak" tabaiak untuak mandaki Kala Patthar, nan tacaliak sarupo bukik pasia gadang nan manjulang di ateh danau kariang ko. Bagi banyak pandak, mancapai puncak Kala Patthar nan bakatinggian 5,550 meter (18,209 kaki) mambari pamandangan Everest taelok jo marupoan tampek tatinggi nan dapek dicapai tanpa ijin pandakian, nan aruih dimintak di Kathmandu pado Asosiasi Pandaki Gunuang Nepal.[2]
Pandakian dimuloi pado pagi ari, iyolah kutiko umumnyo jarak pandang labiah rancak. Dibutuahan ampek jam untuak mancapai puncak jo baliak lai. Gorakshep daulu adolah Pangkalan Dasa Everest nan asali, nan bapakai dek para pandaki Swiss dalam usaonyo mandaki Everest taun 1952. Kudian pangkalan tu dipindahan labiah dakek lai ka gunuang, tapek di bawah Aia Tajun Khumbu. Lamo mandaki dari Gorakshep ka Pangkalan Dasa Everest antaro 1.5 inggo 2.5 jam, tagantuang cuaco, aklimatisasi, jo kondisi badan satiok urang.[3] Pado katinggian ko, anyo saketek nan maraso nyaman jo banyak nan mulai marasoan gejala panyakik katinggian (Acute Mountain Sickness).[4]
Wakatu tarancak untuak pandakian adolah di musim semi (Maret jo April) jo musim gugur (Oktober jo Nopember), iyolah kutiko jarak pandang jarak pandang di gunuang ideal sarato suhu indak talampau bana dinginnyo.[5] Namun di musim gugur biasonyo sabana susah dapek tampek lalok jo bamalam, walau biasonyo para pandaki buliah lalok di ateh lantai ruang makan panginapan.
Salamo musim dingin, antaro bulan Desember inggo Pebruari, masih mungkin dilakuan pandakian, namun sabagian gadang akomodasi lah tutuik, jalua-jalua basalimuik salju, sarato suhunyo lai sabana dingin. Gorakshep aratinyo "gagak mati," dek karano indak ado samo sakali tumbuah-tumbuahan di tampek ko.
 |
 |
