From Wikipedia, the free encyclopedia
Mohandas Karamchand Gandhi (aksara Devanagari: मोहनदास करमचन्द गांधी; bahaso Hindustani: [ˈmoːɦənd̪aːs ˈkərəmtʃənd̪ ˈɡaːnd̪ʱi] ( simak); lahia di Porbandar, Gujarat, India Britania, 2 Oktober 1869 – maningga di New Delhi, India, 30 Januari 1948 pado umua 78 taun) adolah saurang pamimpin spiritual jo politikus dari India. Gandhi adolah salah saurang nan paliang pantiang nan talibat dalam Garakan Kemerdekaan India. Inyo adolah aktivis nan indak manggunoan kakarasan, mangusuang garakan kamerdekaan malalui aksi demonstrasi damai. Pado maso kahidupan Gandhi, banyak nagara nan marupoan koloni Britania Raya. Panduduak di koloni-koloni tasabuik mandambaan kamerdekaan supayo dapek mamarintah nagaranyo surang.
Gala Mahatma (bahaso Sanskerta: "jiwa agung")[1] diagiahan kapadonyo pado taun 1914 di Afrika Selatan.[2] Salain itu, di India inyo dipanggia juo Bapu (bahasa Gujarat: panggilan istimewa untuak "ayah",[3] "papa"[3][4]).
Gandhi lahia pado 2 Oktober 1869 di nagara bagian Gujarat di India. Babarapo dari anggota kaluarganyo bakarajo pado pihak pamarintah. Saat remaja, Gandhi pindah ka Inggirih untuak mampalajari hukum. Satalah inyo manjadi pangacara, inyo pai ka Afrika Selatan, sabuah koloni Inggris, di mano inyo mangalami diskriminasi ras nam dinamoan apartheid. Inyo kamudian mamutuskan untuak manjadi saurang aktivis politik supayo dapwk maubah hukum-hukum nan diskriminatif tasabuik. Gandhi pun mambantuak sabuah garakan non-kakarasan.
Katiko baliak ka India, inyo manbantu dalam proses kamerdekaan India dari jajahan Inggirih; hal iko maagiahan inspirasi bagi rakyaik di koloni-koloni lainnyo supayo bajuang mendapekan kamerdekaannyo jo mamacah Kamaharajoan Britania untuak kamudian mambantuak Pasemakmuran.
Rakyaik dari agamo jo suku nan babeda nan hiduik di India maso itu yakin baso India paralu dipacah manjadi babarapo nagara bia kalompok nan babeda dapek mampunyoi nagara mereka surang. Banyak nan nio supayo para pamaluak agamo Hindu jo Islam mampunyoi nagara surang. Gandhi adolah saurang Hindu namun inyo manyukou pamikiran-pamikiran dari agamo-agamo lain tamasuak Islam jo Kristen. Inyo pacayo baso manusia dari sagala agamo harus mampunyoi hak nan samo jo hiduik basamo sacaro damai di dalam ciek nagara.
Pado 1947, India manjadi merdeka jo pacah manjadi duo nagara, India jo Pakistan. Hal iko indak disatujui Gandhi.
Prinsip Gandhi, satyagraha, acok ditajamahkan sabagai "jalan nan bana" atau "jalan manuju kabenaran", alah manginspirasi babagai generasi aktivis-aktivis demokrasi jo anti-rasisme mode Martin Luther King, Jr. jo Nelson Mandela. Gandhi acok mangecekan kalau nilai-nilai ajarannyo sangaik sadarano, nan badasaran kapicayoan Hindu tradisional: kabanaran (satya), jo non-kakarasan (ahimsa).
Pado 30 Januari 1948, Gandhi dibunuah saurang laki Hindu nan berang kapado Gandhi karano inyo diduga talampau mamihak kapado Muslim.
Gala Mahatma acok disalahartian di Barat sabagai namo kaciak Gandhi. Mahatma marupoan sabuah kato dalam bahaso Sanskerta nan barasa dari maha (bararti besar) jo atma (bararti Jiwa). Rabindranath Tagore disabuikan sabagai urang nan partamo kali maagiahan gala tasabuik untuak Gandhi.[5] Dalam otobiografinyo, Gandhi mangatoan baso inyo indak pernah manyukai gala jo acok taluko dek hal itu.[6]
Kisah hiduik Mahatma Gandhi alah banyak dituangkan ka dalam film, sastra, jo teater. Ben Kingsley nan mamerankan Gandhi dalam film taun 1982 Gandhi, mamanangan Academy Award untuak Aktor Tabaiak. The Making of the Mahatma nan dirilis pado taun 1996 mandokumentasikan kahidupan Gandhi di Afrika Selatan. Gandhi juo marupoan tema sentral dalam film Bollywood taun 2006 Lage Raho Munna Bhai. Pado taun 2007, sabuah film bajudul Gandhi, My Father mancaritoan hubuangan antaro Gandhi jo putranyo Harilal.
Gandhi indak pernah manarimo Pangharagoan Padamaian Nobel, meski inyo dinominasian limo kali antaro 1937 jo 1948. Babarapo dekade kamudian, hal iko dissali sacaro umum dek pihak Komite Nobel. Katiko Dalai Lama dianugerahi Penghargaan Nobel pado 1989, katua umum Komite mangatoan baso iko marupoan "sabuah bantuak manganang Mahatma Gandhi".
Museum elektronik Nobel mampunyoi artikel mangenai hal tasabuik.
Sapanjang hiduknyo, aktivitas Gandhi alah manarik babagai komentar jo opini. Misalnyo, sabagai panduduak Karajaan Britania, Winston Churchill pernah bakato "Manyadiahan...mancaliak Mr. Gandhi, saurang pangacara Kuil Tangah nan manghasuik, kini tampil sabagai saurang fakir nan tipenyo umum di Timur, manaiki tangga Istano Viceregal jo badan satangah-telanjang." Baitu juo jo Albert Einstein nan bakomentar barikuik manganai Gandhi: "(Mungkin) para generasi barikuik akan sulik mampicayoi baso ado urang cando iko nan pernah hiduik di dunia ini."
Karya Mahatma Gandhi indak talupoan dek generasi barikuiknyo. Cucunya, Arun Gandhi jo Rajmohan Gandhi jo bahkan anak cucunya, Tushar Gandhi, adolah aktivis-aktivis sosio-politik nan talibat dalam mampromosikan non-kekerasan di saluruah dunia.
Kato kabajikan nan dikenang Mahatma Gandhi:
“ | Cinto indak pernah mamintak, inyo sanantiaso maagiah, cinto mambaok pandaritoan, tapi indak pernah badandam, ndak pernah mambaleh dendam. Di mano ado cinto di situ ado kahidupan; manokala kabancian mambao kapado kamusnahan. | ” |
“ | Jadilah waang manusia nan pado kalahiran ang sadoalah urang galak bahagia, tapi hanyo ang surang nan manangih jo pado kamatianmu sadoalah urang manangih sadih, tapi hanyo kamu surang nan tasenyum. | ” |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.