7 сӱрем (7 июль) — григориан кечышот почеш идалыкын 188-ше (кужемдыме ийлаште — 189-ше) кечыже. Идалык пытыме марте 177 кече кодеш.
Россий,
Белоруссий,
Украина, Иван Купала.
Йӱдвел Осетий, Республик кече.
Соломон Отро-влак, Эрыкан лийме кече.
Танзаний, Ял озанлык кече.
Японий, Танабата или Шӱдыр-влак фестиваль — Йӧратымаш парем.
Россий, Сарзе чап кече — 1770-ше ийыште Чесмен кучедалмашыште руш флот турок-влакым секен кертын.
- Танле (православный) лӱм-влак: Антон (Антоний), Иван, Яков (Иаков).
- Католик лӱм-влак: Венедикт, Кирилл, Мефодий.
Тугак ончо: Категорий:Сӱрем тылзын 7 кечысе событий-влак
- 1807 ий — Россий ден Франций коклаште Тильзит вашкелшыкым пеҥгыдемдыме.
- 1881 ий — Римысе йоча-влаклан газетыште Пиноккио нерген йомакым икымше гана савыктеныт.
- 1957 ий — Пагуош олаште ядер оружийым кучылтмо шотышто икымше шанче конференций эртен.
Тугак ончо: Категорий:Сӱрем тылзын 7 кечынже шочшо-влак
- 1950 ий — Александр Иванович Шуралёв, тӱвыра пашаеҥ. Шкеже тудо Морко кундем гыч. Ленинградысе тӱвыра институтым тунем лекмеке, икмыняр ий М. Шкетан лӱмеш Марий кугыжаныш драме театрыште актёрлан тыршен. Но ӱмыраш паша вержым телевиденийыште муын: ончыч режиссёрлан, вара художественный вуйлатышын алмашышыжлан тыршен.
- 1954 ий — Александр Анатольевич Карташов, чоҥымаш специалист. 1981-ше ийыштак уста пашазе «Марийскавтодор» ушемыште пашам ышташ тӱҥалын. Вара Медведево кундемысе корным чоҥышо ушемын вуйлатышыже лийын. 2000-шӧ ий гыч Александр Анатольевич Марий Эл кугыжаныш Погынын депутатше.
- 1959 ий — Светлана Никодимовна Веткина, ужалме пашаште тыршыше пашазе, Россий Федерацийын сатулымо сферын сулло пашаеҥже. Морко кундемыште шочын. 1981-ше ийыште Нуж-Ключ ялыште кевыт вуйлатышылан тыршаш тӱҥалын. Торгайымаш пашаште моткоч кугу пагалымашым сулен.
- Йыван Купала кече. Ты кече дене шуко оҥай йӱла кылдалтын. Ожно Иван Купала кечын тул гоч тӧрштылыныт, эрдене эҥерыште йӱштылыныт, а кӧ ок йӱштыл гын — осал еҥлан шотленыт.
- Марий калык гын тиде кечын эр лупс дене мушкылтын. Мончашкат олтеныт да Йыван Купача кечылан лӱмын ямдылыме выньык дене пуреныт. Ӱдыр-влак гын ончыкылык пӱрымашышт нерген мужедыныт. Марий-влак коклаштат «пелйӱдым кӱртньышудын пеледышыжым муат гын — эн пиалан лият» манме ӱшан шукерте шыҥдаралтын.