From Wikipedia, the free encyclopedia
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Sint-Lambrechts-Woluwe (Frans: Woluwe-Saint-Lambert) ies 'n gemeinte in 't Brussels Hoofsjtaejelik Gewes, mèt 'n oppervlak van 7,22 km² en 47.865 inweunersj (op 1 januari 2006). De gemeinte liek ten oaste van 't centrum van Brussel, aan de Woluwe.
Sint-Lambrechts-Woluwe ies 'n woongemeinte, mèt 'n hoag percentaasj Franstalige en 24,6% boetelendersj (2004). In de gemeinte liek 't academisch hospitaal (Clinique Saint-Luc) en de medische faculteit van de Université catholique de Louvain. Dao in de buurt höbbe ziech versjillende hoagesjoale mèt opleijinge op medisch gebeed gevestig. Óngevaer 10.000 luuj sjtudere in Sint-Lambrechts-Woluwe. Ouch ies d'r 'n opleijingsinstituut veur blinne en sjlechzeende gevestig. Dao ies wiènig industrie, op inkel high-techbedrieve nao.
De gemeinte ies, same mèt Sint-Pieters-Woluwe, 'n gemeinte woa tamelik väöl hièrehoezer en groate weuninge liegke. De neoromaanse Sint-Lambertuskèrk haet 'ne romaanse tore (12e ièw). Tegeneuver de kèrk liek 't kesjtièl Hof van Brussel (16e ièw). Wiejer zint de hoaggotische baevaartkapel van Lenneke Mare en 'n windmeule oet 1767 bezeenswaerdig. 't Gemeintehoes ies 'n art deco-geboew, óntworpe door Joseph Diongre, d'n arsjitek van 't Flageygeboew in Elsene.
Sint-Lambrechts-Woluwe óntsjtóng es landboewdörp aan de Woluwe in de 11e ièw. Me boewde hie 'n kèrk gewiejd aan Lambertus, de biesjop van Luuk. Vanaaf 't ing van de 19e ièw begoes 't plaetske te versjtaejelike.