From Wikipedia, the free encyclopedia
Zanter der Belagerung vun der Stad Lëtzebuerg duerch d'Fransousen am Joer 1684 war den Duché un de Louis XIV. gaangen.
Déi éischt Expeditioun vum Créquy vum 21. bis de 27. Dezember 1683, hat als eenzegt Zil d'Zerstéierung vun der Stad. De Louvois huet dem Créquy de 27. November geschriwwen:
Glécklecherweis schloen net all d'Bommen an, an d'Stad ka sech ënner anerem och duerch d'Aarbecht vun de Magistraten an de Bierger virum totale Ruin retten. Trotz allem huet d'Stad Lëtzebuerg awer schwéier Schied dovu gedroen. Dem Vauban säin éischten Androck war follgenden:
32 Gebaier waren duerch d'Bombardementer komplett zerstéiert. De Rescht, bis op e puer Ausnamen, war no 1683/84 an engem lamentabelen Zoustand. Et feelen Diech, de Buedem ass duerch Projektiller méi schlëmm wéi e Schwäizer Kéis. An de meeschte Fäll ass de Rez-de-chaussée nach eenegermoossen ze bewunnen.
D'Zerstéierung vu sou vill Haiser war en Desaster fir all Bevëlkerungsschichten, an haaptsächlech fir d'Handwierker an d'Händler. Vill vun hinnen hate sech zanter 1671 kleng Haiser an de Stroosse Chimay, Monterey, Louvigny, Porte-Neuve a Beaumont gebaut, an op bal alle louch nach eng Hypothéik wéi d'Fransouse komm sinn. Et hunn also nei Prête missen opgeholl ginn, fir d'Reparatiounen, déi de Louis XIV. am Januar 1685 beschloss hat, bezuelen ze kënnen.
E gudden Iwwerbléck iwwer den Zoustand vun der Stad bitt d'Visite générale faicte le 13 juin 1684, eng Lëscht an der Uewerstad fir ze kucke wou een d'franséisch Zaldote kéint ënnerbréngen, an eent vun de vereenzelten Dokumenter dat d'Fransousen net nees mat heemgeholl hunn, wéi si 1697 nees d'Stad verlooss hunn. Dora sinn am Ganzen 305 Haiser opgelëscht, mä d'Lëscht ass net komplett, e puer Säite sinn am Laf vun der Zäit verluer gaangen.
Fir d'Sympathië vum Lëtzebuerger Vollek fir den neie franséische Monarch ze verstoen, muss ee sech d'Onzefriddenheet vun de Lëtzebuerger vis-à-vis vun de Spuenier an hirer Garnisoun virun A féieren. De Conseil provincial an d'Generalstänn vu Lëtzebuerg hu sech dës Ëfteren iwwer d'Exzesser vun de spuenesche Regimenter beschwéiert. Si hunn eng sëlleg Requêten un de Gouvernement zu Bréissel geschriwwen.
Sou ass et méi einfach ze verstoen, datt et fir vill Lëtzebuerger mat engem neie Regime nëmme besser konnt ginn. D'Land gouf nees sécher, de Commerce huet en Opschwong erlieft, an duerch grouss Zommen déi de Louis XIV. investéiert huet, gouf d'Stad nees opgebaut an d'Festung ënner dem Vauban verbessert.
Vill Membere vum ale Conseil provincial sinn net an den Exil gaangen. Ënner de Spuenier hate si schonn eng flott Carrière gemaach, a sou ass et ze verstoen, datt si dës kaum ënnerbrieche wollten. Den Historiker Paul Margue beschreift dës Situatioun mat de Wierder "Il n'y avait guère de réticence, désormais, à servir les Français pourvu que le service nourrît son homme".
Vum 21. bis de 26. Mee 1687 war de Louis XIV. vu Frankräich an der Stad Lëtzebuerg fir d'Festung Lëtzebuerg, déi no de Pläng vum Vauban an deenen dräi Joer virdrun ausgebaut gi war, z’inspizéieren.
Wärend senger Visitt huet hien eng Partie Audienze ginn, a sech generéis vis-à-vis vum Lëtzebuerger Klerus gewisen. De 26. Mee huet de Louis XIV. Lëtzebuerg nees verlooss.
Méi Informatioun doriwwer am Artikel: Openthalt vum Louis XIV. vu Frankräich zu Lëtzebuerg.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.