Eisebunnsstreck Péiteng-Lëtzebuerg

D'Eisebunnsstreck Péiteng - Lëtzebuerg gouf vun der Société des Chemins de fer Prince-Henri, kuerz PH oder de Prënz genannt, als eegleiseg Streck gebaut. Si ass 20,390 Kilometer laang a leeft haaptsächlech op de Gemengegrenzen. Deemools wollt keng Gemeng den Damp an de Stëbs an hiren Uertschaften. Zanter Dezember 2012 ass se zweegleiseg.

Eisebunnsstreck Péiteng-Lëtzebuerg

Linnennummer	7
Besëtzer	Lëtzebuerg
Bedreiwer	CFL
iwwer	Gare Hollerech, Gare Leideleng, Gare Dippech-Reckeng, Gare Schuller, Gare Nidderkäerjeng-Suessem
Technesch Donnéeën
Längt	20,40 km
Gréisst Steigung	14 ‰
Spuerbreet	Normalspuer
Streckentyp	duebelgleiseg
Stroumsystem	25kV Wiesselstroum

CFL-Linn 7 um PK 7.750

D'Streck Péiteng-Lëtzebuerg zu Leideleng am November 2008, gesinn an Direktioun Lëtzebuerg

D'Trass fir d'Eisebunnsstreck Péiteng-Lëtzebuerg gëtt vun der Administration des chemins de fer verdeelt. D'CFL bedreift a geréiert d'Infrastruktur vun der Streck, déi am Besëtz vum Lëtzebuerger Staat ass.

Linn

D'Eisebunnsstreck Péiteng-Lëtzebuerg gëtt vun der Eisebunnsverwaltung als Linn 7 bezeechent. Bis Enn 2024 war s'am kommerzielle Passagéierverkéier vun der CFL als Linn 70 bekannt. Iwwer d'Streck fiert follgend d'CFL-Linn^{(Stand: Januar 2025)}:

• Lëtzebuerg - Nidderkäerjeng-Suessem - Rodange - Attem (Athus).

Geschicht

• 08. August 1900: Déi nei Streck gëtt a Betrib geholl.
• 06. September 1900: Offiziell Aweiung vun der Streck a vun der aktueller Gare vu Péiteng.
• 01. Oktober 1932: Ufank vun Terrassementsaarbechten tëscht de Gare Péiteng an Dippech fir d'Streck zweegleiseg ze bauen. Dës Aarbechten hu bis 1934 gedauert. En zweet Gleis ass awer deemools net geluecht ginn.
• 10. Mee 1940: D'Deutsche Reichsbahn gëtt neie Patron vun der Streck.
• 10. September 1944: E provisoresche Comité de gérance iwwerhëlt d'Verwaltung.
• 01. Juni 1945: D'Société Nationale des Chemins de Fer Luxembourgeois (CFL) gëtt gegrënnt an iwwerhëlt d'Streck.
• 01. Juni 1981: D'Streck ass elektrifizéiert ginn (Käschtepunkt: 346 Mill. Frang) an den elektreschen Zuchbetrib gëtt offiziell ageweit.
• 25. September 1993: Dee leschte Paräisser Schnellzuch fiert iwwer d'Streck Péiteng - Lëtzebuerg.
• 13. Dezember 2004: D'Aarbechte fir d'Streck 2-gleiseg auszebaue ginn an Ugrëff geholl. Käschtepunkt: 294 Milliounen Euro.
• Summer 2009: De Gleisbau ass fäerdeg bis op Dippech-Recken.
• Mee 2010: Déi al Bréck iwwer d'Areler Autobunn gëtt ofgerappt an duerch eng modern Bowstring-Bréck ersat.
• 07. Dezember 2012: Déi ewell zweegleiseg Streck gëtt ageweit.^[1]

Kuckt och

• Lëscht vun de lëtzebuergeschen Eisebunnsstrecken

Um Spaweck

Commons: Eisebunnsstreck Péiteng-Lëtzebuerg – Biller, Videoen oder Audiodateien

• D'Eisebunnsstreck Lëtzebuerg - Péiteng op der Websäit "rail.lu"
• Kabinenmitfahrt CFL Strecke Luxembourg - Petange - Rodange - Athus Video op Youtube vun der CFL
• Donnéeën iwwer d'Streck: Réseau Ferré Luxembourgeois - Document de Référence du Réseau 2026, Version 1.0.

Referenzen

1. "CFL: Nei Südstreck gouf um Freideg ageweit." RTL.lu - 08.12.2012, 08:00 | Fir d'lescht aktualiséiert: 08.12.2012, 08:54.