Memum
From Wikipedia, the free encyclopedia
From Wikipedia, the free encyclopedia
Memum[1] (Anglice meme) est quidquid per variorum morum et consuetudinum aliorumque exemplorum imitationem multiplicatur atque inter homines communicatur. Saepe cum idea comparatur; re vera, quam ob rem duobus opus sit terminis idem fere valentibus, nonnumquam quaeritur. At cum in ideis (opinionibus, existimationibus, religionibus, doctrinis, cett.) de rebus significativis agatur, memi proprium est per selectionem et successionem superstitare et sua sponte mutari. Mema enim sunt aemulae informationis particulae, quae sibi ipsis consulentes certatim se multiplicare suumque locum[2] tenere contendunt. Constat memum ad vocabulum q.e. genum fictum esse. Ideo aliquando "genum culturale" appellari solet.
Studium memorum memetica appellatur.
Anno 1976, Ricardus Dawkins, biologus Britannicus, librum The Selfish Gene ('De geno sibi consulenti') inscriptum edidit. Quo opere omnes animantes arguit genis sibi ipsis consulentibus inservire: Genum enim organismum construere, quo velut superstitandi machina[3] usum se multiplicet. Quo in opere etiam sui multiplicatorem alterius generis proposuit, qui per successiones non biologicas (ut genum) sed sociales se multiplicando superstitet. Hunc multiplicatorem dixit per imitationem vel mimesin communicari ac propagari. Itaque Dawkins in animo habebat vocabuli Graeci q.e. μίμημα 'imitamentum, simulamen' formam Anglice mimeme redditam, cui quidem primam syllabam abscidit, ut vocem cum vocabulo q.e.gene 'genum' melius concinentem fingeret. Nempe eadem ratione etiam memum ad genum fictum est.[4]