Gravedo
From Wikipedia, the free encyclopedia
Gravedo, vel hodiernis vocibus medicis rhinitis acuta catarrhalis et nasopharyngitis et acutus rhinopharyngitis viralis et acuta coryza, est viralis superioris systematis respiratorii morbus, praecipue a rhinoviris et coronaviris effectus.[1] Ea est communissimus inter homines morbus.
Communes gravedinis notae sunt pharyngitis, rhinitis, congestio nasalis, sternumentum, et tussis, aliquando cum comiunctivitide, myalgia, fatigatione, lassitudine, capitis dolore, debilitate musculorum, impotentia tremoris, et anorexia. Extremae per gravedinem febris fatigatioque sunt rarae, licet usitatiores per influenzam, aliam superioris systematis respiratorii infectionem, cuius notae notis gravedinis simillimae sunt (Eccles 2005), quamquam severiores (Nordenberg 1999).
Morbi indicia solent post circa septem dies non comparere, sed usque ad quattuordecim durare possunt, infantibus et parvulis graviora quam adultis. Quamquam morbus lenis et definitus esse solet, gravedine laborantes saepe auxilium medicorum confirmatorum petunt, medicamentis libere coemptis utuntur, et interdum scholam laboremve amittunt. Gravedinis societati per annum pretium magnopere remediorum sumptu et "productivitatis" amissae horis stat.
Non sunt antiviralia ad contagionem curandam medicamenta rite approbata; omnia gravedinis medicamenta sunt exempla curationis palliantis, quae morbi notas solum extenuat. Etsi nonnulla remedia "alternativa," sicut megapotio vitamini C, echinacea, et zincum proposita sunt, non sunt eorum efficacitatis firma argumenta (American Lung Association 2005); ergo nullum ab Administratione Ciborum et Medicamentorum (Anglice Food and Drug Administration) vel Europaea Medicamentorum Administratione (Anglice European Medicines Agency) approbatum est. Ad contagionem impediendam, lavatio manuum monstrata est efficax.