Одинцов Алексей Серафимович

Шаблон:Серпасыс абу

Одинцов Алексей Серафимович
Чужан лун:	1938-ӧд вося урасьӧм тӧлысь 17-ӧд лун(1938-02-17)[1][2]
Чужанін:	Айкатыла, Коми Республика, РСФСР[d], Сӧветскӧй Социалистическӧй Республикаяслӧн Союз[1]
Кулан кад:	ӧшым 2009 (71 ар)
Куланін:	Айкатыла, Коми Республика, Рочму
Канму:	Сӧветскӧй Социалистическӧй Республикаяслӧн Союз  Рочму
Мыйся уджыс:	авиатехник, журналист, редактор, гижысь

Одинцов Алексей Серафимович (1938—2009) — коми гижысь, вуджӧдчысь.

Олан туй

Чужӧма 1938-ӧд вося урасьӧм тӧлысь 17-ӧд лунӧ Коми АССР-ын Емдiн районса Айкатыла сикт улӧ пырысь Митерас грездын. Ичӧтдырсянь сылы лои уджавны муяс да видзьяс вылын, собавны ружьеӧн вӧрті, кыйсьыны, отсасьны Любовь Ивановна мамыслы, коді кольӧма куим челядя дӧваӧн; батьыс усьӧма Айму вӧсна Ыджыд тыш вылын. 1958-ӧд воын помалӧма уджалысь том войтырлысь Айкатыласа шӧр школа, уджалӧма «Емдін» совхозын, электромонтёралӧма. 1958—1962-ӧд воясын служитӧма армияын, авиацияса механикӧн. 1973-ӧд воын помалӧма Коми канмуса педагогика институт, уджалӧма «Югыд туй» газетын литературнӧй сотрудникӧн, корреспондентӧн, ыджыд корреспондентӧн, юкӧдӧн веськӧдлысьӧн. 1981—2008-ӧд воясын уджалӧма «Войвыв кодзув» журналын: медводз кывкутысь секретарӧн, а 2001-ӧд восянь — юкӧдса редакторӧн.

Кулӧма 2009-ӧд вося ӧшым тӧлысь 14-ӧд лунӧ Айкатылаын, гуалӧма сэтчӧс шойнаӧ.^[3]

Гижан удж

Медводдза гижӧдыс — «Илля лунӧ» висьт — петавлӧма «Войвыв кодзув» журналын 1966-ӧд воын.

Коми канмуса педагогика институтын велӧдчигӧн А.С. Одинцов кутіс зільны студентъяслӧн литобъединениеын: лэдзисны литгазет да ки помысь гижӧм журнал.

А. Одинцов гижӧ шӧр да ыджыд арлыда челядьлы. Гижӧдъяссьыс бура тӧдчӧ челядь олӧм да психология тӧдӧм. Уна гижӧд пыртӧма челядьлы проза чукӧръясӧ да учебникъясӧ ^[4]. Тшӧкыда йӧзӧдліс и вӧр-ва йылысь гижӧдъяс да пасйӧдъяс. Коми Республикаса нимйӧза гижысь Геннадий Юшков тадзи гижліс сы йылысь: «Сылӧн гижӧдъясын вӧр-васӧ да коми кывсӧ оз позь торйӧдны, сідз жӧ, кыдзи войвыв юяснымӧс парма-вӧрсьыс» ^[5]. Коми гижысь Иван Торопов донъяліс тадзи: «Алексей гижӧ сы йылысь, мый бура тӧдӧ. Торъя лӧсьыда да стӧча сійӧ гижӧ войввыв вӧр-ва да кыйсьӧм йылысь».

Сылӧн петавліс некымын небӧг: «Медводдза коса туй» (1985), «Миян грездса челядь» (1987), «Пужъявлӧм кӧдза» (1992), «Парма-мамлӧн пиян» (1997).

«Ытва дырйи» висьтсӧ Пётр Столповский вуджӧдіс роч кыв вылӧ да «В половодье» ним улын 2003 воын йӧзӧдіс Москваын «Современная литература народов России» сборникын. А.С. Одинцовлысь гижӧдъяссӧ сідзжӧ вуджӧдлісны удмурт, мари, мордва кывъяс вылӧ.

Алексей Одинцов ачыс уна вуджӧдліс: комиӧдліс Коми Республикаса роч гижысь Александр Парначёв, Юрий Коврижных, Пётр Столповский да мукӧдлысь гижӧдъяссӧ ^[5].

Россияса Гижысь котырӧ пырӧ 2000 восянь.

«Войвыв кодзув» литературно-художественнӧй журнал быд тӧлысь бура дасьтӧмысь да ас кадӧ лэдзӧмысь, коми кыв, литература да культура сӧвмӧдӧмӧ ыджыд пай пуктӧмысь 2007 воын авторъяслӧн коллективлы сетӧма литература юкӧнын И.А. Куратов нима Коми Республикаса Веськӧдлан котырлысь премиа ^[6].

Небӧгъяс

Комиӧн

• Медводдза коса туй: челядьлы висьтъяс / Ред. Б. А. Попов; серпасалiс В. М. Михайлов. — Сыктывкар: Коми кн. изд-во, 1985. — 72 л.б.
• Миян грездса челядь. — Сыктывкар: Коми кн. изд-во, 1987.
• Пужъявлӧм кӧдза: челядьлы висьтъяс / Ред. А.В. Тентюков; серпасалiс А.А. Размыслов. — Сыктывкар: Коми кн. изд-во, 1992. — 109 л.б.
• Парма-мамлӧн пиян: челядьлы вӧр-ва йылысь висьтъяс / Серпасалiс Е.В. Сухарева. — Сыктывкар: Коми кн. изд-во, 1997. — 136 л.б.

Небӧг лӧсьӧдысь да редактор

• Коданёв И.В. Шувгы, муса Пармаӧй: висьтъяс, мойдъяс, серпасъяс / Лӧсьӧдіс А.С. Одинцов; небӧгсӧ серпасаліс Г.Н. Шарипков. — Сыктывкар: Коми кн. изд-во, 2001. — 132 л.б.
• Некрасов А.В. Шондібан: кывбуръяс / Ред. А.С. Одинцов; серпасалiс А.М. Гаранин. — Сыктывкар: Коми кн. изд-во, 1987. — 128 л.б.

Наградаяс

• Коми Республикаса нимӧдана уджалысь (2006)
• Коми Республикаса Веськӧдлан котырлысь премиа босьтысь (2007)

Ӧшмӧсъяс

• Коми Республикаса Национальнӧй библиотека
• Писатели Коми: биобиблиографический словарь. — Сыктывкар, 2001. — Т. 2. — С. 90-93.
• Календарь знаменательных и памятных дат Республики Коми на 2008 год. — Сыктывкар, 2007. — С. 14.
• Ульянов А.В. Митерасса Ӧльӧксей // «Войвыв кодзув», 2013. — 2 №. — Л.б. 65-72.

Ыстӧдъяс

1. http://cultmap.nbrkomi.ru/ru/page/literatura.Pisateli.Odintsov_Aleksey_Serafimovich/
2. http://www.ndbmarshak.ru/page/levoe_menju.chuzhan_mu.gizhny_chelyadly.odintsov_aleksey_serafimovich/
3. Коми Республикаса Вужвойтырлӧн небӧгаинын А.С. Одинцов йылысь (рочӧн)
4. «Войвыв кодзув», 2013. — 2 №. — Л.б. 44.
5. Козлова Е. Шоныда, мича кывъясӧн ... // «Войвыв кодзув», 2013. — 2 №. — Л.б. 62.
6. Коми Республикаса Национальнӧй библиотека