Москвина́ (мукӧдыс шуӧны Москви́нчи) — ыджыт грезд (деревня) Перем ладорись Коми кытшын, Кудымкар районас. Грездыс сулалӧ Кудымкарсянь рытвылӧ 38 км ылынаын, Вежайка ю дорын.
| Москвина Москвино | |
| Му: | Рочму |
| Статус: | грезд |
| ладор: | Перем ладор |
| район: | Кудымкар район |
| Инлыдпассэс: | 59°00′49″ с. ш. 54°10′34″ в. д.HGЯO |
| Веськӧтлан кыв | коми, роч |
| Отир лыд | 289 морт (2009) |
| Час кытш: | UTC+5 |
| Телефон нумерӧ содтӧт: | +7 34260 |
| Почта инпас: | 619551 |
| Авто нумерӧ содтӧт: | 59, 81 |
Москвинаыс ӧні пырӧ Иньвайыв посадмуӧ, а 2006 годӧдз татӧн вӧлі Москвина сельсоветлӧн шӧрин.
Москвинасянь ойвылас, Кувалань трак кузяс кӧ мунан, петӧны грезддэз Вальков, Ӧндриан да Вежайка. Мунан кӧ лунвылӧ, Иньвайывланяс, локтан Черӧмнӧйӧдз, Виль Жуковӧдз да Кариновӧдз. Асыввылын, Белоёвлань тракт дорын сулалӧ Сель. Сы ладорын жӧ кӧркӧ вӧлӧмась ӧні овтӧм ни деревняэз Шатун, Носков да Важ Жуков.
Москвинакӧт топ сулалӧ Яраш грезд, кӧдӧ позьӧ ни лыддьыны Москвина торӧн.
2006 воӧдз Москвинаын вӧлі сельсовет. Ӧні грездас кольччис токӧ ӧтік морт (староста?), кӧда баитӧ отирыскӧт влась нимсянь. Эм почта. Милицияись участковӧй кайлӧ татчӧ Иньвайывсянь.
Олӧны Москвинаын москви́нса нето москви́нчи. 2009 во пондӧтчикӧ нія вӧлісӧ 289 морт, видзисӧ 82 горт. Этӧ кыкись унажык 1970 год сьӧрті, кӧр татӧн олӧмась дзир 130 морт. Быдӧс оліссез комиӧсь. Уна отир локтӧны овны Москвинаас ордча грезддэзісь, а Москвинасянь мукӧдыс вешшӧны шӧриннэзлань, Иньвайылӧ нето Пешнигортӧ.
Памиллёэз коласын унажыксӧ ветлӧны сэтшӧммез: Васькин, Зубов, Устюжанцев, Харин, Хозяшев, Бачев.
Кулӧммезнысӧ москвинсаыс нӧбӧтӧны шойнаӧ, кӧда куйлӧ грездсяняс асыввылас, Сель да Носкова коласын. Сэтчинӧ жӧ дзебсьӧны селёвса да ярашовса.
Одзжык Москвинаын вӧлі колхоз «За мир» (отирыс сералӧмӧн шуӧмась сійӧ «Замри»). Ӧні ӧтласа аркиль абу.
Грездас эм ферма. Видзӧны баляэз, мӧссэз. Отирыс быдтӧны карч, мукӧдыс ӧктӧны вӧр ма. Быдӧс вузалӧны ньӧбсиссезлӧ. Ягӧдалӧны да тшакьялӧны унажыксӧ ас пондасис. Кӧть матісь вӧррезын олӧны ошшез, кӧиннэз да вӧрпорссез, москвинса озӧ тодиль вӧралӧ. Сю сідзжӧ озӧ быдтӧ.
Москвина дорын, Вежайка ю вылын, эм пруд, кытчӧ кӧркӧ лэдзӧмась карппез. Ӧні энӧ чериэсӧ кыйлӧны.
Москвинаын эм кык магазин: ӧтыс сельпо, мӧдыс — асторья.
Бытын кесъялан пункт 2000 воэзӧ грездісь подналісӧ, кыдз и пӧжаланін (пекарня). Няньсӧ ваявлӧны Иньвайылісь, нето ветлӧны сыла Куваӧдз.
Туйез Москвиналаняс умӧльӧсь.
Телевизоррез эмӧсь быд керкуын. Радио абу нач, кыдз и мобильниккез. Но грездын эм телефона будка.
Москвинаын эм под (основнӧй) школа, клуб, сы бердын библиотека. Шогаліссез понда осьтӧм пельшера-акушера пункт.
Кӧркӧ грездас вӧлі часовенка, кӧда ӧні кежӧ быдсӧн киссьӧм.
Москвинаас сулалӧ Айму понда косясянын усьӧм земляккезлӧ обелиск.
- Коми-Пермяцкий автономный округ на рубеже веков. Кудымкар, 2000. ISBN 5-87901-051-1
- Лобанова А.С. Висьтасьӧм. Перем, 2010.
- Шумилов Е. Н. Твоя малая родина: Краткий историко-топонимический справочник. 4-е изд., испр. и доп. Пермь, 2005.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
