Киров лапӧв

Киров лапӧв (рочӧнжык Кировскӧй облась) — веськӧтлан юкӧт Роч муын, Роч Федерация видзантор (субъект), коми отирлӧн горт муэзісь ӧтік. Пырӧ Волгадор федерал кытшӧ.

Киров лапӧв
Кировская область

Вужпас	Дӧрапас
Канму	Роч Федерация
Статус	лапӧв
Ыджытжык регион	Волгадор федерал кытш
Янсалӧм	6 кар кытш, 39 район
Веськӧтлан шӧрин	Киров
Аркман кад	1936 декаб 5 лун' во
Губернатор	Белых Никита Юрьевич
Веськöтлан кыв	роч
Оліссез (2010 во)	1 391 534 чел. (32-ӧт места)
Оліссезлӧн тшӧкыта	11,8 морт/км²
Чужанвуж сьӧрті тэчас	роччез, тотара, мариэз, удмурттэз, украинса; комиэз
Мувывтор	120 400 км² (ва - 0,5 %, 33-ӧт места)
Кад кытш	+3 (гожумнас +4)
Телефон код	+7 833
Пошта индекссэз	610000-613999
Автомобиль код	43
Веськöтланлöн сайт

Канкарыс – Киров.

Киров лапӧв вӧлі аркмӧтӧм 1936 годӧ декаб 5 лунӧ, кӧр Киров ладорись петіс Удмурт АССР.

География

Куйланін

Киров лапӧв – ыджыткодь регион Европа ладорись Рочмуын. Сія куйлӧ Роч волькытін ойвыв-асыввылын. Нюжалӧ 570 км ылына ойвывсянь (61°4 о.п.) лунвылӧ (56°3 о.п.) да 440 км ылына рытвывсянь (41°17 а.к.) асыввылӧ (53°56 а.к.).

Мувывторыс – 120374 км² ыжда.

Кировсянь Мӧскваӧдз – 896 км ылына.

Ордчӧн Киров лапӧлыскӧт куйлӧны: ойвылын – Кардор лапӧв да Коми Республика, асыввылын – Перем ладор да Удмурт Республика, лунвылын – Тотара Республика да Мари Республика, а рытвылын – Вӧлӧгда, Кострома да Улісь Новгорт лапӧввез.

Мувевдӧр

Мувевдӧр – мыса волькытін, кӧда пӧліньтӧм ойвыв-асыввывсянь лунвыв-рытвылӧ. Медыджыт (337 м) да медучӧт (56 м) вылынаэз коласын неӧткодьыс лоӧ 281 м. Лапӧв шӧрын – Ятка мыссэз, ойвыв-асыввылын – Камайыв вылынін, ойвылын – Ойвыв мыссэз.

Ваэз

Киров лапӧлын котӧртӧны быдсӧн 19 753 ю да шор, ӧтласа кузяныс – 66,65 сюрс км. Ойвыв мыссэз янсӧтӧны кык бассейнлісь юэз – Вынваӧ да Волгаӧ визывтаннэз. Медыджыт тор Киров лапӧлісь босьтӧ Ятка баасейн. Ачыс Яткаыс усьӧ Кама юӧ Татара муын ни. Камаыслӧн Киров лапӧлас токӧ катыт визувтӧмыс.

Ыджыт юэзӧн регионас лыддисьӧны нысся Молома, Пижма, Луз, Кобра, Чупчи.

Тыэз Киров лапӧлын 4,5 сюрс мымда. Ӧтлаын пруддэзкӧт нылӧн лыдыс лэбтісьӧ 5,5 сюрсӧдз. Медыджыт тыэз: Акшубень ты (85 га), Орлов ты (63 га), Мусер ты (32 га). Медпыдын ваыс Лежнина тыын (36,6 м). Уржум районын куйлӧ ассяма Шайтан ты.

Киров лапӧвлӧн ойвыв торыс лёка нюрсялӧм. Камакатыт районас нюррез вевттьӧны 40% быдӧс мувывторсис. Медыджыт нюррес: Волма нюр (13514 га), Саламат нюр (10556 га), Кайсин нюр (10517 га).

Климат

Климатыс шӧркодя континетвывся. Киров лапӧв куйлӧ матынкодь Ойвыв океан дынсянь, сійӧн и кӧдзыт руыс вермӧ кокнита вовлыны татчӧ: тӧвнас овлӧ ёна кӧдзыт, а гожумся кадӧ нешоча кынмывлӧ нето лёка сайкавлӧ.

Уна во сьӧрна мурталӧм (меряйтӧм) шӧрӧт шонтӧгыс январ коста – нуль увтся –13,5–15°С, июль коста – нуль вывся +17+19°С. Абсолют максимум овлӧ +36+38°С, абсолют минимум – –45–50°С.

Руыслӧн ульсӧтыс 75–79%. Октябсянь февральӧдз этія лыдыс лоӧ 81–89%, вуджан кадӧ (март, сентяб) сія вежласьӧ 74%-сянь 85%-ӧдз. А медкӧс руыс овлӧ май-июнь коста – 61–68%.

Киров лапӧв пырӧ тырмытӧдз ульсялан зонаӧ. Енӧжва усьӧ быд мӧд лун. Во сьӧрна лапӧлас ваыс усьӧ енӧжсяняс шӧркодьын 500–680 мм кыза, ойвылын 590–680 мм, лунвылын – 500–550 мм кыза. Енӧжваись 60–70% усьӧ шоныт кадӧ.

Во сьӧрна унажыксӧ пӧльтӧны тӧввез лунвыв-рытвывсянь да лунвывсянь. Тӧлыслӧн шӧркодь перыта во сьӧрна лоӧ 3–5 м/с. Гожумнас тӧввез лӧньжыкӧсь (ог кӧ лыддьӧ тӧвчиккез), арнас выныс быдмӧ да кӧдзыт кад коста павкӧ максимум. Тӧлыс пӧльтӧ унажыксӧ порыввезӧн, кӧдналӧн перытаныс овлӧ 30–40 м/с, не кӧ чожжык.

Колана шедтассэз

Медыдыжт озырвынӧн (богатствоӧн) Киров лапӧлас лыддисьӧны вӧр (унажыксӧ лысъя породаэз), фосфориттэз, торф, куэз, ва да му. Татӧн пантасьӧ ӧддьӧн шоч металл волконскоит. Паськыта куйлӧны торф шогманіннэз. Уна рудатӧм минераллэз: извесняккез, мергеллез, сёйэз, лыаэз, кӧдза. Медбӧрья дасвоэзӧ адззалӧмась мамдакӧ мусир, а сідзжӧ бетонит сёйез. Киров лапӧлісь фосфориттэз шогманін лыддиссьӧ меджыджытӧн быдсӧн Европаын.

Вӧр-ва дорьяніннэз

Тодиль дорйӧны вӧр-васӧ 197 мувывторын, кӧдналӧн ӧтласа пасьтаыс 375,6 сюрс га. Ны коласын «Нургуш» нима пӧдналӧм му (федерациясянь видзанатор) да регионсянь видзана куим заказник (Пижма, Былина, Бушков вӧр). Сэсся регионсянь видзана вӧр-ва казьмӧтаннэз татӧн 189-а, да бурдӧтчан-веськӧтчан муэз куима. Ӧні КИров лапӧлас мӧдӧны лосьӧтны национал парк «Атар Лука».

История

Киров лапӧв аркмис 1936 декаб 5 лунӧ, кӧр Киров ладорись петіс Удмурт АССР. Ас кадӧ Киров ладор аркмис Горькӧй ладор разьӧм бӧрын – 1934 декаб 7 лунӧ.

Отир

Оліссезлӧн лыдыс Киров лапӧлын дугдывтӧг чинӧ, мыля отир мунӧны татісь овны Мӧскваӧ, Улісь Новгортӧ, Козаньӧ, Перемӧ.

Медбӧрья гижӧтӧм дырни Киров лапӧлын оліс 1503,5 сюрс морт. 2009 во пондӧтчан кежӧ оліссезлӧн лыдыс лоис 1401,2 сюрс морт (Роч муын быдӧс оліссезісь 1,0%). ^[1]

Отирлӧн тшӧкытаыс: 11,3 морт/км², карын олӧны 72,1% (2009)^[1]. Уджавны кужиссез – 911 сюрс морт.

2008 годӧ отирыслӧн аскежись чинӧм лоис 1 сюрс морт вылӧ –5,8 (шогмиссез – 11,3, куліссез – 17,1). ^[2]

Медыджыт оланін Киров лапӧлас да сылӧн веськӧтлан шӧрин – Киров кар (464,5 сюрс олісь 2009 воын).

Чужанвуж сьӧрті тэчас

2002 годӧ Рочмуын отирӧс гижӧтӧм сьӧрті Киров лапӧлын оліс отир 150 чужанвужись, медуна:

• Роччез – 1 365 438
• Тотара – 43 415
• Мариэз – 38 930
• Удмурттэз – 17 952
• Украинса – 11 399
• Чужанвуж висьтавтӧммез – 3 823
• Беларуссэз – 2 846
• Азербайджанса – 2 503
• Армяна – 2 123
• Чувашшез – 1 856
• Чиганнэз – 1 499
• Немеччез – 1 482
• Молдавана – 1 269
• Комиэз – 1 054

Янсалӧм

Козак реформаӧдз Киров лапӧлын вӧлі 45 веськӧтлан юкӧт – районнэз да лапӧвсянь видзана каррез. Виль туйдӧттэз сьӧрті татӧн лоисӧ 39 район да квать кар кытш, кӧдна янсӧтчӧны 436 поснитжык муниципал юкӧт вылӧ (383 посадму и 53 карму).

Муниципал районнэз

№ Муниципал район Веськӧтлан шӧрин 1 Арбаж район Арбаж посёлок 2 Зюзьдін район Афанасьево карок 3 Белӧй Холуница район Белӧй Холуница кар 4 Богородскӧй район Богородскӧй посёлок 5 Камакатыт район Кирс кар 6 Верхошижемье район Верхошижемье посёлок 7 Ятскӧй Поляна район Ятскӧй Поляна кар 8 Даровскӧй район Даровскӧй посёлок 9 Зуевка район Зуевка кар 10 Кикнур район Кикнур посёлок 11 Кильмезь район Кильмезь посёлок 12 Кирово-Чепецкӧй район Кирово-Чепецкӧй кар 13 Котельнич район Котельнич кар 14 Кумены район Кумены посёлок 15 Лебяжье район Лебяжье посёлок 16 Луза район Луза кар 17 Малмыж район Малмыж кар 18 Мураш район Мураш кар 19 Нагорскӧй район Нагорскӧй посёлок 20 Нема район Нема посёлок

№ Муниципал район Веськӧтлан шӧрин 21 Нолинскӧй район Нолинскӧй кар 22 Омутнинскӧй район Омутнинскӧй кар 23 Опарино район Опарино посёлок 24 Оричс район Оричи посёлок 25 Орлов район Орлов кар 26 Пижанка район Пижанка посёлок 27 Подосиновец район Подосиновец посёлок 28 Санчурскӧй район Санчурскӧй посёлок 29 Свеча район Свеча посёлок 30 Слободскӧй район Слободскӧй кар 31 Советскӧй район Советскӧй кар 32 Суна район Суна посёлок 33 Тужа район Тужа посёлок 34 Уни район Уни посёлок 35 Уржум район Уржум кар 36 Фалёнки район Фалёнки посёлок 37 Шабала район Ленинскӧй посёлок 38 Юрья район Юрья посёлок 39 Яранскӧй район Яранскӧй кар

Кар кытшшез

1. Киров кар кытш
2. Ятскӧй Поляна кар кытш
3. Кирово-Чепецк кар кытш
4. Котельнич кар кытш
5. Слободскӧй кар кытш
6. Первомайскӧй кар кытш

Оланіннэз

Каррез Киров лапӧлын

Татӧн мыччалӧмӧсь оланіннэз, кытӧн 2009 январ 1 лун кежӧ оліс кыкьямыс сюрс мортся унажык.

Оланін	сюрс морт	Оланін	сюрс морт
Киров	▼ 464,1	Белӧй Холуница	▼ 11,4
Кирово-Чепецк	▼ 83,9	Уржум	▼ 11,4
Ятскӧй Поляна	▼ 38,6	Луза	▼ 11,1
Слободскӧй	▼ 34,6	Кирс	▼ 11,0
Котельнич	▼ 26,2	Нолинскӧй	▼ 10,3
Омутнинскӧй	▼ 24,5	Вахруши	▼ 10,1
Яранскӧй	▼ 19,7	Малмыж	▼ 8,8
Советскӧй	▼ 16,0	Первомайскӧй	▲ 9,0
Сосновка	▼ 12,1	Мурыгино	▼ 8,3
Зуевка	▼ 12,1	Оричи	▲ 8,1

Ыстісяннэз

1. 2009 вося январ 1 лун кежӧ оліссезлӧн лыд
2. 2008 воын оліссезлӧн аскежись вежсьӧм

Пасйӧттэз

Ӧшмӧссэз

• Киров лапӧлісь веськӧтланлӧн сайт

Волгадор федерал кытш

Башкыр Республика • Киров лапӧв • Мари Республика • Мордва Республика • Макарья лапӧв •
Оренбург лапӧв • Пенза лапӧв • Перем ладор • Самара лапӧв • Саратов лапӧв •
Тотара Республика • Удмурт Республика • Симбир лапӧв • Чуваш Республика

 

Роч Федерация видзанторрез

РЕСПУБЛИКАЭЗ:

Адыгму | Аланму | Алтай | Башкырму | Бурятму | Дагестан | Ингушму | Кабарда-Балкарму | Калмыкму | Карачай-Черкесму | Карьяла | Комиму | Мариму | Мордва | Удмуртму | Тотарму | Тыва | Хакасму | Чечня | Чувашму | Якутму

ЛАДОРРЕЗ:

Алтай ладор | Байкалсай ладор | Камчатка ладор | Краснодар ладор | Краснояр ладор | Перем ладор | Саридздын ладор | Ставрополь ладор | Хабаров ладор

ЛАПӦВВЕЗ:

Амур лапӧв | Астрахань лапӧв | Белгород лапӧв | Брянскӧй лапӧв | Виль Сибир лапӧв | Владимир лапӧв | Волгоград лапӧв | Воронеж лапӧв | Вӧлӧгда лапӧв | Иванов лапӧв | Иркут лапӧв | Калининград лапӧв | Калуга лапӧв | Кардор лапӧв | Кемеров лапӧв | Киров лапӧв | Кострома лапӧв | Курган лапӧв | Курскӧй лапӧв | Ленинград лапӧв | Липецкӧй лапӧв | Магадан лапӧв | Макарья лапӧв | Мӧсква лапӧв | Мурман лапӧв | Новгорт лапӧв | Омва лапӧв | Орёл лапӧв | Оренбург лапӧв | Пенза лапӧв | Псков лапӧв | Ростов лапӧв | Рязань лапӧв | Самара лапӧв | Саратов лапӧв | Сахалин лапӧв | Свердлов лапӧв | Симбир лапӧв | Смоленскӧй лапӧв | Тамбов лапӧв | Тверь лапӧв | Томва лапӧв | Тула лапӧв | Тюмень лапӧв | Челяба лапӧв | Ярославль лапӧв

АСЪЮРАЛАН ЛАПӦВ:

Еврей лапӧв

АСЪЮРАЛАН КЫТШШЕЗ:

Яран кытш | Йӧгра кытш | Чукотка кытш | Ямал Яран кытш

ФЕДЕРАЦИЯ ВИДЗАН КАРРЕЗ:

Мӧсква | Петракар