Sameiningarflokkur alþýðu - Sósíalistaflokkurinn

Sameiningarflokkur alþýðu - Sósíalistaflokkurinn, oftast nefndur einfaldlega Sósíalistaflokkurinn, var íslenskur stjórnmálaflokkur sem starfaði frá 1938 til 1968 þegar Alþýðubandalagið var gert að formlegum stjórnmálaflokki. Hann var myndaður af Kommúnistaflokki Íslands og hluta úr Alþýðuflokknum á grundvelli hugmyndarinnar um breiðfylkingu alþýðu gegn fasisma sem síðasta þing Komintern árið 1935 hafði sett fram og sem Einar Olgeirsson barðist fyrir á Íslandi.

1956 tók Sósíalistaflokkurinn þátt í stofnun kosningabandalagsins Alþýðubandalagsins ásamt Málfundafélagi jafnaðarmanna og Hannibal Valdimarssyni. Þegar Alþýðubandalagið varð að stjórnmálaflokki árið 1968 gekk Sósíalistaflokkurinn sjálfkrafa inn í það. Með því var flokkurinn lagður niður.

Sósíalistafélag Reykjavíkur neitaði að ganga í Alþýðubandalagið og hélt áfram sjálfstæðu starfi í nokkur ár áður en það hætti starfsemi. Kvenfélag Sósíalista var einnig starfrækt áfram þar til það var formlega lagt niður árið 1992.

Formenn

• Héðinn Valdimarsson, 1938-1939
• Einar Olgeirsson, 1939-1968

Varaformenn

• Sigfús Sigurhjartarson, 1938-1952
• Steinþór Guðmundsson, 1952-1957
• Lúðvík Jósepsson, 1957-1968

Kjörfylgi

Alþingiskosningar
Kosningar	% atkvæða	þingsæti
1942 (júlí)	16,2	6
1942 (október)	18,5	10
1946	19,5	10
1949	19,5	9
1953	16,1	7

Borgarstjórnarkosningar
Kosningar	% atkvæða	fulltrúar
1942	23,8	4 (15)
1946	28,5	4 (15)
1950	26,5	4 (15)
1954	19,3	3 (15)

Tenglar

• Klassísk rit jafnaðarsinna á Íslandi
• Einkaskjalasafn Kvenfélags Sósíalista^{[óvirkur tengill]}