Sýlingarfell

Sýlingarfell eða Svartsengisfell er fell á Reykjanesskaga norðan Grindavíkur sem rís í 197 metra hæð yfir sjávarmál. Norðvestur af fellinu er gróðursæl hlíð og flatlendi sem er hið eiginlega Svartsengi en vestur af fellinu eru Grindavíkurvegur, Svartsengisvirkjun og Bláa lónið. Sýlingarfell er nyrsti hluti stærra fells sem nær suður að Hagafelli^[1] en þar austan við er Sundhnúkur og Sundhnúksgígar.

Sýlingarfell
Hæð	197 metri
Land	Ísland
Sveitarfélag	Grindavíkurbær
Hnit	63°53′03″N 22°24′18″V
breyta upplýsingum

Sýlingarfell er grágrýtishetta á móbergi sem myndaðist á síðasta jökulskeiði ísaldar. Efst í því eru gígar frá sama tíma.^[2] Heitið Sýlingarfell er dregið af því að „sýlingar“ sjáist í gígbarminum en orðið merkir skarð eða skora.^[3]

Sýlingarfell er umlukið hraunum sem hafa runnið í eldgosum eftir lok síðustu ísaldar, þar á meðal nýjum hraunum sem hafa runnið í hrinu eldgosa við Sundhnúksgíga sem hófst í desember 2023 og stendur enn. Vegna þeirra eldsumbrota hefur verið ráðist í gerð mikilla varnarmannvirkja í kringum Sýlingarfell til að beina hraunstraumum frá Svartsengisvirkjun og öðrum mannvirkjum á Svartsengissvæðinu.^[4]